Read Nguna Togoa Etafe North SEKARIAH 12 Bible Online

SEKARIAH 12 - Nguna Togoa Etafe North bible

SEKARIAH 12

¹Naveanoasaiana ni navasaana ki Yehovah nalo ni Israel. Yehovah waina e sai ki nakoroatelagi maga, po lawo ki laketoko ni maramana, po dawona ki naata ni naatam̃oli nap̃alauna, nae e noa dapala nea:

²P̃a leo, aga wo mari Yerusalem ega vei lasa ni natarataaraana ki narei maga mamau puti daliviri, go ki Yudah ragi ni nakelugoroana dip̃a Yerusalem.

³Go ega wo pakilina naaleatia wanogoe, naga aga wo mari Yerusalem ega vei vatu madaga sikai paki narei maga mamau puti; tea maga mamau puti waina eu dapetape a, euga wo pei tea marisakiana asa; go nalauna maga mamau puti ni maramana euga wo pei tea viragisaisai‐kiana dip̃a e.

⁴Doko naaleatia wanogoe, Yehovah e noa e, aga wo atugi sara horse ki namatakuana, go tea sakesaake maga ara ki naroropaana: go aga wo p̃olagati namatagu maga po leo paki nasum̃a ni Yudah, go aga wo atugi horse maga mamau puti ki narei maga ki nakesaana.

⁵Go nalauna maga ni Yudah euga wo noa nap̃op̃oda, Naatatoko maga ni Yerusalem eu pei nakasuaana aginau doko Yehovah ki taua maga, Sup̃e adeada.

⁶Naaleatia wanogoe aga wo mari nalauna maga ni Yudah euga takiusi pan ni nakapu vavaga m̃aleoputo ni nakau garagara, go dakiusi nasulu m̃aleoputo ni napu maga; go euga wo gani dinomi narei maga mamau puti daliviri, taleva ni matua go taleva ni mawiri: go Yerusalem ega wo moro liliu po doko naliana, Yerusalem ega toko naliana doko.

⁷Go Yehovah ega wo mauti tap̃aup̃au maga ni Yudah ega vea, naga nasamasamaana ni nasum̃a ki David, go nasamasamaana ni naatatoko maga ni Yerusalem ega ta pakilagi liu tea ni Yudah mau.

⁸Naaleatia wanogoe Yehovah ega wo kovagoro naatatoko maga ni Yerusalem; go tea waina e dapilagona m̃aleoputo kakada naaleatia wanogoe ega wo dakiusi David; go nasum̃a ki David ega wo dakiusi Sup̃e, dakiusi agelo ki Yehovah waina e pea ki da.

⁹Go ega wo pakilina naaleatia wanogoe naga aga wo laaga naga aga mari sa sa ki nalauna maga mamau puti waina eu rumai dip̃a Yerusalem.

¹⁰Go aga wo daki kovai naata ni nasaup̃iaana go ni navavaraniana paki nasum̃a ki David, go paki naatatoko maga ni Yerusalem; go euga wo leosoki tea waina eu lawo e: go euga wo dagisi a dakiusi naata sikai e dagisi natuna sikedau, go euga wo dogokitesa nalo kakana, dakiusi naata sikai e magi takalapa aneana dogokitesa.

¹¹Naaleatia wanogoe nasusueana warua ega wo doko Yerusalem, ega takiusi nasusueana ni Hadad Rimmon doko nap̃aloa ni Mekiddon.

¹²Go navanua ega wo susue, sara namatarau maga euga wo sikasikai; namatarau ni nasum̃a ki David ega toko mamau, go nagoroi adeada maga euga toko mamau; namatarau ni nasum̃a ki Nathan ega toko mamau, go nagoroi adeada maga euga toko mamau;

¹³Namatarau ni nasum̃a ki Levi ega toko mamau, go nagoroi adeada maga euga toko mamau; namatarau ni naworawora ni Shimei ega toko mamau, go nagoroi adeada maga euga toko mamau;

¹⁴Namatarau maga mamau puti waina eu ko doko, sara namatarau euga toko mamau, go nagoroi adeada maga euga toko mamau.