Read Nguna Togoa Etafe North MATAIO 12 Bible Online

MATAIO 12 - Nguna Togoa Etafe North bible

MATAIO 12

¹Ragi wanogoe Yesu e surata duaduru vanua maga ni korn naaleatia ni sabbath; go tea vasapiseikiana aneana maga eu pitolo, po pae asa lei m̃okai maga ni korn, po ganikani.

²Ma Farisi maga, ragi waina eu punusi a, eu noa ki nia, eu naga, P̃a leo, tea vasapiseikiana anigo maga eu mari tea waina e da pae nawotaeana mau naga euga mari a sabbath.

³Ma e noa ki da, e naga, Ku da peve tea waina David e mari a, ragi waina e pitolo, go tea maga waina eu sikoti a doko;

⁴dapala waina e paki roara ni nasum̃a ki Sup̃e, po gani bred tokorae, waina e da pae nawotaeana mau naga nae ega kani a, kite naga tea maga waina eu sikoti a doko euga kani a, ma e pae nawotaeana naga tea viri maga euga sikida gani a?

⁵Kite ku da peve tusi ni nawotaeana, naga naaleatia ni sabbath tea viri maga nasum̃a tapu eu mari sabbath e pei tea m̃oli, go eu da pei tap̃aro asa mau.

⁶Ma a noa ki mu, naga tea waina e p̃arua liu nasum̃a tapu e doko nea.

⁷Ma ku pe atae tea waia naga e pei nasava, A masau nadodomiana, go a da masau naviriana mau, ku pe ta dip̃akotovi tea maga waina eu da pei tap̃aro mau.

⁸Nalakena naatam̃oli Natuna e pei nawota ni sabbath.

⁹Go e m̃elu dua ki tokora wanogoe pano, po paki ekopu ni nasum̃a ni nasaisaiana adeada:

¹⁰go kuga leo, naatam̃oli sikai e doko waina nam̃elearuna e lologara. Go eu pusuusu paki nia, eu naga, E pae nawotaeana naga tuga mari pauri naaleatia ni sabbath kite? Naga euga vasadip̃a e.

¹¹Go e noa ki da, e naga, Nimu naatam̃oli sei kakamu ega wo doko, waina ega wo peani shiip sikai, go nae e pe rowo paki m̃orutano sikai naaleatia ni sabbath, e pe wo da puati a, po dapedakatilua e kite?

¹²Go naatam̃oli sikai e paka visa p̃ia liu shiip sikai? Nalakena tea wanogoe e pae nawotaeana naga tuga mari p̃ia naaleatia ni sabbath.

¹³Ragi wanogoe e noa ki naatam̃oli wanogoe, e naga, P̃a sai ki nam̃elearum̃a. Go e sai ki nia; go e pei tea mariana e moro p̃ia dakiusi kerua.

¹⁴Ma Farisi maga eu dave pano, po seke dip̃a e, dapala waina euga maripunue a asa.

¹⁵Ma Yesu e atae a po m̃elu dua ki tokora wanogoe pano: go tea laapa eu dausi a; go e mari pauri puti ra,

¹⁶po pasasoki ra naga euga ta mari a ega toko lina mau:

¹⁷naga tea waina e pei tea noaana pae profeta Isaiah ega lolomana, e naga,

¹⁸Kuga leo, tea suasua aginau waina a matadoa e; Tea dodomiana aginau waina naatagu e midoakim̃ata ki nia: Aga wo doro Naatagu ega wo doko asa, Go ega wo dogorogo ki navasap̃otaeana paki tea ni nalauna p̃ota maga.

¹⁹Ega wo da pile mau, go ega wo da pioso kasua mau; Go te naata sikai ega wo da dogo nadaleona napua maga ni natokoana mau.

²⁰Napati nau sikai waina e pei wola ega wo da p̃ori a mau, Go wik sikai waina e asua ega wo da sui punue a mau, Pa pa ega tip̃aki lua navasap̃otaeana paki namarimatuaana.

