Read Nguna Togoa Etafe North MAIKA 2 Bible Online

MAIKA 2 - Nguna Togoa Etafe North bible

MAIKA 2

¹Ai ki tea maga waina eu midoa ki p̃ai namarinaleotageleana go namarisakiana one naweweleda! Ragi ni namarama ni malip̃ogi, eu pakavuro e, nalakena nakasuaana ni nam̃elearuda.

²Eu matam̃agura ki vanua maga, po dape pavakoto ara; eu matam̃agura ki nasum̃a maga, po dape lua ra: eu diesoki naatam̃oli sikai go tea ni nasum̃a aneana, naatam̃oli sikai go tea veaniana aneana.

³Nalakena tea wanogoe Yehovah e noa dapala nea, e naga, P̃a leo, kinau a midoa ki p̃ai tea sa sikai dip̃a namatarau wanogoe, waina kuga wo da mariatae dosa liliua ki nanoamu pa dua ki nia mau, go kuga wo da surata lagilagi mau; nalakena ega wo pei ragi sa sikai.

⁴Doko naaleatia wanogoe tea sikai ega wo manimu dape dakati navasapinoaana sikai, po lalagaarova ki nalalagaarovaana warua, po naga, Tu po pei tea vuti‐lua‐pavakotoana: e mari matele ki narei aginau e panop̃ota: awi, e dape lua e kiagu! E dap̃otawotae vanua anigida maga dua tea vei p̃auluulu maga ara.

⁵Nalakena tea wanogoe tea waina ega wo manimu nadi ki natali ni gole doko nasaisaiana ki Yehovah, ega wo dika.

⁶Eu noa ki tea maga waina eu do peanoasai, eu naga, Kuga ta peanoasai tea tapalana maga mau; te navasapinoaana ega wo da pa parati ki gida mau.

⁷Ega wo pei tea noaana, nasum̃a ni Yakob O, naga Naata ni Yehovah e pei tea marikotoviana kite? Tea maga waia eu pei natomariana aneana maga, kite? Navasaana aginau maga eu da do mari tea wia paki naata waina e do surata leana, kite?

⁸Ma nimu ku po duleana dip̃a narei aginau dapala tea kokona sikai: ku duatilua sugoro kovagoro m̃elu dua ki tea matemate maga, m̃elu dua ki tea maga waina eu pae navakalo liliu umai waina eu surata navavatuana.

⁹Ku po kopasi lua nagoroi maga ki narei aginau m̃elu dua ki nasum̃a masauniana adeada maga; ku dape lua nasamasamaana aginau m̃elu dua ki piakirikiri kiki adeada maga pa pa po du mau du.

¹⁰Kuga tuleana, po m̃elu pano; nalakena tokora waia e da pei tokora ni namaromaroana mau: nalakena naloaana, kuga wo pei tea mari‐puoli‐kiana ki namarisakiana warua.

¹¹Naatam̃oli sikai e pe surata pasara, po lua ki nalagi m̃oli go nasorosoroana maga, doko do naga, Aga wo peanoasai paki‐go nalo ni waine go nalo ni namunuana kasua; nae e pe wo pei profeta ki narei waia.

¹²Aga wo piragi saisai ki puti mu, Yakob O, aga wo saisai ki namagovai ni Israel waina eu pei tea mautiana; aga wo lawo ki da euga saisai dakiusi shiip doko loga sikai: dakiusi navata sikai doko napega kakana; euga wo mari p̃arai p̃arua nalakena nalaapaana ni naatam̃oli.

¹³Tea mari‐p̃orae ega wo pea ki da sake pano: euga wo dave duap̃ora po surata liu pano paki namata‐pua, go euga wo dave pae asa, po pano: nawota adeada ega wo pea ki da, Yehovah ega wo pei nap̃auda.