Read Nguna Togoa Etafe North SEKARIAH 14 Bible Online

SEKARIAH 14 - Nguna Togoa Etafe North bible

SEKARIAH 14

¹P̃a leo, naaleatia ki Yehovah ega wo umai, ragi waina tea vuti‐luapavakotoana anigo ega wo pei tea tap̃otawotaeana m̃aleoputo kakam̃a.

²Nalakena aga wo piragi saisai ki nalauna maga mamau puti naga euga mari navakalo dip̃a Yerusalem; go natokoana ega wo pei tea tapepavakotokiana, go nasum̃a maga euga wo pei tea kakamo‐lua‐ana, go nagoroi maga euga wo pei tea marisakiana: go namagovai ni natokoana ega vei tea viragi‐luapavakotoana, go namagovai waina e pei tea toropusiana ega toko, ega wo da pei tea taeluaana m̃elu dua ki natokoana mau.

³Ragi wanogoe Yehovah ega wo dave pano, po marimari dip̃a nalauna maga wanogoe, dakiusi naaleatia ni navakalo.

⁴Go naaleatia wanogoe nam̃elena eroga wo lawodu tava ni Oliva waina e doko kivea ki Yerusalem taleva ni elo sake, go tava ni Oliva ega wo dasasai m̃aleoputo kakana paki taleva ni elo sake go paki taleva ni elo musu, go nap̃aloa warua sikai ega wo doko; go namagovai sikai ni tava warua wanogoe ega wo sukasuka paki taleva ni elagi, go namagovai kerua paki taleva ni etano.

⁵Go nap̃aloa ni tava warua maga ega wo pei tea wogoroana; nalakena nap̃aloa ni tava warua maga ega wo liliu Asel: io, kuga wo sava pano, dapala waina ku sava pa dua ki naruru naaleatia maga ki Ussiah nawota ni Yudah: go Yehovah Sup̃e aginau ega wo umai, nara ma tea tapu maga mamau puti euga wo mamau.

⁶Go ega wo pakilina naaleatia wanogoe, naga namarama ega wo da pei namarama go namaligoligo mau:

⁷Ma ega wo pei naaleatia sikai waina Yehovah ega atae a; ega ta pei aleati, go ega ta pei p̃ogi: ma ega wo pakilina ragi melu mau naga namarama ega wo doko.

⁸Go ega wo pakilina naaleatia wanogoe naga noai mauri maga euga wo sara dave m̃elu dua ki Yerusalem pano; namagovai kakada ega vaki natasi taleva ni elo sake, go namagovai kakada ega vaki natasi taleva ni elo musu: ega wo doko sara ragi, ragi ni sui, go ragi ni namaladiana.

⁹Go Yehovah ega wo pei nawota dap̃au maramana mamau: naaleatia wanogoe Yehovah ega wo pei tea sikai maau, go nagisana ega wo pei tea sikai maau.

¹⁰Navanua mamau ega wo pei tea roaana ega vei malo matemate sikai dakiusi Arabah, pae Ceba pa pa paki Rimmon, taleva ni etano ni Yerusalem; go ega wo pei tea sikeana pakilagi, go ega wo doko naliana doko, pae namata‐pua ni Benyamin pa pa paki tokora ni namata‐pua vea, go pa pa paki namata‐pua ni naweluki, go pae nasum̃a vakilagi ki Hananel, pa pa paki nasum̃a ni navasokiana ni nawa ni vaine maga ki nawota.

¹¹Go naatam̃oli maga euga wo doko asa doko, go navasasakiana ega wo da moro doko asa mau; ma Yerusalem ega wo doko p̃ia doko.

¹²Go nasasanaana sa waia e pei tea waina Yehovah ega wo atugi narei maga mamau puti asa, waina eu mari navakalo dip̃a Yerusalem: nap̃okasida ega wo meso ragi waina eu do surata pano, go namatada maga euga wo meso m̃oru kakada maga, go namenada euga wo meso nawokada.

¹³Go ega wo pakilina naaleatia wanogoe naga namarip̃araiana warua sikai pae Yehovah ega wo doko m̃aleoputo kakada; go sara naata euga sikasikai puati nam̃elearu ni tea ni m̃aladigi ki nia, go nam̃elearuna ega wo pei tea sikeana dip̃a nam̃elearu ni tea ni m̃aladigi ki nia.

¹⁴Go Yudah ega wo mari navakalo dip̃a Yerusalem; go nasogolapaana ni nalauna maga mamau puti daliviri ega wo pei tea viragi‐saisai‐kiana, kold go silver, go tea suniana maga, ega wo p̃arua liu.

¹⁵Go nasasanaana sa sikai dakiusi nasasanaana sa wanogoe ega wo moro dowo paki horse, go mule, go kamel, go ass, go paki sara nalo tuavati waina eu doko tokora ni nam̃enakiana maga wanogoe.

¹⁶Go ega wo pakilina naga sara naata ni nalauna maga mamau puti waina eu mari dip̃a Yerusalem, sara naatam̃oli waina eu pei tea toropusiana eu doko, euga wo sake pano sara natau naga euga lotu ki Nawota, Yehovah ki taua maga, go naga euga mari nasaisaiana ni namaritap̃aup̃au‐ana.

¹⁷Go ega wo doko naga tea ni nalauna maga mamau puti ni maramana waina eu da sake pano paki Yerusalem naga euga lotu ki Nawota, Yehovah ki taua maga mau, usa ega wo da p̃owo ara mau.

¹⁸Go nalauna ni Ityipt waina e pe ta sake pano mau usa ega wo da pakilina ki da mau; nasasanaana sa wanogoe ega wo pakilina ki da, tea waina Yehovah ega wo atugi nalauna maga asa waina eu da sake pano mau naga euga mari nasaisaiana ni namaritap̃aup̃au‐ana.

¹⁹Tea wanogoe ega wo pei navaratiana paki Ityipt, go navaratiana paki nalauna maga mamau puti waina eu da sake pano mau naga euga mari nasaisaiana ni namari‐tap̃aup̃au‐ana.

²⁰Go naaleatia wanogoe navasaana waia ega wo pei tea tae‐midiriana doko bell ki horse maga, TEA TAPU KI YEHOVAH; go pot maga ni nasum̃a ki Yehovah euga wo dakiusi lasa maga waina eu doko narae ni wede ni naviriana.

²¹Io, pot maga mamau puti ni Yerusalem go ni Yudah, euga wo pei tea tapu ki Yehovah ki taua maga: go tea maga mamau puti waina euga wo mari naviriana, euga wo umai po dape ra, po peni ara: go naaleatia wanogoe tea sorisori ega wo da moro doko nasum̃a ki Yehovah ki taua maga mau.