Read Nguna Togoa Etafe North SEKARIAH 9 Bible Online

SEKARIAH 9 - Nguna Togoa Etafe North bible

SEKARIAH 9

¹Naveanoasaiana ni navasaana ki Yehovah doko navanua ni Hadrak, go Damaseko ega wo pei tokora tokoana aneana: nalakena namata ni naatam̃oli go ni nalauna maga mamau puti ni Israel, e do leo paki Yehovah:

²Go Hamath ma, waina e doko nadigina: Tair ma Sidon, nalakena nae e manumatua liu.

³Go Tair e dum̃ana maneana davagi nasum̃a ni p̃aaka sikai, go e pila daua ki silver e dapala nam̃otam̃ota, go kold wia e dapala nalepa ni napua maga.

⁴Ma p̃a leo, Yehovah ega wo kopasi lua e, po nadi ki nakasuaana aneana paki natasi; go nakapu ega wo gani a.

⁵Ashkelon ega wo punusi a po mataku; go Casa ma, go ega wo dogokitesa p̃arua; go Ekron, nalakena naleogoroana aneana ega wo pinovinoi: go nawota ni Casa ega wo mate puoli, go naatam̃oli ega wo da moro doko Ashkelon mau.

⁶Go narei ni natu ni navanakoana ega wo doko Ashdod, go aga wo daelua nap̃op̃ovakilagiana ki Filistine maga.

⁷Go aga wo dape lua nadana pa dua ki nawokana, go tea mamaragokiana aneana maga pa dua ki namawota ni napatina maga; go nae ma ega wo pei namagovai agi Sup̃e anigida: go ega wo dakiusi nawota sikai doko Yudah, go Ekron ega wo dakiusi naatam̃oli sikai ni Yebus.

⁸Go aga wo m̃enaki nasum̃a aginau dapala tea vavaigoro, naga te naata sikai ega ta surata papiliu mau: go tea riesoki ega wo da moro pa parati ki da mau: nalakena ragi waia namatagu ero do leo punusi a.

⁹P̃a laelaea p̃arua, Sion natuna nagoroi O; p̃a kola laelaea, Yerusalem natuna nagoroi O: p̃a leo, nawota aginau ega wo umai punusi ko: nae e leana, go e pilake namautipauriana; tea vakitano, e do sakesaake doko ass sikai, ass tureai sikai natu ni ass.

¹⁰Go aga wo daelua kariot pa dua ki Efraim, go horse pa dua ki Yerusalem, go naasu ni navakalo ega wo pei tea taeluaana; go ega wo pasa natam̃ateana paki nalauna maga: go namarakiana aneana ega vae natasi paki natasi, go pae Noaisara pa pa paki namatap̃ago maga ni maramana.

¹¹Go nigo ma, nalakena nada ni nanoasokisokiana anigo, a dip̃aki lua tea vuapavakoto anigo pano m̃elu dua ki m̃orutano waina e dap̃a.

¹²Kuga liliu paki nasum̃a ni p̃aaka, nimu tea vuapavakotoana maga ni naleogoroana: naaleatia waia a noasai naga aga wo lagati dua ko ega vaka rua.

¹³Nalakena a maginau p̃elua ki Yudah dapala naasu aginau, go a mari Efraim e pei nalua kakana; go aga wo pulevule natum̃a naanoai maga, Sion O, dip̃a natum̃a naanoai maga, Yavan O, po mari ko p̃a wo dakiusi lova ki m̃aau sikai.

¹⁴Go Yehovah ega wo pei tea vunusiana elagi ki da, go nalua aneana ega wo pano dakiusi navila: go Yehovah Sup̃e ega wo sui paiga, po pano pilake suitaviro maga ni sauth.

¹⁵Yehovah ki taua maga ega wo mauti ra; go euga wo dinomi po marimatua ki vatu nadi‐ki‐ana maga; go euga wo munu nadada dakiusi waine: go euga wo pei tea vakavuroana dakiusi siloa maga, dakiusi naweluki maga ni wede ni naviriana.

¹⁶Go Yehovah Sup̃e adeada ega wo mauti ra naaleatia wanogoe, nalakena eu pei navata ni narei aneana: euga wo dakiusi vatu wia maga ni vauvau sikai, euga wo maramalagati navanua aneana.

¹⁷Nawiaana aneana e p̃arua, go naleom̃atakiana kakana e p̃ia pa! Korn ega mari natureai maga euga wo siria, go waine vau naatara maga.