Read Nguna Togoa Etafe North SEKARIAH 10 Bible Online

SEKARIAH 10 - Nguna Togoa Etafe North bible

SEKARIAH 10

¹Kuga tatagovi Yehovah ki usa, ragi ni usa edaku, Yehovah waina e do mari navila; go ega wo dua ra usa walapa, go sara naata euga veani nam̃enau vanua adeada.

²Nalakena terafim e pasa p̃alo, go tea kikita maga eu punusi namarisoreana; go eu noasai nap̃erea sorosoro maga, eu pakavakae m̃oli: nalakena tea wanogoe eu surata pasara dakiusi shiip, eu dogokitesa nalakena tea leo parati ki da e dika.

³Namaetoana aginau e pavaga dip̃a tea leo parati ki shiip maga, go aga wo parati tea maraki maga: nalakena Yehovah ki taua maga e pa punusi navata aneana, tea ni nasum̃a ni Yudah, go ega wo mari ra euga takiusi horse wia aneana doko navakalo.

⁴Vatu ni naweluki ega wo m̃elu pae asa, go pin ni tap̃aup̃au, go naasu ni navakalo, go sara tea maraki.

⁵Go euga wo dakiusi naatam̃oli kasua maga doko navakalo, euga wo pasi tea kokona ki da maga nalepa ni napua maga; go euga wo marimari nalakena Yehovah e sikoti ra doko: go nap̃op̃o ni tea sakesaake horse maga euga wo pinovinoi.

⁶Go aga wo mari nasum̃a ni Yudah ega kasua, go aga wo mauti nasum̃a ki Yosef, go aga wo piragi ra liliu umai, nalakena a dodomi ra; go euga wo doko dapala a pe ta dip̃a doa ra mau: nalakena kinau a pei Yehovah Sup̃e adeada, go aga wo dogo ra.

⁷Go tea ni Efraim euga wo dakiusi naatam̃oli kasua sikai, go nap̃op̃oda ega wo laelaea ega tapala waina waine e pei nalakena: io, natuda maga euga wo punusi a, po laelaea; nap̃op̃oda ega wo samasama ni Yehovah.

⁸Aga wo saveu ki da po piragi ra umai, nalakena a po daulua ra: go euga wo moro disu po laapa dapala sala vea.

⁹Go aga wo sapura ki da usuraki narei maga; go tea ni navanua ni uvea euga wo midoaki parati ki nau: nara ma natuda maga euga wo mamau doko po liliu umai.

¹⁰Go aga wo moro piragi liliua ki da m̃elu dua ki navanua ni Ityipt umai, po piragi saisai ki da m̃elu dua ki Assiria; go aga wo piragi ra umai paki navanua ni Cilead go ni Lebanon; pa pa namalopa adeada ega wo dika.

¹¹Go ega wo surata duaduru natasi ni Ityipt, po atugi napeao maga ni natasi, go epua maga mamau puti ni noaisara Naile euga wo dap̃a: go nap̃op̃ovakilagiana ni Assiria ega wo pei tea mariana ega vakitano, go tiko ni naveinawotaana ni Ityipt ega wo pano puoli.

¹²Go aga wo mari ra euga wo kasua doko Yehovah; go euga wo surata pasara doko nagisana, Yehovah e noa e.