Read Nguna Togoa Etafe North MAIKA 1 Bible Online

MAIKA 1 - Nguna Togoa Etafe North bible

MAIKA 1

¹Navasaana ki Yehovah waina e umai paki Maika, naatam̃oli ni Moresheth, waina e punusi ra nalo ni Samaria go Yerusalem, doko naaleatia maga ki Yotham, Ahas, go Hesekiah, nawota maga ni Yudah.

²Kuga rogo, nimu narei maga O, tea mamau puti kakamu; p̃a taki dorogo, maramana O, go tea mamau puti waina eu doko asa doko: go Yehovah Sup̃e ega vei tea noasokisoki sikai dip̃a mu, Yehovah pae nasum̃a tapu aneana.

³Nalakena kuga leo, Yehovah e dave m̃elu dua ki tokora aneana, go ega wo siwo umai, po pasi tokora vakilagi maga ni maramana.

⁴Go tava maga euga wo sara etano ki nia, go nap̃aloa maga euga wo pei tea tap̃oraeana, dapala waks narae ni nakapu, dapala noai maga waina eu pei tea takiana siwo napatira sikai.

⁵Tea mamau puti wanogoe e pakilina nalakena natapiriana ki Yakob, go nalakena namarinaleosaana maga ki nasum̃a ni Israel. Natapiriana ki Yakob e pei nasava? E da pei Samaria mau, kite? Go tokora vakilagi maga ni Yudah eu pei nasava? Eu da pei Yerusalem mau, kite?

⁶Nalakena tea wanogoe aga wo mari Samaria ega vei taua ni tea makaka maga doko vanua, tokora sikai waina vaine maga euga vei tea lawoana asa: go aga wo sapura ki vatu kakana maga paki nap̃aloa, go aga wo mari laketano kakana maga euga wo dokolina.

⁷Go nasup̃e taeana kakana maga mamau puti euga wo pei tea marip̃oroworosiana, go namoriana kakana maga mamau puti euga wo pei tea tap̃arakiana ki nakapu, go idolo kakana maga mamau puti, aga wo mari p̃oraworae ra: nalakena ki navakotoviana ki tea masausara sikai e pila daua ki da, go paki navakotoviana ki tea masausara sikai euga wo moro liliu.

⁸Nalakena tea wanogoe aga wo lalagaarova po dagi, aga wo m̃alam̃ala pano doko dika nam̃elevasiana: aga wo mari nakuaana sikai dakiusi koria mila maga, go namuaana sikai dakiusi ostris maga.

⁹Nalakena wotu kakana maga eu mari sa apu: nalakena e po umai paki Yudah, e po pa parati ki namata‐pua ki narei aginau, Yerusalem nogo.

¹⁰Kuga ta noasai a Cath mau, kuga ta dagi mau: kuga tum̃amu malulua ki mu nam̃otam̃ota ni natano Beth‐le‐Afrah.

¹¹P̃a m̃elu pano, naatatoko ni Shafir O, namaliereana anigo ega toko lina: naatatoko ni Saanan e da dave umai mau; natagiana ni Beth‐esel ega wo pualua laketano kakana m̃elu dua ki‐go.

¹²Nalakena naatatoko ni Maroth e leogoro leogoro raki tea wia: nalakena tea sa e m̃elu Yehovah po siwo umai paki namata‐pua ni Yerusalem.

¹³P̃a solisoki kariot paki horse sava kasua, naatatoko ni Lakish O: e pei naatulakeana ni namarinaleosaana ki Sion natuna nagoroi; nalakena natapiriana maga ni Israel eu pei tea vap̃aiana doko ako.

¹⁴Nalakena tea wanogoe p̃a wo dua Moresheth‐cath navituaana sikai ni nadodomiana: nasum̃a maga ni Aksib euga wo pei naleo sikai ni namarisoreana paki nawota maga ni Israel.

¹⁵Aga wo moro piragi tea tape pavakoto sikai umai dip̃a ko, naatatoko ni Mareshah O: nasamasamaana ni Israel ega wo paki Adullam.

¹⁶P̃a tum̃am̃a mari ko nam̃asuaana, po alati kotovi nalolu ni nap̃aum̃a nalakena natum̃a maga waina ku maro ara: p̃a tum̃am̃a mari ko nam̃asuaana dapala ikila; nalakena eu m̃elu dua ki‐go pano paki naviragi‐lua‐pavakotoana.