Read Nguna Togoa Etafe North NUMBERS 5 Bible Online

NUMBERS 5 - Nguna Togoa Etafe North bible

NUMBERS 5

¹Go Yehovah e pasa paki Moses, po naga,

²P̃a tip̃aki Israel natuna maga naga euga mari lepero maga mamau puti euga vaki etaku ni tokora ni nam̃enakiana, go sara naata waina eu peani nasaraana sikai, go tea maga waina eu loa nalakena tea mate maga:

³E pe vei naanoai kite nagoroi, kuga toropusi ra euga toko etaku, etaku ni tokora ni nam̃enakiana, kuga toropusi ra asa; naga euga ta mari tokora ni nam̃enakiana, waina kinau a doko m̃aleoputo kakana, naga ega loa mau.

⁴Go Israel natuna maga eu mari dapala nogoe, po doropusi ra eu doko etaku ni tokora ni nam̃enakiana: dapala waina Yehovah e noa ki Moses asa, dapala nogoe Israel natuna maga eu mari a.

⁵Go Yehovah e pasa paki Moses, po naga,

⁶P̃a vasa paki Israel natuna maga, po naga, Naatam̃oli sikai, naanoai kite nagoroi, e pe mari te namarinaleosaana sikai waina naatam̃oli maga eu do mari naleo sa asa, naga e pe mari natapiriana sikai dip̃a Yehovah, go sogi e pe liko naatam̃oli wanogoe;

⁷Ragi wanogoe nae ega noasai namarinaleosaana waina e mari naleo sa asa: go ega lagati dip̃a natapiriana mamau aneana po sokari a ki namagovai kelima kakana, po lagati dua naata waina e mari naleo sa asa.

⁸Ma naatam̃oli sikai e pe tika te namatarau sikai waina e pe mariatae lagati pitua paki nia dip̃a namarinaleosaana wanogoe, navituadip̃aana wanogoe dip̃a namarinaleosaana e pe wo pei tea vituakiana paki Yehovah naga ega vei agi tea viri; ega masale ki shiip anoai ni natap̃augoroana waina euga maneana mari natap̃augoroana asa.

⁹Go sara navituaana sikosikoviana maga ni naleo tapu mamau puti ki Israel natuna maga, waina nara euga vitua ki da paki tea viri, euga vei tea aneana.

¹⁰Go naleo tapu maga ki sara naatam̃oli maga euga vei tea aneana: sara navatuna waina te naata e pe tua tea viri asa, e pe wo pei tea aneana.

¹¹Go Yehovah e pasa paki Moses, po naga,

¹²P̃a vasa paki Israel natuna maga, po noa ki da, p̃a naga, Waina te naatam̃oli sikai anagoroi e pe tawasi, po mari naleo sa sikai dip̃a e,

¹³Go naatam̃oli sikai e pe one sikoti a, go e pe vei tea tasurukiana paki namata ni anawota, po da pei tea rogorogokiana mau, go nagoroi wanogoe e pe vei tea mariana e pe vei tea loa, go tea noasokisoki sikai dip̃ae epe tika, go e pe ta pei tea vuasokiana nalakena namaripeleana wanogoe mau;

¹⁴Go naata ni natotowokasuaana e pe vuvua umai doko naatam̃oli wanogoe, go e pe totowo kasua nalo ni anagoroi, go nae e pe vei tea mariana e pe vei tea loa; kite naata ni natotowokasuaana e pe vuvua umai doko asa, go e pe totowo kasua nalo ni anagoroi, go nae e pe ta pei tea mariana e pe ta loa mau:

¹⁵Ragi wanogoe naatam̃oli wanogoe ega viragi anagoroi umai punusi tea viri, po maneana dape naviriana ni navinaga aneana sikai umai, ega vei namagovai kerualima ni efah sikai ni flaur ni barle; ega ta daki te naroro asa mau, kite doropusi te libano ega toko asa mau; nalakena e pei navituaana sikai ni flaur ni natotowokasuaana, navituaana sikai ni flaur ni namidoakiparati‐kiana, waina ega mari namarinaleotageleana ega vei tea midoakiparati‐kiana.

