Read Nguna Togoa Etafe North SEKARIAH 4 Bible Online

SEKARIAH 4 - Nguna Togoa Etafe North bible

SEKARIAH 4

¹Go agelo waina e pasa ki nau, e moro umai po pulevule au, dapala naatam̃oli waina e pei tea vulevuleana m̃elu dua ki namaturuana aneana.

²Go e noa ki nau, e naga, Ku punusi nasava? Go a naga, A po leo punusi, go p̃a leo, nakau ni nasulu sikai ni kold, go siloa kakana e doko nam̃asua kakana, go nasulu larua kakana eu doko asa; ara larua eu paki nasulu maga sikasikai waina eu doko nam̃asua kakana maga:

³Go nakau oliva dua pisari a, sikai e doko taleva ni matua ni siloa, go kerua e doko taleva ni mawiri kakana.

⁴Go a pasadara po noa ki agelo waina e pasa ki nau, a naga, Nawota aginau, tea maga waia eu pei nasava?

⁵Go agelo waina e pasa ki nau e pasadara po noa ki nau, e naga, Nigo ku da atae tea maga waia eu pei nasava kite? Go a naga, Ee, nawota aginau.

⁶Go e pasadara po noa ki nau, e naga, Tea waia e pei navasaana ki Yehovah paki Serubabel, e naga, Ega ta pae namarimatuaana mau, kite pae nakasuaana, ma ega vae naatagu, Yehovah ki taua maga e noa e.

⁷Nigo ku pei sei, tava warua O? Narae ni Serubabel p̃a wo pei malo matemate sikai: go ega wo piragi lua vatu ni nap̃auna umai pilake nararasaana, po naga, Nasaup̃iaana, nasaup̃iaana.

⁸Go navasaana ki Yehovah e moro umai paki nau, e naga,

⁹Nam̃elearu maga ni Serubabel eu lawo ki laketano ni nasum̃a waia; go nam̃elearuna maga eroga wo moro mari sua e; go p̃a wo atae naga Yehovah ki taua maga e dip̃aki lua au umai punusi ko.

¹⁰Nalakena sei e midoaki p̃alo ki naaleatia ni naleo kiki maga? Nara euga wo laelaea, po punusi natali totowo doko nam̃elearu ni Serubabel, tea larua wanogoe, waina eu pei namata maga ki Yehovah; eu do sava papiliu usuraki maramana mamau.

¹¹Go kinau a pasadara, po noa ki nia, a naga, Nakau oliva dua waia ero pei nasava, waina ero doko taleva ni matua ni nakau ni nasulu go taleva ni mawiri kakana?

¹²Go a pasadara sala kerua, po noa ki nia, po naga, Ara ni nakau oliva dua waia ero pei nasava waina ero doko nap̃irikia ni nagole dua ni kold, waina naroro ni kold e do dum̃ana sara pae ara pano?

¹³Go e pasadara au, po naga, Nigo ku da atae tea maga waia eu pei nasava kite? Go a naga, Ee, nawota aginau.

¹⁴Go e naga, Tea maga waia ero pei tea vuvuraikiana dua waina ero lawodu pisari Yehovah ni maramana mamau.