Read Nguna Togoa Etafe North SEKARIAH 2 Bible Online

SEKARIAH 2 - Nguna Togoa Etafe North bible

SEKARIAH 2

¹Go a sike namatagu maga po leo punusi, go p̃a leo, naatam̃oli sikai go natali totowo sikai e doko nam̃elearuna.

²Go a naga, P̃a vaki esava? Go e noa ki nau, e naga, Aga va dowogi Yerusalem, naga aga atae naweleweleana kakana, go navarauana kakana.

³Go p̃a leo, agelo waina e pasa ki nau e dave pano, go agelo p̃ota sikai e umai po sua e.

⁴Po noa ki nia, e naga, P̃a sava, p̃a vasa paki natureai waia, po naga, Ega wo doko naga Yerusalem ega takiusi natokoana maga waina eu dika ki p̃aaka maga, nalakena nalapalapaana ni naatam̃oli go ni katel waina eu doko asa doko.

⁵Nalakena kinau, Yehovah e noa e, aga wo maneana pei nakoro ni nakapu vavaga dalivirigoro e, go aga wo pei tea samasamaniana m̃aleoputo kakana.

⁶Ho! Ho! Kuga sava dua ki navanua ni north, Yehovah e noa e: nalakena a daperavera ki mu dapala nalagi pati ni nakoroatelagi, Yehovah e noa e.

⁷Ho Sion, p̃a sava pano, nigo waina ku doko sikoti Babelon natuna nagoroi.

⁸Nalakena Yehovah ki taua maga e noa dapala nea: Nasamasamaana aneana e dip̃aki lua au pano paki nalauna maga waina eu mari sa ki‐go: nalakena tea waina e do mari dip̃a ko, e do kisidogo atolu matana.

⁹Nalakena p̃a leo, aga wo nuanua ki nam̃elearugu ara, go euga wo pei tea vuti‐luapavakotoana sikai ki tea suasua adeada maga: go kuga wo atae naga Yehovah ki taua maga e dip̃aki lua au umai.

¹⁰P̃a lega po laelaea, Sion natuna nagoroi O: nalakena p̃a leo, aga valoti go aga wo doko m̃aleoputo kakam̃a, Yehovah e noa e.

¹¹Go nalauna laapa euga wo puluti Yehovah naaleatia wanogoe, po pei narei aginau: go aga wo doko m̃aleoputo kakam̃a, go p̃a wo atae naga Yehovah ki taua maga e po dip̃aki lua au umai punusi ko.

¹²Go Yehovah ega wo peani pioli ki Yudah, ega vei matele aneana navanua tapu, go ega wo moro matadoa Yerusalem.

¹³Sara naatam̃oli, kuga vunuta narae ni Yehovah: nalakena e darasake m̃elu dua ki tokora tokoana tapu aneana.