Read Nguna Togoa Etafe North NUMBERS 30 Bible Online

NUMBERS 30 - Nguna Togoa Etafe North bible

NUMBERS 30

¹Go Moses e pasa paki nap̃au maga ni naworawora ni Israel natuna maga, po naga, Tea waia e pei natip̃akiana ki Yehovah waina e pitip̃aki asa.

²Naatam̃oli sikai e pe sai nasaiana sikai paki Yehovah, kite e pe vivisa navivisaana sikai naga e pe mauti naatana pa dua ki navatuna sikai, e pe wo da dapiri navasaana aneana mau; ega wo mari pataka ni tea mamau puti waina ega tave m̃elu nawokana.

³Go nagoroi sikai e pe sai nasaiana sikai paki Yehovah, po dum̃ana pivisa navivisaana sikai, ragi waina e ko pei naatara doko nasum̃a ki tamana doko;

⁴Go tamana e pe rogo narogorogoana nalo ni nasaiana aneana, go nalo ni navivisaana aneana waina e pe vivisa asa, go tamana e pe vunuta nalo kakana: nasaiana aneana mamau puti eu pe wo du, go sara navivisaana aneana waina e pe vivisa ara eu pe wo du.

⁵Ma tamana e pe ta suasua asa naaleatia waina e pe rogo e; te nasaiana aneana, kite navivisaana aneana waina e pe vivisa asa, e pe wo da du mau: go Yehovah ega maneana midoakikorokoro e, nalakena tamana e da suasua asa mau.

⁶Go e pe laki paki naanoai sikai ragi waina e pe vei tea vulusokiana ki nasaiana aneana maga, kite ki navasaana waina nagolena ero pe m̃araverave pasa ara, waina e pe tum̃ana pulusoki naatana asa;

⁷Go anawota e pe rogo e, po punuta doko nalo kakana naaleatia waina e pe rogo e: nasaiana aneana maga eu pe wo du, go navivisaana aneana maga waina e pe tum̃ana pulusoki naatana ara eu pe wo du.

⁸Ma anawota e pe ta suasua asa mau naaleatia waina e pe rogo e; e pe wo mari nasaiana aneana waina e pe toko asa doko, e pe vei tea m̃oli, go navasaana waina nagolena ero pe m̃araverave pasa asa, waina e pe tum̃ana pulusoki naatana asa: go Yehovah ega wo maneana midoakikorokoro e.

⁹Ma te nasaiana ki nagoroi malepu sikai, kite ki nagoroi waina e pei tea toropusiana, te navatuna waina e pe tum̃ana pulusoki naatana asa, e pe wo du dip̃a e.

¹⁰Go nagoroi sikai e pe sai nasaiana sikai ragi waina e pe toko nasum̃a ki anawota, kite e pe vulusoki naatana ki navivisaana sikai,

¹¹Go anawota e pe rogo e, po punuta doko nalo kakana, po da noa te navatuna paki nia mau; nasaiana aneana maga eu pe wo mamau puti du, go sara navivisaana waina e pe tum̃ana pulusoki naatana ara eu pe wo du.

¹²Ma anawota e pe mari ra eu pe vei tea m̃oli naaleatia waina e pe rogo e; te navasaana waina e pe tave m̃elu nagolena maga nalo ni nasaiana aneana maga, kite nalo ni navivisaana waina naatana e pe vei tea vulusokiana asa, e pe wo da du mau: anawota e po mari ra eu pei tea m̃oli, go Yehovah ega wo maneana midoakikorokoro e.

¹³Te nasaiana go te navivisaana waina nagoroi sikai e pe mari a naga ega mari naatana ega rogokitesa ki navaliana asa, anawota e mariatae lawosoki a, kite anawota e mariatae mari a ega vei tea m̃oli.

¹⁴Ma anawota e pe vunuta nalo kakana pae naaleatia paki naaleatia; e pe lawosoki nasaiana aneana maga mamau puti, kite navivisaana aneana maga mamau puti, waina eu pe toko asa doko: e po lawosoki ra, nalakena e punuta doko nalo kakada naaleatia waina e dogo ra.

¹⁵Ma e pe mari ra eu pe vei tea m̃oli edaku ki ragi waina e pe rogo narogorogoana kakada; e pe wo magi anagoroi dapetape namarinaleotageleana aneana.

¹⁶Tea maga wanogoe eu pei natawonakiana maga waina Yehovah e dip̃aki Moses asa, namawota ni naatam̃oli sikai go ni anagoroi, namawota ni naatam̃oli sikai go ni natuna nagoroi, ragi waina e ko doko nasum̃a ki tamana doko, ragi ni navei‐naatara‐ana aneana.