Read Nguna Togoa Etafe North MAIKA 3 Bible Online

MAIKA 3 - Nguna Togoa Etafe North bible

MAIKA 3

¹Go a naga, Kuga rogo, a pavara ni mu asa, nimu nap̃au maga ni naatam̃oli maga ni Yakob, go nimu tea vakilagi maga ni nasum̃a ni Israel: e da pei tea animu naga kuga atae naleanaana mau, kite?

²Nimu waina ku pilosi tea waina e p̃ia, po dodomi tea waina e sa; waina ku mulusi lua nawilida m̃elu dua ki da, go nap̃okasida m̃elu dua ki navatuda maga;

³Waina ku gani nap̃okasi ni narei aginau, po soe nawilida m̃elu dua ki da, po mari p̃oraworae navatuda maga, po daekotokotovi ra dapala tea waina ega vei tea veniana, go dapala nap̃okasi doko lasa veni.

⁴Ragi ega wo umai go euga wo pioso paki Yehovah, ma nae ega wo da pasadara ra mau: ega wo dasuru ki naraena paki da ragi wanogoe, nalakena namariana sa adeada maga waina eu mari ra.

⁵Yehovah e noa dapala nea nalo ni profeta maga waina eu mari narei aginau eu sasap̃o; waina eu naga, Natam̃ateana; ragi waina eu peani navinaga, ma eu noasai navakalo dip̃a tea waina e da doropusi te navatuna paki nawokada mau; e naga,

⁶Nalakena tea wanogoe ega wo manimu pei p̃ogi, naga kuga wo dika ki navunusiana; go ega wo manimu pei namaligo, naga kuga wo da kikita mau; go elo ki profeta maga ega wo musu, go namaligoligo ega wo dap̃augoro ra aleati.

⁷Tea kikita maga euga wo maliere, go tea vasapua maga euga wo pinovinoi; euga wo mamau puti kovagoro nagoleda maga, nalakena navasadaraana pae Sup̃e e dika.

⁸Ma kinau a pura ki nakasuaana pae Naata ni Yehovah, go ki navasap̃otaeana, go ki namarimatuaana, naga aga noasai paki Yakob natapiriana aneana, go paki Israel namarinaleosaana aneana.

⁹Kuga rogo tea waia, a pavara ni mu asa, nimu nap̃au maga ni nasum̃a ni Yakob, go nimu tea vakilagi maga ni nasum̃a ni Israel, waina ku mamarago ki navasap̃otaeana, po puadoa naleanaana mamau.

¹⁰Eu davagi Sion ki nada, go Yerusalem ki namarinaleotageleana.

¹¹Nap̃au naatam̃oli kakana maga eu mari navasap̃otaeana raki ruku, go tea viri kakana maga eu pasa pisei ki raki namoriana, go profeta kakana maga eu kikita raki m̃ane: ma eu do ovi Yehovah, po naga, Yehovah e da doko m̃aleoputo kakagida, kite? Te nasaana ega wo da pakilina ki gida mau.

¹²Nalakena tea wanogoe Sion ega wo pei tea sisiana dapala vanua sikai nalakena nimu, go Yerusalem ega wo pei taua makaka sikai, go tava ni nasup̃e tapu dapala tokora vakilagi maga ni mala ni nakau.