Read Nguna Togoa Etafe North HABAKUK 2 Bible Online

HABAKUK 2 - Nguna Togoa Etafe North bible

HABAKUK 2

¹Aga wo lawodu tokora ni navavaigoroana aginau, po dum̃agu lawo ki nau tokora vakilagi, go aga wo leogoro naga aga vunusi tea waina nae ega wo noa ki nau asa, go aga wo pasadara nasava nalo ni narogokitesaana aginau.

²Go Yehovah e pasadara au, po naga, P̃a midiri navunusiana, po mari leana ki nia ega toko tea welewelea maga, naga tea waina e do sava e mariatae peve a.

³Nalakena navunusiana e ko doko raki ragi datutakiana, go e mari m̃araverave naga ega nopu, go ega wo da sorosoro mau: ma e pe mari daliali, p̃a ko doko raki nia; nalakena ega wo umai lomau, ega wo da mari daliali mau.

⁴P̃a leo, nap̃op̃ona e pakilagi, e da leana doko asa mau: ma tea leana ega wo mauri pae nasaralomau aneana.

⁵Go nasogolapaana e pei tea viragi‐sasap̃o. P̃a leo naatam̃oli sikai waina e do masau p̃arua ki navei‐nawota‐ana go e marisa maromaro mau. E do mari namasauana aneana e p̃elewelea dapala Sheol, go e dapala namateana, e da puka mau, ma e do dum̃ana maneana piragi saisai ki nalauna maga mamau puti, go e do dum̃ana maneana sara daua ki narei mamau puti.

⁶Tea maga mamau puti wanogoe euga wo da pasa maluluaki navasaana dip̃a e, po pasa saudoa ki nia, kite? Doko po naga, Ai ki naata waina e do daua ki tea waina e da pei tea aneana mau! Pa pa paki seve ragi? Go waina e do dum̃ana dape natapetapeana madaga ni nanadisokiana maga!

⁷Tea maga waina euga wo kati ko euga ta m̃araverave duleana, go tea maga waina euga wo durua ki‐go euga wo da leleo mau kite? Go nigo p̃a wo pei tea tapepavakotoana adeada maga.

⁸Nalakena nigo ku puapavakoto ki nalauna laapa, namagovai mamau ni narei maga waina eu ko doko euga wo puapavakoto ki‐go; nalakena nada ni naatam̃oli, go nalakena namaripavakotoana waina e pei tea mariana paki navanua, go paki natokoana, go paki tea maga mamau puti waina eu doko asa doko.

⁹Ai ki naata waina e dape nataluaana sa paki nasum̃a aneana, naga ega toro vete aneana ega toko elagi, naga ega vei tea mautiana pa dua ki nam̃elearu ni tea waina e sa!

¹⁰Nigo ku midoakip̃ai namaliereana paki nasum̃a anigo, waina ku daelua narei laapa, go ku mari tea sa dip̃a naatam̃a.

¹¹Nalakena vatu ega wo kuapioso m̃elu p̃aaka, go tea walagoto m̃elu napapa ega wo pasadara e.

¹²Ai ki naata waina e do davagi natokoana sikai pilake nada, po do lawosoki natokoana warua sikai pae namarinaleotageleana!

¹³Kuga leo, e da pei tea ki Yehovah ki taua maga mau naga narei maga eu do p̃osiwosi raki nakapu, go nalauna maga eu do dum̃ada mari ra eu mawosa m̃oli raki tea p̃alo, kite?

¹⁴Nalakena maramana ega vei tea vakavuroana ki naataeana ni nasamasamaana ki Yehovah, dapala waina noai maga eu kovagoro natasi.

¹⁵Ai ki naata waina e dua tea ni m̃aladigi ki nia maga namunuana, po sokari a ki tea kokona aneana, po mari ra eu matamaloku, naga ega vunusi nam̃alam̃alaana adeada!

¹⁶Nigo ku pei tea vakavuroana ki namaliereana oli nasamasamaana: nigo ma p̃a munu, po pei tea tapala naata waina e da pei tea tovadaviviana mau: lasa ni nam̃elearu ni matua ni Yehovah, ega wo moro liliu paki‐go, go namaliereana sa ega wo doko nasamasamaana anigo.

¹⁷Nalakena namaripavakotoana waina e pei tea mariana paki Lebanon ega wo kovagoro ko, go namarisakiana ni nalo mauri maga, waina e mari ra eu mataku; nalakena nada ni naatam̃oli, go nalakena namaripavakotoana paki navanua, go paki natokoana, go paki tea mamau puti waina eu doko asa doko.

¹⁸Ega kasa ki nasup̃e taeana, naga tea wosiwosi kakana e p̃osiwosi asa; go nasup̃e takiana, go tea vasapiseiki nasorosoroana maga, naga tea wosiwosi ki nawosiana aneana e do pavatu asa, naga ega mari nasup̃e pusa maga?

¹⁹Ai ki naata waina e noa ki nakau, e naga, P̃a tarapa; go ki vatu pusa, P̃a tuleana! Tea waia ega wo pasa pisei ki, kite? P̃a leo, e pei tea vulutigoroana ki kold go silver, ma namerona e da doko asa mau.

²⁰Ma Yehovah e doko nasum̃a tapu aneana: maramana mamau ega vunuta naraena.