Read Nguna Togoa Etafe North NUMBERS 6 Bible Online

NUMBERS 6 - Nguna Togoa Etafe North bible

NUMBERS 6

¹Go Yehovah e pasa paki Moses, po naga,

²P̃a vasa paki Israel natuna maga, po noa ki da naga, Ragi waina naatam̃oli sikai, naanoai kite nagoroi, ega mari navasasokiana mamau sikai, navasasokiana ni Nasarite sikai, naga ega tum̃ana mari masale ki nia paki Yehovah:

³Ega tum̃ana suka ki nia m̃elu dua ki waine go ki namunuana kasua; ega ta munu nakokonae ni waine, kite nakokonae ni namunuana kasua, go ega ta munu nasua ni nawa ni vaine mau, kite gani nawa ni vaine mau, tea mata kite tea vagaraeana.

⁴Sara naaleatia ni namarimasalekiana aneana, ega ta gani te navatuna waina e pei tea mariana ki nawa ni vaine mau, kite napatina kite nawilina.

⁵Sara naaleatia ni namarimasalekiana aneana, tea masi naloluna ega ta paki nap̃auna mau: pa pa naaleatia maga ni namarimasalekiana aneana euga vei tea vakavuroana, waina e doko dum̃ana mari masale ki nia paki Yehovah asa, ega vei tea tapu, ega suasua naga naloluna ega ta pei tea alatiana mau.

⁶Sara naaleatia waina e doko dum̃ana mari masale ki nia paki Yehovah, ega ta paki m̃aladigi ki nap̃atoko mate sikai mau.

⁷Ega ta dum̃ana mari a ega loa nalakena tamana mau, kite nalakena p̃ilana, nalakena taina kite nalakena gorena, ragi waina eu pe mate: nalakena namarimasalekiana aneana paki Yehovah e doko nap̃auna.

⁸Sara naaleatia ni namarimasalekiana aneana, e pei tea tapu paki Yehovah.

⁹Go naatam̃oli sikai waina e pe toko nap̃irikiana e pe mate m̃araverave, go e pe mari nap̃auna marimasalekiana e pe loa; ega masi nalolu ni nap̃auna naaleatia waina ega vei tea mari‐dautau‐kiana asa, naaleatia kelarua ega masi a.

¹⁰Go naaleatia kelatolu ega viragi turi dua, kite tokopea vusavusa dua umai punusi tea viri, doko namata ni tap̃aup̃au ni nasaisaiana:

¹¹Go tea viri ega vitua ki sikai naga ega vei navituaana ni namarinaleosaana sikai, go kerua naga ega vei navituaana tap̃arakiana sikai, po maneana mari natap̃augoroana, nalakena e mari naleo sa nalakena tea mate wanogoe, go ega moro tapugoro nap̃auna naaleatia sikai maau wanogoe.

¹²Go ega moro dum̃ana mari masale ki nia paki Yehovah naaleatia maga ni namarimasalekiana aneana, go ega viragi shiip natuna anoai sikai ni natau sikai umai, naga ega vei navituaana sikai ni natapiriana: ma naaleatia maga ni ragi vea euga vei tea m̃oli, nalakena namarimasalekiana aneana e pei tea marisakiana.

¹³Go tea waia e pei nawotaeana ni Nasarite, ragi waina naaleatia maga ni namarimasalekiana aneana euga vei tea vakavuroana: ega vei tea viragiana umai paki namata ni tap̃aup̃au ni nasaisaiana:

¹⁴Go ega vitua ki naviriana ni navinaga aneana paki Yehovah, shiip natuna anoai sikai ni natau sikai, tea mamaau p̃ia naga ega vei navituaana tap̃arakiana sikai, go shiip natuna goroi sikai ni natau sikai, tea mamaau p̃ia, naga ega vei navituaana sikai ni namarinaleosaana, go shiip anoai sikai, tea mamaau p̃ia naga ega vei navituaana sikai ni natam̃ateana,

¹⁵Go nala sikai ni bred waina leven e dika asa, go keke maga ni flaur wia tea sarisariana pilake naroro, go keke manivenive maga waina naroro e pei tea takiana ara, go navituaana ni flaur kakada, go navituaana takiana kakada maga.

¹⁶Go tea viri ega viragi ra umai paki narae ni Yehovah, go ega vitua ki navituaana ni namarinaleosaana aneana, go navituaana tap̃arakiana aneana:

¹⁷Go ega vitua ki shiip anoai naga ega vei naviriana sikai ni navituaana maga ni natam̃ateana paki Yehovah, ega vilake nala ni bred waina leven e dika asa, go tea viri ega moro pitua ki navituaana ni flaur kakana, go navituaana takiana kakana.

¹⁸Go Nasarite wanogoe ega masi nalolu ni nap̃auna tapugoroana doko namata ni tap̃aup̃au ni nasaisaiana, go ega tape nalolu ni nap̃auna tapugoroana, po nadi ki nia paki nakapu waina naviriana ni navituaana maga ni natam̃ateana eu doko asa.

¹⁹Go tea viri ega tape napau ni shiip natuna, tea veniana, go keke sikai waina leven e dika asa, m̃elu dua ki nala, go keke manivenive sikai waina leven e dika asa, go ega toropusi ra euga toko nam̃elearu ni Nasarite wanogoe, edaku ki waina ega masi nalolu ni nap̃auna tapugoroana:

²⁰Go tea viri ega salesalea ki da naga euga vei navituaana salesaleakiana sikai narae ni Yehovah; e pei tea tapu agi tea viri, ega vilake nagorogoro salesaleakiana go namao sikosikoviana: go edaku ki tea wanogoe Nasarite wanogoe ega munu waine.

²¹Tea wanogoe e pei nawotaeana ni Nasarite waina ega mari navasasokiana, go ni naviriana ni navinaga aneana paki Yehovah, nalo ni namarimasalekiana aneana, masale ki tea waina e dum̃ana mariatae dape a umai: dapala navasasokiana aneana waina ega vasasoki a, e one asa one naga ega mari ega tapala nogoe, ega takiusi nawotaeana ni namarimasalekiana aneana.

²²Go Yehovah e pasa paki Moses, po naga,

²³P̃a vasa paki Aaron go paki natuna maga, po naga, Kuga vasa p̃ia ki Israel natuna maga ega tapala nea; kuga noa ki da naga.

²⁴Yehovah ega vasa p̃ia kigo, po pavaigoro ko.

²⁵Yehovah ega mari naraena ega maramalaga paki‐go, po saup̃ia kigo.

²⁶Yehovah ega sike naraena pakigo, po dua ko natam̃ateana.

²⁷Ega tapala nogoe euga mari nagisagu ega toko Israel natuna maga, go ega wo pasa p̃ia ki da.