Read Nguna Togoa Etafe North MAIKA 4 Bible Online

MAIKA 4 - Nguna Togoa Etafe North bible

MAIKA 4

¹Ma ega wo pakilina naaleatia edaku maga naga tava ni nasum̃a ki Yehovah ega wo pei tea lawoki‐laketoko‐ana nap̃au ni tava warua maga, go ega wo pei tea sikeana pakilagi liu tava sula maga; go narei maga euga wo sara paki asa.

²Go nalauna laapa euga wo pano, po naga, Kuga umai, go tuga sake paki tava ki Yehovah pano, go paki nasum̃a ki Sup̃e ki Yakob; go nae ega wo pasa pisei ki gida nalo ni namariana aneana maga, go tuga wo surata usi napua aneana maga: nalakena nawotaeana ega wo dave m̃elu Sion, go navasaana ki Yehovah ega wo dave m̃elu Yerusalem.

³Go ega wo pasap̃otae namawota ni narei laapa, go ega wo noap̃otae nalo ni nalauna kasua maga ni uvea; go euga wo duki lova adeada maga euga vei tea sisi natano, go naio adeada maga euga vei tea tagau p̃asi pakasa ki nakau: nalauna ega wo da moro sai lua lova dip̃a nalauna mau, go euga wo da moro atae navakalo mau.

⁴Ma euga wo doko natano melu ni vaine adeada go melu ni napuliva adeada, sikasikai sarasara ra; go te naata ega wo da mari ra euga mataku mau: nalakena nawoka ni Yehovah ki taua maga e noa e.

⁵Nalakena nalauna maga mamau puti euga wo surata nagisa ni sup̃e adeada sikasikai sarasara ra, ma nigida tuga wo surata nagisa ni Yehovah Sup̃e anigida pa pa ega tu du po du mau du.

⁶Doko naaleatia wanogoe, Yehovah e noa e, kinau aga wo piragi saisai ki tea vei pito, go aga wo piragi liliua ki tea kopasiluaana go tea waina a mari a narogokitesaana;

⁷Go aga wo mari tea vei pito ega vei namagovai ni tea mautiana, go tea kopasiluaana ega vei nalauna kasua sikai: go Yehovah ega wo maramara dap̃au ra tava Sion pa pa ega tu du po du mau du.

⁸Go ega wo umai paki‐go, nigo nasum̃a varau pakilagi ki navata O, tava ki Sion natuna nagoroi; navei‐nawotaana vea ega wo umai, namarakiana ki Yerusalem natuna nagoroi.

⁹Go ekasana ku do pioso kasua? Nawota e dika kiam̃a, tea vusum̃aki kakam̃a e pano puoli, naga navitinuana maga eu puasoki ko, dapala tea ni nagoroi visola sikai, kite?

¹⁰P̃a vitivitinu, po p̃osiwosi naga p̃a visola, Sion natuna nagoroi O, dakiusi nagoroi sikai waina e pitinu naga ega visola: nalakena ragi waia p̃a wo dave m̃elu dua ki natokoana go p̃a wo doko vanua doko, go p̃a wo paki Babelon; tokora wanogoe p̃a wo pei tea vualuaana asa; tokora wanogoe Yehovah ega wo daulua ko m̃elu dua ki nam̃elearu ni tea kokona ki‐go maga.

¹¹Go doko ragi waia nalauna laapa eu pei tea saisaikiana dip̃a ko, waina eu naga, Ega wo pei tea marisakiana, go namatagida ega vunusi nasikosikoana paki Sion.

¹²Ma eu da atae namidodoana maga ki Yehovah mau, kite midoa ki atae namidoaki‐p̃otae‐ana aneana mau: nalakena e pilavilae ra dapala napu maga paki malo wokalesue.

¹³P̃a tuleana, po p̃okalesue, Sion natuna nagoroi O: nalakena aga wo mari napati ni nap̃aum̃a ega vei airon, go aga wo mari natap̃alakisi maga ni nam̃elem̃a maga euga vei brass: go p̃a wo duki p̃oroworosi narei laapa: go p̃a wo dapugoro nataluaana adeada paki Yehovah, go naloriki adeada maga paki Yehovah ki maramana mamau.