Read Nguna Togoa Etafe North HAKAI 2 Bible Online

HAKAI 2 - Nguna Togoa Etafe North bible

HAKAI 2

¹Doko atelagi kelarua, nakup̃a kerualima dua tamate sikai kakana, navasaana ki Yehovah e pae nawoka ni profeta Hakai umai, po naga, P̃a vasa paki Serubabel,

²natu ni Shealtiel, tea maramara ni Yudah, go paki Yoshua, natu ni Yehosadak, tea viri warua liu, go paki tea ni tea viragi‐lua‐pavakotoana maga waina eu pei tea viragi‐liliua‐kiana, po naga,

³Naatam̃oli sei e doko m̃aleoputo kakamu waina e punusi nasamasamaana vea ni nasum̃a waia? Go ku punusi a e dapale sava ragi waia? E da pei tea midoakiana namatamu maga naga e pei tea m̃oli mau, kite?

⁴Ma p̃a kasua, Serubabel O, Yehovah e noa e; go p̃a kasua, Yoshua O natu ni Yehosadak, tea viri warua liu; go kuga kasua nimu narei maga mamau puti ni navanua, Yehovah e noa e, go kuga wosiwosi: nalakena kinau a sikoti mu doko, Yehovah ki taua maga e noa e,

⁵Pataka ni navasasokiana waina a mari a paki mu, ragi waina ku m̃elu dua ki Ityipt umai, go naatagu e doko m̃aleoputo kakamu doko: kuga ta mataku mau.

⁶Nalakena Yehovah ki taua maga e noa dapala nea, e naga, Ragi kiki waia aga wo moro paka sikai durua ki nakoroatelagi maga, go maramana, go natasi, go natano garagara;

⁷Go aga wo durua ki nalauna maga mamau puti, go tea masauniana maga ni nalauna maga mamau puti euga wo umai, go aga wo pakavuro nasum̃a waia ki nasamasamaana, Yehovah ki taua maga e noa e.

⁸Silver e pei aginau, go kold a pei aginau, Yehovah ki taua maga e noa e.

⁹Nasamasamaana ni nasum̃a waia ragi edaku ega wo p̃arua liu tea ni ragi vea, Yehovah ki taua maga e noa e: go doko tokora waia kinau aga wo pitua ki natam̃ateana asa, Yehovah ki taua maga e noa e.

¹⁰Doko nakup̃a kerualima dua tamate pati ni atelagi keloveti, doko natau kerua ki Darius, navasaana ki Yehovah e pae nawoka ni profeta Hakai umai, po naga,

¹¹Yehovah ki taua maga e noa dapala nea, e naga, Kuga vusuusu ki tea viri maga nalo ni nawotaeana, kuga naga,

¹²Naata sikai e pe tape nap̃okasi tapugoroana e pe toko natua ni sugoro kovagoro aneana, go natua ni sugoro kovagoro aneana e pe kisidogo bred, kite tea veniana, kite waine, kite naroro, kite te nap̃okasi, tea wanogoe e pe wo pei tea vaka‐taputapu‐kiana asa, kite? Go tea viri maga eu pasadara, po naga, Ee.

¹³Go Hakai e naga, Naata sikai waina e pe loa nalakena nap̃atoko mate sikai, e pe kisidogo tea maga wanogoe sikai kakada, e pe wo pei tea mariana e pe wo loa asa, kite? Go tea viri maga eu pasadara, po naga, Ega wo loa.

¹⁴Go Hakai e pasadara, po naga, Dapala nogoe narei waia, go dapala nogoe nalauna waia doko namatagu, Yehovah e noa e; go dapala nogoe sara nawosiana ni nam̃elearuda maga; go tea waina eu pitua ki nia tokora wanogoe, nae ma e loa.

¹⁵Ma kuga midoakiusiusi tea waia, a pavara ni mu asa, pae naaleatia waia go pa pa pa. Ragi waina vatu sikai e ko da pei tea toropusiana elagi ni vatu sikai nasum̃a tapu ki Yehovah, namauriana animu e dapale sava?

¹⁶Doko ragi maga wanogoe, ragi waina tea sikai e pa punusi taua sikai ni totowo rualima dua, ma totowo rualima sikai maau e doko; ragi waina tea sikai e pa punusi m̃oru ni waine naga ega vautu totowo ni lasa rualima lima, ma totowo ni lasa rualima dua maau e doko.

¹⁷Kinau a atugi mu go nawosiana mamau puti ni nam̃elearumu maga ki namakukuana go ki navusivusigaana, go ki usa ni vatu; ma ku da maradoa liliu paki nau mau, Yehovah e noa e.

¹⁸Kuga midoakiusiusi nalo ni naaleatia maga waina euga wo umai, a pavara ni mu asa, pae naaleatia rualima dua tamate kevati ni atelagi keloveti, pae naaleatia waina laketano ni nasum̃a tapu ki Yehovah e pei tea nadikiana; kuga midoakiusiusi a.

¹⁹Mase napati ni korn e pe wo do puoli nasum̃a ni korn, go vaine, go nakau napuliva, go pomekranet, go nakau oliva eu pe wo do mauti nawada, kite? Pae naaleatia waia go pa pa pa kinau aga wo pasap̃ia ki mu.

²⁰Go doko naaleatia rualima dua tamate pati ni atelagi, navasaana ki Yehovah e umai paki Hakai sala kerua, po naga,

²¹P̃a vasa paki Serubabel, tea maramara ni Yudah, po naga, Kinau aga wo durua ki nakoroatelagi maga go maramana:

²²Go aga wo dap̃olosiwo ki malo tasake ni namarakiana maga, go aga wo mari puoli ki nakasuaana ni namarakiana maga ni nalauna maga; go aga wo dap̃olosiwo ki kariot maga, go ki tea maga waina eu sakesaake ara; go horse maga go tea sakesaake ara maga euga wo dowo, sara naata ki lova ki taina.

²³Doko naaleatia wanogoe, Yehovah ki taua maga e noa e, kinau aga wo piragi lua ko, Serubabel tea suasua aginau O, natu ni Shealtiel, Yehovah e noa e, go aga wo mari ko p̃a wo dapala tea vulusoki sikai: nalakena kinau a matadoa ko, Yehovah ki taua maga e noa e.