Read Nguna Togoa Etafe North NUMBERS 8 Bible Online

NUMBERS 8 - Nguna Togoa Etafe North bible

NUMBERS 8

¹Go Yehovah e pasa paki Moses, po naga,

²P̃a vasa paki Aaron, po noa ki nia, p̃a naga, Ragi waina p̃a sawa ki dokoni nasulu maga, nasulu larua euga maramalaga paki kivea ki narae ni nakau ni nasulu.

³Go Aaron e mari dapala nogoe; e sawa ki dokoni nasulu kakana maga, dapala waina euga maramalaga paki kivea ki narae ni nakau ni nasulu, dakiusi waina Yehovah e dip̃aki Moses asa.

⁴Go tea waia e pei nawosiana ni nakau ni nasulu, e pei nawosiana malo wono ni kold tautau; laketano kakana, go napum̃ana kakana maga, e pei nawosiana malo wono usuraki: pataka ni naleo‐dawona‐kiana waina Yehovah e pisei ki Moses asa, e mari nakau ni nasulu e dapala nogoe.

⁵Go Yehovah e pasa paki Moses, po naga,

⁶P̃a viragi lua naworawora ni Levi m̃elu m̃aleoputo ni Israel natuna maga, po mari ra euga tautau,

⁷Go p̃a mari ega tapala nea paki da naga p̃a mari ra euga tautau: p̃a meseura ki noai ni natap̃augoroana ara, go euga karo nap̃atokoda mamau, po sarue sugoro adeada maga, po dum̃ada mari ra euga tautau.

⁸Go euga tape kau natuna anoai sikai, go navituaana ni flaur kakana, flaur wia tea sarisariana pilake naroro, go p̃a tape kau natuna anoai mamau sikai naga ega vei navituaana sikai ni namarinaleosaana.

⁹Go p̃a viragi naworawora ni Levi euga umai paki kivea ki narae ni tap̃aup̃au ni nasaisaiana: go p̃a viragi saisai ki nasaisaiana mamau puti ni Israel natuna maga:

¹⁰Go p̃a viragi naworawora ni Levi euga umai paki narae ni Yehovah: go Israel natuna maga euga toropusi nam̃elearuda maga euga toko naworawora ni Levi:

¹¹Go Aaron ega vitua ki naworawora ni Levi narae ni Yehovah naga euga vei navituaana salesaleakiana sikai ki Israel natuna maga, naga euga mari nawosiana ni nasuasuaana ki Yehovah.

¹²Go naworawora ni Levi euga toropusi nam̃elearuda maga euga toko nap̃au ni kau natuna anoai maga wanogoe: go p̃a vitua ki sikai ega vei navituaana sikai ni namarinaleosaana, go kerua ega vei navituaana tap̃arakiana sikai paki Yehovah naga eroga magi naworawora ni Levi mari natap̃augoroana.

¹³Go p̃a lawo ki naworawora ni Levi euga tu narae ni Aaron, go narae ni natuna maga, po pitua ki da euga vei navituaana salesaleakiana sikai paki Yehovah.

¹⁴P̃a mari ega tapala nogoe po mari masale ki naworawora ni Levi m̃elu m̃aleoputo ni Israel natuna maga: go naworawora ni Levi euga wo pei tea aginau.

¹⁵Go edaku ki tea wanogoe naworawora ni Levi euga vaki ekopu naga euga mari nawosiana ni nasuasuaana ni tap̃aup̃au ni nasaisaiana: go p̃a mari ra euga tautau, po pitua ki da euga vei navituaana salesaleakiana sikai.

¹⁶Nalakena eu pei tea vituakiana paki nau m̃elu m̃aleoputo ni Israel natuna maga; a dum̃agu maginau dape ra oli tea takalapa maga mamau puti, tea takalapa maga ni Israel natuna maga.

¹⁷Nalakena takalapa maga ni Israel natuna maga eu mamau puti pei tea aginau, naatam̃oli go nalo tuavati: naaleatia waina a atugi puti ki tea takalapa maga navanua ni Ityipt, kinau a dum̃agu maginau dapugoro ra.

¹⁸Go a dape naworawora ni Levi m̃elu m̃aleoputo ni Israel natuna maga oli tea takalapa maga.

¹⁹Go e pitua ki naworawora ni Levi eu pei navituaana sikai paki Aaron go paki natuna maga m̃elu m̃aleoputo ni Israel natuna maga, naga euga mari nawosiana ni nasuasuaana ni Israel natuna maga ekopu ni tap̃aup̃au ni nasaisaiana, go naga euga magi Israel natuna maga mari natap̃augoroana: naga te nasasanaana sa ega ta atugi Israel natuna maga mau, ragi waina Israel natuna maga euga umai paki m̃aladigi ki tokora tapu.

²⁰Go Moses go Aaron go nasaisaiana mamau puti ni Israel natuna maga eu mari dapala nogoe paki naworawora ni Levi: pataka ni tea mamau puti waina Yehovah e dip̃aki Moses asa nalo ni naworawora ni Levi, Israel natuna maga eu mari dapala nogoe paki da.

²¹Go naworawora ni Levi eu dum̃ada mari dautau ki da pa dua ki namarinaleosaana, go eu sarue sugoro adeada maga; go Aaron e pitua ki da euga vei navituaana salesaleakiana sikai narae ni Yehovah, go Aaron e madeada mari natap̃augoroana naga ega mari ra euga tautau.

²²Go edaku ki tea wanogoe naworawora ni Levi eu paki ekopu ni tap̃aup̃au ni nasaisaiana naga euga mari nawosiana ni nasuasuaana narae ni Aaron, go narae ni natuna maga: dapala waina Yehovah e dip̃aki Moses asa nalo ni naworawora ni Levi, dapala nogoe eu mari a paki da.

²³Go Yehovah e pasa paki Moses, po naga,

²⁴Tea waia e pei tea ki naworawora ni Levi: tea maga waina eu pei tea ni natau rualima dua tamate lima go do liu, euga vaki ekopu ni tap̃aup̃au ni nasaisaiana naga euga mari nawosiana ni nasuasuaana asa:

²⁵Go ragi waina euga varaki natau rualima lima, euga makoto ki nawosiana ni nasuasuaana, po da moro suasua mau;

²⁶Ma euga suasua, nara ma taida maga, ekopu ni tap̃aup̃au ni nasaisaiana, naga euga vavaigoro natip̃akiana, go euga ta mari te nawosiana mau. P̃a mari ega tapala nogoe paki naworawora ni Levi nalo ni nawosiana adeada.