Read Nguna Togoa Etafe North MALAKAI 1 Bible Online

MALAKAI 1 - Nguna Togoa Etafe North bible

MALAKAI 1

¹Naveanoasaiana ni navasaana ki Yehovah paki Israel pae nawoka ni Malakai.

²Kinau a dodomi mu, Yehovah e noa e. Ma nimu ku naga, Ku dodomi gami ma nadodomiana anigo wai? Go Yehovah e naga, Esau e da pei Yakob taina kite?

³Go a dodomi Yakob; Ma a pilosi Esau, go a mari tava warua aneana maga eu pei maso maladi, po pitua ki tea veanipiolikiana aneana paki koria mila maga ni masop̃alo.

⁴Edom e naga, Au pei tea marip̃oraworaeana, ma auga wo liliu po moro davagi malo maladi maga; ma Yehovah ki taua maga e naga, Euga tavagi, ma aga wo moro dakai: go naatam̃oli maga euga soso ra ki navanua sigisigileo, go ki narei waina Yehovah e maeto ki da pa pa po du mau du.

⁵Go namatamu maga euga vunusi a, go kuga wo naga, Yehovah ega vei tea warua taleva kerua ni kokoi ni Israel.

⁶Natuna e dodomadagani tamana, go tea suasua e dodomadagani nawota aneana: go a pe vei tama sikai, ma nadodomadagani‐au‐ana wai? Go a pe vei nawota sikai, ma namatau‐ki‐nau‐ana wai? Yehovah ki taua maga e noa ki mu, Nimu tea viri maga O, ku midoaki p̃alo ki nagisagu. Go nimu ku naga, Nasava waina au mari a waina ku naga au midoaki p̃alo ki nagisam̃a?

⁷Nimu ku pitua ki naviriana ni navinaga m̃oli wede ni naviriana aginau, go ku naga, Nasava sa waina au mari a waina ku naga au midoaki m̃oli ki nia? Nimu ku midoa ki nia naga wede ki Yehovah e pei tea midoaki‐p̃alokiana.

⁸Go ragi waina ku pitua ki tea kesa e pei naviriana, tea wanogoe e da pei tea sa, kite? Go ragi waina ku pitua ki tea vei pito go tea sasana, tea wanogoe e da pei tea sa, kite? P̃a tua tea maramara anigo asa; nae ega midoaki m̃ata ki‐go, kite p̃a wo pap̃ai nasaup̃iaana namatana kite? Yehovah ki taua maga e noa e.

⁹Go ragi waia kuga vavara narae ni Yehovah, naga ega saup̃ia ki mu. Waina ku pe vitua ki tea tapala nogoe, go nae e pe wo saup̃ia ki tea sikai kakamu, kite? Yehovah ki taua maga e noa e.

¹⁰Oh, te naata sikai kakamu e pe kokoro namata maga naga ku mari sa dokoni m̃oli ki nakapu wede ni naviriana aginau! A da moro dodomi mu, go aga wo da dape navituaana ki nam̃elearumu mau. Yehovah ki taua maga e noa e.

¹¹Nalakena pae taleva ni elo sake pa pa paki taleva ni elo musu, nagisagu e p̃arua m̃aleoputo ni tea ni nalauna p̃ota maga; go doko sara tokora tea ni nap̃o wia go naviriana tautau ero do pei tea vituakiana paki nagisagu: nalakena nagisagu e p̃arua m̃aleoputo ni tea ni nalauna p̃ota maga. Yehovah ki taua maga e noa e.

¹²Ma nimu ku mari a e pei tea m̃oli waina ku naga, Wede ki Yehovah e pei tea m̃oli, go navituaana maga ni naviriana eu pei tea midoaki‐p̃alokiana.

¹³Go ku moro naga, Kuga leo, e pei tea ni namawosaana! Go ku mari saudoa ki nia, Yehovah ki taua maga e noa e; go ku dape umai tea tapepavakotoana, go tea vei pito, go tea sasana, eu pei navituaana animu: go aga midoaki m̃ata ki tea maga wanogoe po dape ra ki nam̃elearumu, kite? Yehovah e noa e.

¹⁴Ma tea marisore waina e peani shiip anoai sikai tea ni navata aneana, po pasasokisoki a, po mari naviriana paki Yehovah ki naleo vei wotu sikai, tea marisore wanogoe ega vei tea vasasakiana: nalakena kinau a pei nawota warua sikai, go nagisagu e pei tea mataukiana m̃aleoputo ni tea ni nalauna p̃ota maga. Yehovah ki taua maga e noa e.