Read Nguna Togoa Etafe North NUMBERS 9 Bible Online

NUMBERS 9 - Nguna Togoa Etafe North bible

NUMBERS 9

¹Go Yehovah e pasa paki Moses masop̃alo ni Sinai, atelagi vea ni natau kerua edaku ki waina eu m̃elu dua ki navanua ni Ityipt umai, po naga,

²Israel natuna maga euga vavaigoro navakalauana ragi tatutakiana kakana.

³Nakup̃a kerualima sikai tamate pati ni atelagi wanogoe, ragi melu kakana, kuga vavaigoro e ragi tatutakiana kakana: pataka ni natawonakiana kakana maga mamau puti, go pataka ni navasap̃otaeana kakana maga mamau puti, kuga vavaigoro e.

⁴Go Moses e noa ki Israel natuna maga naga euga vavaigoro navakalauana.

⁵Go eu pavaigoro navakalauana atelagi vea, nakup̃a kerualima sikai tamate pati ni atelagi wanogoe, ragi melu kakana, doko masop̃alo ni Sinai: pataka ni tea mamau puti waina Yehovah e dip̃aki Moses asa, Israel natuna maga eu mari a.

⁶Go naatam̃oli seara eu doko, waina eu loa nalakena nap̃atoko mate sikai ni naatam̃oli, dapala waina eu mari sa pavaigoro navakalauana naaleatia wanogoe: go eu rumai paki narae ni Moses go narae ni Aaron naaleatia wanogoe:

⁷Go naatam̃oli maga wanogoe eu noa ki nia, eu naga, Kinami au loa nalakena nap̃atoko mate sikai ni naatam̃oli: go auga wo pei tea tip̃agoroana, naga auga ta pitua ki naviriana ni navinaga ki Yehovah ragi tatutakiana kakana m̃aleoputo ni Israel natuna maga, kite?

⁸Go Moses e noa ki da, e naga, Kuga tu dorogo, naga aga rogo tea waina Yehovah ega tip̃aki nau asa nalo kakana.

⁹Go Yehovah e noa ki Moses, e naga,

¹⁰P̃a noa ki Israel natuna maga, p̃a naga, Te naata sikai kakamu, kite kaka ni tagona animu maga, e pe loa nalakena nap̃atoko mate sikai, kite e pe vaki nasurataana varau sikai, ma e pe wo pavaigoro navakalauana paki Yehovah:

¹¹Atelagi kerua nakup̃a kerualima sikai tamate pati ragi melu kakana, euga vavaigoro e; euga kani a ega vilaki bred waina leven e dika asa go ega vilake naulu ni nakau kokona:

¹²Euga ta doropusi te seara kakana ega ta doko pa pa paki malip̃ogi mau, kite marip̃ori te navatuna sikai mau: pataka ni natawonakiana mamau puti ni navakalauana, euga vavaigoro e.

¹³Ma naata waina e dautau doko, go waina e da paki nasurataana sikai mau, go e da pavaigoro navakalauana mau, naata wanogoe ega vei tea taeluaana m̃elu dua ki narei aneana: nalakena e da pitua ki naviriana ni navinaga ki Yehovah ragi tatutakiana kakana, naatam̃oli wanogoe ega tapetape namarinaleosaana aneana.

¹⁴Go nam̃enaki sikai e pe m̃enaki atatoko m̃aleoputo kakamu, go e pe masauna naga ega vavaigoro navakalauana paki Yehovah; pataka ni natawonakiana ni navakalauana, go pataka ni navasap̃otaeana kakana, ega mari ega tapala nogoe: kuga veani natawonakiana sikai maau, agi nam̃enaki, go agi naatatoko.

¹⁵Go doko naaleatia waina nasum̃atokoana e pei tea sike‐lawo‐kiana, napopouru e kovagoro nasum̃atokoana, e kovagoro tap̃aup̃au ni nanoasokisokiana: go ragi melu e kovagoro nasum̃atokoana e dakiusi e pe vei nakapu, e doko pa pa paki malip̃ogi.

¹⁶Go e dapala nogoe sara ragi: napopouru e kovagoro e aleati, go e dakiusi e pe vei nakapu p̃ogi.

¹⁷Go ragi waina napopouru e pei tea tapeana sake m̃elu dua ki elagi ni Tap̃aup̃au, Israel natuna maga eu surata pano: go tokora waina napopouru e doko asa doko, tokora wanogoe Israel natuna maga eu m̃enaki asa.

¹⁸Ragi waina Yehovah e dip̃aki da asa, Israel natuna maga eu surata pano, go ragi waina Yehovah e dip̃aki da asa, eu m̃enaki doko: ragi waina napopouru e kovagoro nasum̃atokoana eu m̃enaki doko.

¹⁹Go ragi waina napopouru e kovagoro nasum̃atokoana doko naaleatia laapa, ragi wanogoe Israel natuna maga eu pavaigoro natip̃akiana ki Yehovah, po da paki nasurataana pano mau.

²⁰Go ragi seara napopouru e kovagoro nasum̃atokoana doko naaleatia seara; ragi wanogoe pataka ni natip̃akiana ki Yehovah, eu m̃enaki doko, go pataka ni natip̃akiana ki Yehovah eu surata pano.

²¹Go ragi seara napopouru e doko p̃ogi pa pa paki malip̃ogi; go ragi waina napopouru e pei tea tapeana sake malip̃ogi, eu surata pano: e pe vei aleati kite e pe vei p̃ogi, ragi waina napopouru e pei tea tapeana sake, eu surata pano.

²²E pe vei naaleatia dua, kite atelagi sikai, kite natau sikai, waina napopouru e doko kovagoro nasum̃atokoana doko, ma Israel natuna maga eu m̃enaki doko, po da surata mau: ma ragi waina e pei tea tapeana sake, eu surata.

²³Ragi waina Yehovah e dip̃aki da asa, eu maromaro, go ragi waina Yehovah e dip̃aki da asa, eu surata pano: eu pavaigoro natip̃akiana ki Yehovah, ragi waina Yehovah e dip̃aki da asa pae nam̃elearu ni Moses.