Read Nguna Togoa Etafe North HABAKUK 3 Bible Online

HABAKUK 3 - Nguna Togoa Etafe North bible

HABAKUK 3

¹Natapasavasaana sikai ki profeta Habakuk, tea ni Sikionoth.

²Yehovah O, a po dogo narogorogoana nalo kakam̃a, Go a mataku: Yehovah O, p̃a vakamauri ki nawosiana anigo, Doko m̃aleoputo ni natau maga, Doko m̃aleoputo ni natau maga, Pa mari a ega vei tea ataeana; Ragi ni namaetoana, Pa midoaki parati ki namaritadodomiana.

³Sup̃e e pae Teman umai, Go Tea Tapu Mau e pae tava Paran. Selah. Nasamasamaniana aneana e kovagoro nakoroatelagi maga, Go maramana e pura ki nasamasamaana aneana.

⁴Go namaramalagaana kakana e laga dapala namarama; E peani namearana maga eu dawarawara pae nam̃elearuna: Go tokora wanogoe nakasuaana aneana, E sili doko asa doko.

⁵Nasasanaana sa e pea ki nia pano, Go nam̃elevara vavaga maga eu dave pae natuana pano.

⁶E lawodu, po dowogi maramana; E leo punusi, po digo lua nalauna maga: Go tava toko mau maga, Eu pei tea taperaverakiana, Tava sula doko mau doko maga eu kolo pakitano; Napua aneana maga eu doko pae ragi vea mau.

⁷A punusi tap̃aup̃au maga ni Kushan eu dogokitesa p̃arua: Tea taugoro‐p̃otae maga ni navanua ni Midian eu duruuru.

⁸Namaritausuana anigo e dip̃a noaisara maga, Yehovah O, kite? Namaetoana anigo e dip̃a noaisara maga, Kite namaritausuana anigo e dip̃a natasi, Waina ku sakesaake horse anigo maga, Doko kariot anigo maga ni namautipauriana?

⁹Ku sawo lua nala m̃elu dua ki naasu anigo; Navivisaana maga paki naworawora maga eu pei navasaana lomau. Selah. Ku dasasai navanua ki noaisara maga.

¹⁰Tava warua maga eu punusi ko, po duruuru; Noai maga eu lelep̃esi po sara peravera pano: Malo vakipua e pitua ki nadaleona, Po sike nam̃elearuna maga pakilagi.

¹¹Elo go atelagi ero du dorogo tokora tokoana adeada; Nalakena namarama ni natip̃a anigo maga, Go namarama ni naio anigo waina e do laga.

¹²Ku surata duaduru navanua doko namaritausuana. Ku atugi nalauna maga ki namaetoana.

¹³Ku m̃elu pano raki namautipauriana ni narei anigo, Raki namautipauriana ni tea vuvuraikiana anigo; Ku atugi nap̃au ni nasum̃a ki tea sigisigileo, Po mari pakasa ki laketano kakana e doko lina. Selah.

¹⁴Ku puri sai nap̃au ni m̃aau aneana maga, Ki tiko aneana maga: Eu rumai dakiusi suitaviro sikai, Naga euga sui daperavera ki nau: Nalaelaeaana adeada e dapala Euga tae dinomi panako ki tea tika.

¹⁵Ku surata duaduru natasi pilake horse anigo maga, Noai warua maga eu do lotalota.

¹⁶A dogo, go namaritagu e duruuru, Nagolegu maga ero parivari nalakena nadaleo; Namadadaana e sili paki navatugu maga, Go a duruuru doko tokora aginau: Naga aga tam̃ate doko raki naaleatia ni narogokitesaana, Waina ega va parati ki tea kokona ki gami maga.

¹⁷Napuliva ega wo da pum̃a mau, Go vaine ega wo da dau mau; Nawosiwosiana ni oliva ega wo pei tea m̃oli, Go vanua maga euga wo da pitua ki navinaga mau; Navata ni shiip ega wo pei tea taeluaana pa dua ki loga; Go navata ni katel ega wo da doko kelu maga mau:

¹⁸Ma aga wo laelaea doko Yehovah, Aga wo sokamidi doko Sup̃e ni namautipauri‐au‐ana.

¹⁹Yehovah Sup̃e e pei nakasuaana aginau, Go e mari nam̃ele natuagu ero dapala, Nam̃ele natua ni diir goroi, Go ega wo mari au aga surata Tokora vakilagi aginau maga. Agi nap̃au ni tea vua roroaleo maga, Pilake nagalo maga ni roroaleo.