Read Nguna Togoa Etafe North SEKARIAH 11 Bible Online

SEKARIAH 11 - Nguna Togoa Etafe North bible

SEKARIAH 11

¹P̃a wolagati namata‐pua anigo maga, Lebanon O, naga nakapu ega kani nakau sidar anigo maga.

²P̃a lalagaarova, nigo nakau paine O, nalakena sidar e dowo, nalakena tea wia maga eu pei tea marisakiana: kuga lalagaarova, nimu oak maga ni Bashan O, nalakena mala ni nakau e dowo.

³Kuga rogo nadaleo ni nalalagaarovaana ki tea leo parati ki shiip! Nalakena nasamasamaana adeada e pei tea marisakiana: kuga rogo nadaleo ni laion vusavusa waina e do uru! Nalakena namalasi wono ni Yordan e pakitano.

⁴Yehovah Sup̃e aginau e noa dapala nea: Kuga vagani navata waina ega vei tea atugiana;

⁵Tea maga waina eu do pakotovi ra eu mari punue ra, go sogi e da liko ara mau; go tea maga waina eu do sori ra eu do naga, Yehovah ega vei tea vasam̃atakiana, nalakena a po pei sogolapa: go tea leo parati ki shiip adeada eu da dodomi ra mau.

⁶Nalakena aga wo da moro mari malemale ki naatatoko maga ni navanua waia mau, Yehovah e noa e: ma p̃a leo, aga wo pitua ki da, sara naata sikasikai, paki nam̃elearu ni tea ni m̃aladigi ki nia, go paki nam̃elearu ni nawota aneana: go nara euga wo atugi navanua, go aga wo da mauti ra m̃elu dua ki nam̃elearuda mau.

⁷Go tea wanogoe a pagani navata waina euga vei tea atugiana, tea rogokitesa maga ni navata. Go a maginau dape tiko edua; sikai a soso e ki Nasaup̃iaana, go kerua a soso e ki Naviragi‐saisai‐kiana; go a pagani navata.

⁸Go a daelua tea leo parati ki dolu atelagi sikai maau; nalakena naatagu e da moro pei tea maritasoki‐parau paki da mau, go naatada ma eu mamarago ki nau.

⁹Go a naga, Aga wo da pagani mu mau: tea waina ega mate, ega mate; go tea waina ega vei tea taeluaana, ega vei tea taeluaana; go tea maga waina euga vei tea toropusiana euga toko, euga tum̃ada gani nap̃okasida.

¹⁰Go a puati tiko aginau, Nasaup̃iaana, go a daekotokotovi a, naga aga marikotokotovi nanoasokisokiana aginau waina a mari a paki narei maga mamau puti.

¹¹Go e makoto naaleatia wanogoe: go dapala nogoe tea rogokitesa maga ni navata waina eu dogo parati ki nau, eu atae naga e pei navasaana ki Yehovah.

¹²Go a noa ki da, a naga, Waina ku pe midoaki nia naga e p̃ia, go kuga tua au namoriana aginau; go waina e pa ta p̃ia mau, ma tea m̃oli, ega toko. Go dapala nogoe eu dowogi matele ni silver shekel rualima dolu e pei namoriana aginau.

¹³Go Yehovah e noa ki nau, e naga, P̃a nadi ki nia paki nasum̃a ni natauakiana ni naleo wia maga, naulu warua aginau waina eu noap̃otae a naga e pei naulu kakagu. Go a dape matele ni silver shekel rualima dolu wanogoe, po nadi ki nia paki nasum̃a ni natauakiana ni naleo wia maga, doko nasum̃a ki Yehovah.

¹⁴Go a daekotokotovi tiko kerua aginau, waina nagisana e pei Naviragi‐saisaikiana, naga aga marikotokotovi naveitamataida‐ana waina e doko namawota ni Yudah go ni Israel.

¹⁵Go Yehovah e noa ki nau, e naga, P̃a moro dum̃am̃a dape naleo maga ki tea leo parati ki manumatavusa sikai.

¹⁶Nalakena p̃a leo, aga wo sike tea leo parati ki sikai navanua, waina ega wo da pa punusi tea taeluaana maga mau, kite laaga tea taperaverakiana maga mau, kite mari pauri tea atugiana maga mau; go ega wo da pagani tea tu dorogo mau, ma ega wo gani nap̃okasi ni tea m̃anopunopu maga, po puap̃oraworae natap̃alakisi maga ni nam̃eleda maga.

¹⁷Ai ki tea leo parati ki manumatavusa waina e sava dua ki navata! Lova ega atugi naruna, go namatana ni matua: naruna ega lologara, go namatana ni matua ega kesa.