Read Nguna Togoa Etafe North NUMBERS 34 Bible Online

NUMBERS 34 - Nguna Togoa Etafe North bible

NUMBERS 34

¹Go Yehovah e pasa paki Moses, po naga,

²P̃a tip̃aki Israel natuna maga, po noa ki da, p̃a naga, Ragi waina kuga vaki navanua ni Kanaan, (waia e pei navanua waina ega manimu dowo pae gole naga ega vei tea veanipiolikiana sikai, e pei navanua mamau ni Kanaan,)

³Taleva animu ni sauth ega toko pae masop̃alo ni Sin pano pae kokoi ni Edom, go kokoi animu ni sauth ega toko pae namatap̃ago ni Natasi ni Natasimena paki ist:

⁴Go kokoi animu ega maradoa paki sauth ni tokora ni nasakesakeana ni Akrabbim, po pano paki Sin: go tokora kakana waina ega liliu asa ega tip̃a Kadesh‐barnea paki sauth; go ega tave pano paki Hasar‐addar, po pano paki Asmon:

⁵Go kokoi ega maradoa pae Asmon paki noaisara ni Ityipt, go tokora kakana waina ega liliu asa ega tip̃a natasi.

⁶Go kokoi animu ni west ega vei natasi warua go kokoi kakana: tea wanogoe ega vei kokoi animu ni west.

⁷Go tea waia ega vei kokoi animu ni north: kuga manimu midiri dawona ki nia ega vae natasi warua pano paki tava Hor:

⁸Kuga manimu midiri dawona ki kokoi pae tava Hor pano paki tokora ni nasiliana paki Hamath; go tokora waina kokoi ega liliu asa ega tip̃a Sedad:

⁹Go kokoi ega tave pano paki Sifron, go tokora kakana waina ega liliu asa ega tip̃a Hasar‐enan: tea wanogoe ega vei kokoi animu ni north.

¹⁰Go kuga midiri dawona ki kokoi animu ni ist ega vae Hasar‐enan pano paki Shefam:

¹¹Go kokoi wanogoe ega siwo pae Shefam pano paki Riblah, taleva ni ist ni Ain; go kokoi ega siwo pano, go ega liliu nadigi ni natasi ni Kinnereth paki ist:

¹²Go kokoi ega siwo paki Yordan pano, go tokora kakana waina ega liliu asa ega tip̃a Natasi ni Natasimena: tea wanogoe ega vei navanua animu ega vae kokoi kakada maga daliviri.

¹³Go Moses e dip̃aki Israel natuna maga, po naga, Tea wanogoe e pei navanua waina kuga veani pioli ki nia pae gole, waina Yehovah e pitip̃aki asa naga ega vei tea vituakiana paki naworawora loveti, go paki namagovai ni naworawora sikai:

¹⁴Nalakena naworawora ni Reuben natuna maga pae nasum̃a maga ni tamada maga, go naworawora ni Cad natuna maga pae nasum̃a maga ni tamada maga, eu dape sua tea veanipiolikiana adeada, go namagovai ni naworawora ni Manasseh eu dape sua tea veanipiolikiana adeada:

¹⁵Go naworawora dua go namagovai ni naworawora sikai eu dape sua tea veanipiolikiana adeada taleva ni ist ni Yordan leana dip̃a Yeriko, paki taleva ni elo sake.

¹⁶Go Yehovah e pasa paki Moses, po naga,

¹⁷Tea maga waia eu pei nagisa maga ni naatam̃oli maga waina euga manimu dap̃otawotae navanua naga ega vei tea veanipiolikiana animu: Eleasar tea viri, go Yoshua natu ni Nun.

¹⁸Go kuga matadoa tea maraki sikai m̃elu naworawora maga sikasikai sarasara ra, naga euga tapotawotae navanua ega vei tea veanipiolikiana animu.

¹⁹Go tea maga waia eu pei nagisa maga ni naatam̃oli maga wanogoe: ni naworawora ni Yudah, Kaleb natu ni Yefuneh.

²⁰Go ni naworawora ni Simeon natuna maga, Shemuel natu ni Ammihud.

²¹Go ni naworawora ni Benyamin, Elidad natu ni Kislon.

²²Go ni naworawora ni Dan natuna maga, tea maraki sikai, Bukki natu ni Yokli.

²³Ni Yosef natuna maga: ni naworawora ni Manasseh natuna maga, tea maraki sikai, Hanniel natu ni Efod:

²⁴Go ni naworawora ni Efraim natuna maga, tea maraki sikai, Kemuel natu ni Shiftan.

²⁵Go ni naworawora ni Sebulun natuna maga, tea maraki sikai, Elisafan natu ni Parnak.

²⁶Go ni naworawora ni Issakar natuna maga, tea maraki sikai, Paltiel natu ni Assan.

²⁷Go ni naworawora ni Asher natuna maga, tea maraki sikai, Ahihud natu ni Shelomi.

²⁸Go ni naworawora ni Naftali natuna maga, tea maraki sikai, Pedahel natu ni Ammihud.

²⁹Tea maga wanogoe eu pei naatam̃oli maga waina Yehovah e dip̃aki da naga euga magi Israel natuna maga dap̃otawotae tea veanipiolikiana navanua ni Kanaan.