¹⁶Go tea viri ega viragi nagoroi wanogoe umai paki m̃aladigi, po lawo ki nia ega tu narae ni Yehovah:

¹⁷Go tea viri ega tape lasa ni naruku sikai, po daki noai tapu asa; go ega tape nam̃otam̃ota seara ni natano waina e doko ekopu ni nasum̃atokoana, po sapura ki nia noai wanogoe:

¹⁸Go tea viri ega lawo ki nagoroi wanogoe ega tu narae ni Yehovah, po peresi nalolu ni nap̃au ni nagoroi wanogoe, po doropusi navituaana ni flaur ni namidoaki‐parati‐kiana waina e pei navituaana ni flaur ni natotowokasuaana, ega toko nam̃elearuna maga: go lasa ni noai ni nakokonaana waina ega mari navasasakiana ega toko nam̃elearu ni tea viri:

¹⁹Go tea viri ega mari nagoroi wanogoe ega vivisa, go ega noa ki nia naga, Naatam̃oli sikai e pe ta one sikoti ko mau, go ku pe ta dawasi po da pei tea mariana ku loa mau, go ku doko etano ki am̃awota, te namarisakiana ni noai ni nakokonaana waia waina ega mari navasasakiana, e pe wo da mari sa ki‐go mau:

²⁰Ma ku pe tawasi, go ku doko etano ki am̃awota, go ku pe vei tea mariana ku pe loa, go naatam̃oli sikai waina e pe ta pei am̃awota mau e pe one sikoti ko:

²¹(Go tea viri ega mari nagoroi wanogoe ega vivisa ki navivisaana ni navasasakiana, go ega noa ki nagoroi wanogoe), ega naga, E pe tapala nogoe Yehovah e pe mari ko p̃a vei navasasakiana sikai go navivisaana sikai m̃aleoputo ni narei anigo, ragi waina Yehovah ega mari namaom̃a ega maroe, go nap̃elem̃a ega vuka;

²²Go noai waia waina ega mari navasasakiana wanogoe, ega vaki namaritam̃a, po mari nap̃elem̃a ega vuka, go namaom̃a ega maroe: go nagoroi wanogoe ega wo naga, Amen, Amen.

²³Go tea viri ega midiri navasasakiana maga wanogoe tusi sikai, po sarue lua ra ki noai ni nakokonaana:

²⁴Go ega mari nagoroi wanogoe ega munu noai ni nakokonaana waina ega mari navasasakiana: go noai waina ega mari navasasakiana ega vaki nap̃alauna po mari a ega vitivitinu asa.

²⁵Go tea viri ega tape navituaana ni flaur ni natotowokasuaana m̃elu dua ki nam̃elearu ni nagoroi wanogoe, go ega salesalea ki navituaana ni flaur narae ni Yehovah, po dape a sake paki wede ni naviriana:

²⁶Go tea viri ega tape kovai navituaana ni flaur nam̃elearuna sikai ega vura, ega vei namidoakiana kakana, po dap̃ara ki nia wede ni naviriana, po edaku mari nagoroi wanogoe ega munu noai wanogoe.

²⁷Go ragi waina ega mari a ega munu noai wanogoe, ega wo pakilina, e pe vei tea mariana e pe loa, go e pe mari namarinaleosaana sikai dip̃a anawota, noai waina ega mari navasasakiana, ega wo paki nap̃alauna po mari a ega vitivitinu asa, go nap̃elena ega vuka, go namaona ega maroe: go nagoroi wanogoe ega vei navasasakiana sikai m̃aleoputo ni narei aneana.

²⁸Go nagoroi wanogoe e pe ta pei tea mariana e pe ta loa mau, ma e pe tautau; ega ta pei tea marisakiana mau, go ega tumau ki piakiki.

²⁹Tea wanogoe e pei nawotaeana nalo ni natotowokasuaana, ragi waina nagoroi laki sikai e pe tawasi m̃elu dua ki anawota po pei tea mariana e pe loa;

³⁰Kite ragi waina naata ni natotowokasuaana e pe vuvua umai doko naatam̃oli sikai, go e pe totowo kasua nalo ni anagoroi; ega lawo ki anagoroi ega tu narae ni Yehovah, go tea viri ega mari nawotaeana mamau puti wanogoe asa.

³¹Sogi ega ta liko anawota nalo ni namarinaleotageleana wanogoe mau, ma anagoroi ega tum̃ana dapetape namarinaleotageleana aneana.