Read Nguna Togoa Etafe North SEKARIAH 8 Bible Online

SEKARIAH 8 - Nguna Togoa Etafe North bible

SEKARIAH 8

¹Go navasaana maga ki Yehovah ki taua maga e umai paki nau, e naga,

²Yehovah ki taua maga e noa dapala nea: Kinau a dotowo kasua ki natotowo‐kasua‐ana warua nalo ni Sion, go a dotowo kasua ki namaetoana warua nalo kakana.

³Yehovah e noa dapala nea: Aga wo liliu paki Sion, go aga wo doko m̃aleoputo ni Yerusalem doko: go Yerusalem ega wo pei tea sosoana ki natokoana ni nalomauana; go tava warua ki Yehovah ki taua maga ega wo pei tea sosoana ki tava tapu.

⁴Yehovah ki taua maga e noa dapala nea: Mariki matua maga go vitariki maga euga wo moro dasake doko napua maga ni Yerusalem, go sara naata euga sikasikai peani tiko doko nam̃elearuna nalakena naveitea‐matua‐ana.

⁵Go napua maga ni natokoana euga wo pura ki piakiki naanoai maga go piakiki nagoroi maga, doko do p̃arowaro napua kakana maga.

⁶Yehovah ki taua maga e noa dapala nea: E pe vei tea ni namagaana sikai namata ni namagovai ni narei waia naaleatia maga wanogoe, ma ega wo da moro pei tea ni namagaana sikai namatagu maga, kite? Yehovah ki taua maga e noa e.

⁷Yehovah ki taua maga e noa dapala nea: P̃a leo, aga wo mauti narei aginau waina eu doko navanua ni ist, go navanua ni west:

⁸Go aga wo piragi ra umai, go euga wo doko m̃aleoputo ni Yerusalem doko; go euga wo pei narei aginau, go aga wo pei Sup̃e adeada, doko nalomauana go namarinaleoleanaana.

⁹Yehovah ki taua maga e noa dapala nea: Nam̃elearumu maga euga kasua, nimu waina ku dogo navasaana maga waia pae nawoka ni profeta maga naaleatia maga waia, waina eu doko naaleatia waina laketano ni nasum̃a ki Yehovah ki taua maga e pei tea lawo‐ki‐laketoko‐ana, naga nasum̃a tapu ega vei tea tavagiana.

¹⁰Nalakena pea ki naaleatia maga wanogoe, namoriana raki naatam̃oli e dika, go namoriana raki nalo tuavati e dika; go natam̃ateana raki naata waina ega tave pano kite sili umai, e dika nalakena tea kokona ki nia: nalakena a mari sara naatam̃oli eu sikasikai mari dip̃a tea ni m̃aladigi ki nia.

¹¹Ma ragi waia aga wo da moro mari paki namagovai ni narei waia ega tapala waina a pea mari a naaleatia vea maga, Yehovah ki taua maga e noa e.

¹²Nalakena napati ni natam̃ateana ega wo doko; vaine ega wo dau ki nawana, go natano ega wo pitua ki nalapalapaana kakana, go nakoroatelagi maga euga wo pitua ki nasovaki; go aga wo mari namagovai ni narei waia euga veani pioli ki naleo maga mamau puti wanogoe.

¹³Go ega wo pakilina naga dapala waina nimu ku pea pei navasasakiana sikai m̃aleoputo ni nalauna maga, nimu nasum̃a ni Yudah go nasum̃a ni Israel O, dapala nogoe aga wo mauti mu, go kuga wo pei navasap̃iakiana sikai: kuga ta mataku mau, ma nam̃elearumu maga euga kasua.

¹⁴Nalakena Yehovah ki taua maga e noa dapala nea: Dapala waina a midoaki nia naga aga mari tea sa paki mu, ragi waina tamamu maga eu mari au a maeto, Yehovah ki taua maga e noa e, go a da midoaki piri mau;

¹⁵Dapala nogoe a moro midoaki nia naaleatia maga waia naga aga mari tea wia paki Yerusalem go paki nasum̃a ni Yudah: kuga ta mataku mau.

¹⁶Naleo maga waia eu pei tea waina kuga wo mari patakada; Nimu sara naatam̃oli kakamu kuga sikasikai pasa ki nalomauana paki tea ni m̃aladigi ki‐go; kuga mari navasap̃otaeana ni nalomauana go natam̃ateana doko namata‐pua animu maga:

¹⁷Go te naata sikai kakamu ega ta midoaki tea sa nap̃op̃ona dip̃a tea ni m̃aladigi ki nia mau; go kuga ta dodomi navivisaana sorosoro mau: nalakena tea mamau puti wanogoe, kinau a pilosi ra, Yehovah e noa e.

¹⁸Go navasaana ki Yehovah ki taua maga e umai paki nau, e naga,

¹⁹Yehovah ki taua maga e noa dapala nea: Navaliana ni atelagi kevati, go navaliana ni kelima, go navaliana ni kelarua, go navaliana ni kerualima sikai, euga wo pei tea ni nalaelaeaana go nasokamidiana, go nasaisaiana wia maga raki nasum̃a ni Yudah; nalakena tea wanogoe kuga dodomi nalomauana go natam̃ateana.

²⁰Yehovah ki taua maga e noa dapala nea: Ega wo pakilina naga narei maga euga wo umai, go naatam̃oli maga ni natokoana laapa:

²¹Go naatatoko maga ni natokoana sikai euga wo paki natokoana p̃ota sikai, po naga, Tuga mari m̃araverave pano po datago nasaup̃iaana ki Yehovah, po laaga Yehovah ki taua maga: kinau ma aga vano.

²²Io, narei laapa go nalauna kasua maga euga wo umai po laaga Yehovah ki taua maga Yerusalem, naga euga tatago nasaup̃iaana ki Yehovah.

²³Yehovah ki taua maga e noa dapala nea: Ega wo pakilina naaleatia maga wanogoe naga naatam̃oli rualima sikai m̃elu nalauna maga ni namena visarasara maga, euga wo puasoki sugoro kovagoro ki naatam̃oli sikai waina e pei tea ni Yudea, po naga, Tuga mamau pano, nalakena au dogo naga Sup̃e e doko sikoti ko doko.