Read Nguna Togoa Etafe North SEKARIAH 6 Bible Online

SEKARIAH 6 - Nguna Togoa Etafe North bible

SEKARIAH 6

¹Go a moro sike namatagu maga, po leo punusi, go p̃a leo, kariot eu pati eu dave pae namawota ni tava warua dua umai; go tava warua maga wanogoe ero pei tava warua ni brass.

²Horse miala maga eu puati kariot vea; go horse loa maga eu puati kariot kerua;

³Go horse tare maga eu puati kariot ketolu; go horse kapukaapu maga eu puati kariot kevati.

⁴Go a pasa po noa ki agelo waina e pasa ki nau, a naga, Nawota aginau, tea maga waia eu pei nasava?

⁵Go agelo e pasadara po noa ki nau, e naga, Tea maga waia eu pei nalagi pati ni nakoroatelagi, waina eu do lawodu narae ni Yehovah ni maramana mamau, po do dave pano.

⁶Kariot waina horse loa maga eu puati a ega wo dave pano paki navanua ni north; go tea tare eu dave po dausi ra pano; go tea kapukaapu eu m̃elu pano po paki navanua ni sauth.

⁷Go tea miala eu m̃elu pano, go eu maridogo naga euga vano naga euga surata papiliu usuraki maramana: go e naga, Kuga vano, kuga surata papiliu usuraki maramana. Go eu pano po surata papiliu usuraki maramana.

⁸Go e pioso paki nau po noa ki nau, e naga, P̃a leo, tea maga waina eu do pano paki navanua ni north, eu mari namaetoana aginau e pakitano navanua ni north.

⁹Go navasaana ki Yehovah e umai paki nau,

¹⁰e naga, P̃a tape lua ki tea vua pavakotoana maga ki Heldai, go ki Tobiyah, go ki Yedaiah; go p̃a umai naaleatia sikai maau wanogoe, po sili nasum̃a ki Yosiah natu ni Sefaniah, tokora waina eu doko asa waina eu pae Babelon umai;

¹¹Go p̃a tape lua kiada silver go kold, po mari vauvau sikai, po sawa ki nia ega toko nap̃au ni Yoshua natu ni Yehosadak, tea viri warua liu;

¹²Go p̃a vasa paki nia po naga, Yehovah ki taua maga e pasa dapala nea, e naga, P̃a leo, naatam̃oli waina nagisana e pei Arana; go ega wo siria m̃elu tokora aneana, go ega wo davagi piri nasum̃a tapu ki Yehovah:

¹³E pei nae waina ega wo davagi piri nasum̃a tapu ki Yehovah; go nasamasamaana ega wo doko asa, go ega wo dasake malo tasake aneana po pei tea maramara; go ega wo pei tea viri sikai doko malo tasake aneana: go navusum̃akiana ni natam̃ateana ega wo doko namawota kakada.

¹⁴Go vauvau wanogoe ega wo magi Heldai, go Tobiyah, go Yedaiah, go Hen natu ni Sefaniah, pei tea ni namidoakilagati‐ana sikai doko nasum̃a tapu ki Yehovah.

¹⁵Go tea maga waina eu doko uvea euga wo umai po silae natavagi‐piri‐ana ni nasum̃a tapu ki Yehovah, go kuga wo atae naga Yehovah ki taua maga e dip̃aki lua au umai punusi mu. Go tea wanogoe ega wo pakilina, waina ku pe wo dogo parati ki m̃ata ki nadaleo ni Yehovah Sup̃e animu.