Read Nguna Togoa Etafe North HABAKUK 1 Bible Online

HABAKUK 1 - Nguna Togoa Etafe North bible

HABAKUK 1

¹Naveanoasaiana waina profeta Habakuk e punusi a.

²Yehovah O, aga vioso pa pa paki seve ragi, ma nigo ku da dogo mau? A kuapioso paki‐go nalakena namaripavakotoana, ma ku da mauti mau.

³Ekasana ku do pisei ki nau namarinaleotageleana, po mari au naga a do leo punusi namarisakiana? Nalakena navutiluaana go namaripavakotoana ero doko naraegu: go tea maga wanogoe namariputuakiana go navululuana ero pakilina.

⁴Nalakena tea wanogoe nawotaeana e manainai, go navasap̃otaeana e da dave pano mau: nalakena tea sigisigileo eu dalivirigoro tea leana; nalakena tea wanogoe navasap̃otaeana e do pei tea welukidoaana.

⁵Kuga leo, tea midoaki p̃alo maga, po leo punusi, po maga p̃arua: nalakena kinau a p̃osiwosi ki nawosiana sikai doko naaleatia animu maga, nawosiana sikai waina te naata e pe rogorogo ki nia paki mu, ma ku pe wo da saralomau asa mau.

⁶Nalakena kuga leo, a pugoni tea ni Kaldea maga, nalauna kokona go m̃araverave; waina euga surata duaduru naweleweleana ni navanua naga euga veani tokora tokoana maga waina eu da pei tea adeada maga mau.

⁷Nara eu pei tea mataukiana, go tea matakilakila maga: navasap̃otaeana adeada go navakilagi‐liu‐ana adeada ero dave pae ara umai.

⁸Horse adeada maga ma eu sava kasua liu leopard maga, go eu pei tea vivikati liu wulf maga ni ragi melu; tea sakesaake horse adeada maga eu sava kasua ki namarilagilagiana: io, tea sakesaake horse adeada maga eu pae uvea umai; eu do diri dapala ikila waina e do mari m̃araverave naga ega kanikani.

⁹Eu mamau puti umai raki namaripavakotoana; namatauki‐da‐ana e do pea ki da; go eu do daua ki tea viragi‐lua‐pavakotoana maga dapala naworaone.

¹⁰Go eu do mari saudoa ki nawota maga, po do midoakidao tea maraki maga: eu do muru ki saudoa ki sara p̃aaka kasua maga; nalakena eu do daua ki natano po puati a pano.

¹¹Ragi wanogoe euga wo sui daka dapala nalagi, po do pano, naatam̃oli maga ni sogi: waina nakasuaana adeada e pei sup̃e adeada.

¹²Nigo Yehovah Sup̃e aginau O, Tea Tapu aginau, ku da doko pae ragi vea mau kite? Auga wo da mate mau. Yehovah O, ku dawona ki da eu pei navasap̃otaeana; go nigo, Vatu Laketoko O, ku lawosoki ra raki navaratipisei‐kiana.

¹³Nigo namatam̃a maga ero dautau liu naga p̃a ta punusi tea waina e sa, go ku karai punusi tea waina e dagele, ekasana ku suasua leo punusi tea maga waina eu do mari malauweluki, po do punuta doko ragi waina tea sigisigileo e do dinomi naatam̃oli waina e leana liu sa?

¹⁴Po do mari naatam̃oli maga eu dapala naika maga ni natasi, dapala nalo kakaravi maga, waina eu da peani tea maramara dap̃au ra mau?

¹⁵E do puati tea mamau puti kakada ki tagau, e do puati ra ki kup̃ena aneana, e do piragi saisai ki da ki kukuti aneana: go nalakena tea wanogoe e do laelaea, po do sokamidi.

¹⁶Nalakena tea wanogoe e do mari naviriana paki kup̃ena aneana, po do dap̃ara ki tea ni nap̃o wia paki kukuti aneana; nalakena pae ara naveaniana aneana e m̃anopunopu, go tea kaniana aneana e p̃arua.

¹⁷Nalakena tea wanogoe ega wo sila ki kup̃ena aneana, po mari punuvunue nalauna maga pitip̃atip̃a, kite?