Read Nguna Togoa Etafe North MALAKAI 3 Bible Online

MALAKAI 3 - Nguna Togoa Etafe North bible

MALAKAI 3

¹Kuga leo, a dip̃aki lua tea tautauana aginau pano, go nae ega wo mari m̃ata ki napua pea ki naraegu: go Yehovah waina ku laaga asa, ega wo m̃araverave umai paki nasum̃a tapu aneana; tea tautauana ni navasasokiana waina ku maro asa, kuga leo, nae ega wo umai, Yehovah ki taua maga e noa e.

²Ma sei e pe mariatae du naaleatia ni na‐umai‐ana aneana? Go sei e pe wo lawodu ragi waina ega vakilina? Nalakena nae e dakiusi nakapu vavaga ki tea mari m̃ata ki, go e dakiusi sop ni tea sarue:

³Go ega wo dasake po pei dapala tea mari m̃ata ki go tea mari dautau ki silver, go ega wo maridogo Levi natuna maga, po mari dautau ki da ega takiusi kold go silver; naga euga vitua ki navituaana maga, ega vae namarinaleoleanaana, paki Yehovah.

⁴Ragi wanogoe navituaana ni Yudah go Yerusalem ega moro pei tea midoakim̃ata‐kiana ki Yehovah, dapala naaleatia tuai maga, go dapala natau maga ni ragi vea mau.

⁵Go aga valoti paki m̃aladigi ki mu po mari navasap̃otaeana; go aga wo pei tea noasokisoki m̃araverave sikai dip̃a tea wosidoa maga, go dip̃a tea maripele maga, go dip̃a tea vivisa sorosoro maga; go dip̃a tea maga waina eu diesoki tea vasadapuiana namoriana aneana, go nagoroi malepu, go namalepu, go tea waina e puadoa tea ni nalauna p̃ota pa dua ki tea aneana, go tea waina e da matau ki nau mau, Yehovah ki taua maga e noa e.

⁶Kinau a pei Yehovah, a pei tea sikai maau doko; nalakena tea wanogoe, nimu Yakob natuna maga O, ku da pei tea mariana ku mavunuvunu mau.

⁷Pae naaleatia maga ki tamamu maga nimu ku dawasi m̃elu dua ki natawonakiana aginau maga, po da pavaigoro ra mau. Kuga liliu umai punusi au, go kinau aga wo liliu umai punusi mu, Yehovah ki taua maga e noa e. Ma nimu ku naga, Auga mari nasava naga auga moro liliu umai?

⁸Naatam̃oli ega tape pavakoto ki naleo ki Sup̃e kite? Ma nimu ku dape pavakoto ki naleo aginau. Ma ku naga, Au dape pavakoto ki nasava waina e pei naleo anigo? E pei kekerualima maga go navituaana maga.

⁹Nimu ku pei tea varatiana ki navasasakiana sikai; nalakena ku dape pavakoto ki naleo aginau, go ki naleo ki nalauna waia mamau.

¹⁰Kuga tape kekerualima mamau umai paki ekopu ni nasum̃a ni natauakiana, naga navinaga ega toko nasum̃a tapu aginau, go kuga maridogo au asa, Yehovah ki taua maga e noa e, a pe ta manimu p̃olagati namata leo maga ni nakoroatelagi, po manimu ligiraki navasap̃iakiana sikai, waina ega wo p̃arua do liu.

¹¹Go aga wo manimu pasa kasua ki tea kani dinomi, go ega wo da mari sa ki nawa ni natano animu maga mau; go vaine animu ega wo da nadi ki nawana vusa maga vanua mau. Yehovah ki taua maga e noa e.

¹²Go nalauna maga mamau puti euga wo soso mu ki tea maropa: nalakena navanua animu ega vei tea wia go tea masauniana, Yehovah ki taua maga e noa e.

¹³Navasaana animu maga eu kasua dip̃a au, Yehovah e noa e. Ma nimu ku naga, Au pasa seve navasaana sa dip̃a ko?

¹⁴Nimu ku naga, Au magi Sup̃e suasua m̃oli: go au dalua nasava waina au pavaigoro natip̃akiana aneana, go waina au surata dapala tea maga waina eu do susue, narae ni Yehovah ki taua maga?

¹⁵E pei tea p̃op̃ovakilagi maga waina eu maropa; go e pei tea maga waina eu mari nawosiana ni nasigisigileoana waina eu do disu nasogolapaana; io, nara eu do maridogo Sup̃e, go eu do pei tea vualuaana.

¹⁶Go dapala nogoe tea maga waina eu matau ki Yehovah eu dum̃ada pusum̃aki paki da: go Yehovah e daki dorogo po midoaki parati ki da, go tusi ni namidoakilagati‐ana e pei tea midiriana naraena, go nagisa ni tea maga waina eu matau ki Yehovah po midoakisoki nagisana, eu pei tea midiriana asa.

¹⁷Go Yehovah ki taua maga e naga, Nara euga wo pei tea aginau, tea leom̃atakiana wia, naaleatia waina aga wo lawo ki nia; go aga wo mauti ra, dapala naata sikai e mauti natuna waina e do maneana suasua.

¹⁸Go ragi wanogoe kuga wo liliu po moro atae p̃otae tea leana go tea sigisigileo, go tea waina e do magi Sup̃e suasua go tea waina e da maneana suasua mau.