Read Nguna Togoa Etafe North NUMBERS 28 Bible Online

NUMBERS 28 - Nguna Togoa Etafe North bible

NUMBERS 28

¹Go Yehovah e pasa paki Moses, po naga,

²P̃a tip̃aki Israel natuna maga, po noa ki da, p̃a naga, Naviriana ni navinaga aginau, navinaga ni navituaana aginau maga pae nakapu, tea ni nap̃o wia paki nau, kuga vavaigoro naga kuga vitua ki da paki nau ragi tatutakiana kakada.

³Go p̃a noa ki da, p̃a naga, Navituaana pae nakapu waina kuga vitua ki nia paki Yehovah, ega vei tea waia; shiip natuna anoai maga ni natau sikai, tea mamaau p̃ia, ega rua sara naaleatia, ega vei navituaana tap̃arakiana sikai ni sara ragi.

⁴Kuga vitua ki shiip natuna sikai malip̃ogi, go kuga vitua ki shiip natuna kerua ragi melu;

⁵Go namagovai kerualima sikai ni efah sikai ni flaur wia ega vei navituaana ni flaur, tea sarisariana pilake namagovai kevati ni hin sikai ni naroro tuki‐p̃oroworosiana.

⁶E pei navituaana tap̃arakiana sikai ni sara ragi, waina e pei tea tawonakiana tava Sinai naga ega vei tea ni nap̃o wia, navituaana sikai pae nakapu paki Yehovah.

⁷Go navituaana takiana kakana ega vei namagovai kevati ni hin sikai, ega vilake shiip natuna sikai: p̃a taki lua navituaana takiana sikai ni namunuana kasua paki Yehovah tokora tapu.

⁸Go p̃a vitua ki shiip natuna kerua ragi melu: p̃a vitua ki nia ega tapala navituaana ni flaur ni malip̃ogi, go ega tapala navituaana takiana kakana, navituaana sikai pae nakapu, tea ni nap̃o wia paki Yehovah.

⁹Go naaleatia ni sabbath, shiip natuna anoai dua ni natau sikai, tea mamaau p̃ia, go namagovai kerualima dua ni efah sikai ni flaur wia naga ega vei navituaana sikai ni flaur, tea sarisariana pilake naroro, go navituaana takiana kakana:

¹⁰Tea wanogoe ega vei navituaana tap̃arakiana ni sara sabbath, ega vilake navituaana tap̃arakiana ni sara ragi, go navituaana takiana kakana.

¹¹Go ragi ni naatulakeana ni atelagi animu maga sikasikai, kuga vitua ki navituaana tap̃arakiana sikai paki Yehovah; kau anoai vusavusa dua, go shiip anoai sikai, go shiip natuna anoai larua ni natau sikai, tea mamaau p̃ia;

¹²Go namagovai kerualima dolu ni efah sikai ni flaur wia, tea sarisariana pilake naroro, ega vei navituaana sikai ni flaur ega vilake kau anoai sikasikai sarasara ra; go namagovai kerualima dua ni flaur wia, tea sarisariana pilake naroro, ega vei navituaana sikai ni flaur, ega vilake shiip anoai sikasikai;

¹³Go namagovai kerualima p̃ota sikai ni flaur wia tea sarisariana pilake naroro ega vei navituaana sikai ni flaur ega vilake shiip natuna sikasikai sarasara ra; ega vei navituaana tap̃arakiana sikai tea ni nap̃o wia, navituaana sikai pae nakapu paki Yehovah.

¹⁴Go navituaana takiana kakada maga euga vei namagovai sikai ni hin sikai ni waine ega vilake kau anoai sikasikai, go namagovai ketolu ni hin sikai ega vilake shiip anoai, go namagovai kevati ni hin sikai ega vilake shiip natuna sikasikai: tea wanogoe e pei navituaana tap̃arakiana ni sara atelagi sikasikai usuraki natau.

¹⁵Go naninani anoai sikai ega vei navituaana sikai ni namarinaleosaana paki Yehovah; ega vei tea vituakiana ega vilake navituaana tap̃arakiana ni sara ragi, go navituaana takiana kakana.

¹⁶Go nakup̃a kerualima sikai tamate pati ni atelagi vea, e pei navakalauana ki Yehovah.

¹⁷Go nakup̃a kerualima sikai tamate lima ni atelagi wanogoe, e pei nasaisaiana tatutakiana sikai: naaleatia ega larua bred waina leven e dika asa ega vei tea kaniana.

¹⁸Naaleatia vea kuga veani nasososaisaikiana tapu sikai; kuga ta mari te nawosiana kasua seara asa mau:

¹⁹Ma kuga vitua ki navituaana sikai pae nakapu, navituaana tap̃arakiana sikai paki Yehovah; kau anoai vusavusa dua, go shiip anoai sikai, go shiip natuna anoai larua ni natau sikai: euga vei tea mamaau p̃ia:

²⁰Go navituaana ni flaur kakada, flaur wia tea sarisariana pilake naroro: kuga vitua ki namagovai kerualima dolu ega vilake kau anoai sikasikai, go namagovai kerualima dua ega vilake shiip anoai wanogoe;

²¹Go p̃a vitua ki namagovai kerualima sikai ega vilake shiip natuna larua sikasikai sarasara ra;

²²Go naninani anoai sikai ega vei navituaana sikai ni namarinaleosaana, naga ega manimu mari natap̃augoroana.

²³Kuga vitua ki tea maga wanogoe ega vilake navituaana tap̃arakiana ni malip̃ogi, waina e pei navituaana tap̃arakiana ni sara ragi.

²⁴Kuga vitua ki nia ega tapala nogoe sara naaleatia ni naaleatia ega larua, navinaga ni navituaana pae nakapu, tea ni nap̃o wia paki Yehovah: ega vei tea vituakiana ega vilake navituaana tap̃arakiana ni sara ragi, go navituaana takiana kakana.

²⁵Go naaleatia kelarua kuga veani nasososaisaikiana tapu sikai; kuga ta mari te nawosiana kasua seara asa mau.

²⁶Go naaleatia ni nawa vea maga ni takavea, ragi waina kuga vitua ki navituaana sikai ni flaur vau paki Yehovah, ragi ni nasaisaiana tatutakiana animu ni wiik maga, kuga moro peani nasososaisaikiana tapu sikai; kuga ta mari te nawosiana kasua seara asa mau:

²⁷Ma kuga vitua ki navituaana tap̃arakiana sikai ni tea ni nap̃o wia paki Yehovah; kau anoai vusavusa dua, shiip anoai sikai, shiip natuna anoai larua ni natau sikai;

²⁸Go navituaana ni flaur kakada, flaur wia tea sarisariana pilake naroro, namagovai kerualima dolu ega vilake kau anoai sikasikai, namagovai kerualima dua ega vilake shiip anoai.

²⁹Go namagovai kerualima sikai ega vilake shiip natuna maga sikasikai sarasara ra;

³⁰Go naninani anoai sikai, naga ega manimu mari natap̃augoroana.

³¹Euga sokari navituaana tap̃arakiana ni sara ragi, go navituaana ni flaur kakana, waina kuga vitua ki da, (euga vei tea mamaau p̃ia), go navituaana takiana kakada maga.