Read Nguna Togoa Etafe North SEFANIAH 1 Bible Online

SEFANIAH 1 - Nguna Togoa Etafe North bible

SEFANIAH 1

¹Navasaana ki Yehovah waina e umai pakilina ki Sefaniah, natu ni Kushi, natu ni Cedaliah, natu ni Amariah, natu ni Hesekiah, doko naaleatia maga ki Yosiah, natu ni Amon, nawota ni Yudah.

²Kinau aga wo mari puoli ki naleo maga mamau puti m̃elu dua ki navanua, Yehovah e noa e.

³Aga wo mari puoli ki naatam̃oli go nalo mauri; aga wo mari puoli ki manu maga ni namalopa, go naika maga ni natasi, go tea tapilagonaana maga pilake tea sigisigileo; go aga wo daelua naatam̃oli m̃elu dua ki navanua, Yehovah e noa e.

⁴Go aga wo sai ki nam̃elearugu dip̃a Yudah, go dip̃a naatatoko maga mamau puti ni Yerusalem; go aga wo daelua namagovai ni Baal m̃elu dua ki tokora waia, go nagisa ni tea viri maga waina eu do lotu ki nasup̃e maga;

⁵Go tea maga waina eu do lotu ki taua ni nakoroatelagi, doko nam̃asua ni nasum̃a maga; go tea maga waina eu do lotu, po do pivisa paki Yehovah, ma eu do pivisa pae nagisa ni Malkam;

⁶Go tea maga waina eu maradoa liliu m̃elu dua ki Yehovah; go tea maga waina eu da laaga Yehovah mau, kite pusuusu ki nia mau.

⁷P̃a vunuta doko narae ni Yehovah Sup̃e: nalakena naaleatia ki Yehovah e pei m̃aladigi: Yehovah e po mari m̃ata ki naviriana sikai, e po dapugoro tea vitautauana aneana maga.

⁸Go ega wo pakilina doko naaleatia ni naviriana ki Yehovah, naga aga wo parati tea maraki maga, go nawota natuna naanoai maga, go tea maga mamau puti waina eu suni tea suniana ni navanua p̃ota.

⁹Go naaleatia sikai maau wanogoe aga wo parati tea maga mamau puti waina eu dam̃alua kalau nakau tuasila ni namata, waina eu do pakavuro nasum̃a ki tea maraki adeada ki namaripavakotoana go namarisoreana.

¹⁰Go ega wo pakilina naaleatia wanogoe, Yehovah e noa e, namarip̃araiana ni nakuapiosoana sikai ega wo pei tea rogoana pae namatapua ni naika, go nalalagaarovaana sikai pae taleva kerua, go natukitukiana warua sikai pae tava maga.

¹¹Kuga lalagaarova, nimu naatatoko maga ni Maktesh, nalakena tea sosori maga eu da moro doko mau: tea maga mamau puti waina eu do dowogi silver eu pei tea taeluaana.

¹²Go ega wo pakilina ragi sikai maau wanogoe, naga aga wo puati nasulu maga po leousiusi Yerusalem; go aga wo parati naatam̃oli maga waina eu doko m̃oli doko, waina eu do noa doko nap̃op̃oda, Yehovah ega wo da mari tea waina e p̃ia, kite tea waina e sa mau.

¹³Go naloriki adeada maga euga wo pei natapepavakotoana sikai, go nasum̃a adeada maga euga wo pei maso maladi sikai: io, euga wo davagi nasum̃a maga, ma euga wo da doko ara mau; go euga wo lawo roara ni vaine maga, ma euga wo da munu waine kakana mau.

¹⁴Naaleatia warua ki Yehovah e pei m̃aladigi, e pei m̃aladigi, go e do mari m̃araverave, nadaleo ni naaleatia ki Yehovah; naatam̃oli kasua ega wo kua ki nakuaana warua sa tokora wanogoe.

¹⁵Naaleatia wanogoe e pei naaleatia sikai ni namaritausuana, naaleatia sikai ni nariesokiana go narogokitesaana, naaleatia sikai ni namarisakiana go navei‐maso‐maladiana, naaleatia sikai ni namaligo go namaligoligo, naaleatia sikai ni napopouru maga, go namaligo madaga.

¹⁶Naaleatia sikai ni paiga go ni naviosoana ni navakalo, dip̃a natokoana ni p̃aaka maga, go dip̃a tokora vakilagi maga.

¹⁷Go aga wo mari narogokitesaana ega wo doko naatam̃oli maga, naga euga wo surata dakiusi naatam̃oli kesa maga, nalakena eu po mari naleo sa dip̃a Yehovah; go nadada ega wo pei tea takiana pano dapala nam̃otam̃ota, go nap̃okasida dapala natap̃ata.

¹⁸Silver adeada go kold adeada euga wo da mariatae mauti ra mau, doko naaleatia ni namaritausuana ki Yehovah; ma nakapu ni natotowokasua‐ana aneana ega wo gani puoli ki navanua mamau: nalakena nae ega wo mari sa sa ki tea maga mamau puti waina eu doko navanua.