²¹Go tea ni nalauna p̃ota maga euga wo leogoro‐pavatu nagisana.

²²Ragi wanogoe tea sikai waina pei dimon, waina e kesa go waina e pusa, e pei tea viragiana umai punusi a: go e mari pauri a, dapala waina pusa e pasa po leosai.

²³Go taua maga mamau puti ni naatam̃oli maga eu saram̃akoto, po naga, Tea waia e pei natu ni David kite?

²⁴Ma ragi waina Farisi maga eu dogo e, eu naga, Tea waia e da mari dimon maga eu dave pano mau, ma e mari ra eu dave pano pae Beelsebub nawota ki dimon maga.

²⁵Go e atae namidodoana adeada maga po noa ki da, e naga, Sara namarakiana waina eu pei tea tap̃otaeana dum̃ada dip̃a ra eu pei tea mariana eu pei masomaladi; go sara natokoana kite nasum̃a waina eu pei tea tap̃otaeana dum̃ada dip̃a ra, euga wo da du mau:

²⁶go Satan e pe mari Satan e dave pano, e pe vei tea tap̃otaeana dum̃ana dip̃a e; go namarakiana aneana e pe wo du dapale sava?

²⁷Go kinau a pe mari dimon maga eu dave pano pae Beesebub, natumu naanoai maga eu mari ra eu dave pano pae sei? Nalakena tea wanogoe nara euga wo pei tea vasap̃otae mu.

²⁸Ma kinau a pe mari dimon maga eu dave pano pae Naata ni Sup̃e, namarakiana ki Sup̃e e po umai sua pakilina ki mu.

²⁹Kite te naata sikai e mariatae paki ekopu ni nasum̃a ki tea kasua, po dape pavakoto naloriki aneana maga dapale sava? E pe vea soli tea kasua, ragi wanogoe e pe wo dape pavakoto nasum̃a aneana.

³⁰Tea waina e da sikoti au doko mau e mari dip̃a au; go tea waina e da dauaki sikoti au mau e mari e pei daperavera.

³¹Nalakena tea wanogoe a noa ki mu, naga Sara namarinaleosaana go sara navasasakiana euga wo magi naatam̃oli maga pei tea midoakikorokoroana; ma navasasakiana dip̃a Naatana ega wo da pei tea midoakikorokoroana mau.

³²Go te naata sikai e pe noa te navasaana sikai dip̃a naatam̃oli Natuna, e pe wo maneana pei tea midoakikorokoroana; ma te naata sikai e pe vasa dip̃a Naatana Tapu, ega wo da maneana pei tea midoakikorokoroana mau, maramana waia, kite maramana waina ega wo umai.

³³Kuga mari nakau ega wia, go nawana ega wia; kite kuga mari nakau ega sa, go nawana ega sa: nalakena nakau e pei tea ataeana ki nawana.

³⁴M̃aata sa natuda maga, ku mariatae pasa tea wia maga dapale sava ragi waina ku sa? Nalakena nawoka ni naatam̃oli e pasa pae tea waina nap̃op̃ona e pura ki nia.

³⁵Naatam̃oli wia e dapelua tea wia maga pae store wia aneana: go naatam̃oli sa e dapelua tea sa maga pae store sa aneana.

³⁶Go a noa ki mu, naga sara navasaana p̃alo waina naatam̃oli maga euga wo pasa ara, euga wo atusi ra naaleatia ni navasap̃otaeana.

³⁷Nalakena ki navasaana anigo maga p̃a wo pei tea marileanakiana, go ki navasaana anigo maga p̃a wo pei tea tip̃akotoviana.

³⁸Ragi wanogoe tea midiri maga go Farisi maga seara kakada eu pasadara e, eu naga, Tea Vasapiseiki, au masauna naga auga vunusi navaivaiana sikai ega m̃elu ako.

³⁹Ma e pasadara po noa ki da, e naga, Tagona sa go maripele eu datago navaivaiana sikai; go te navaivaiana sikai ega wo da pei tea vituakiana paki da mau ma navaivaiana ni profeta Yonah ega sikina:

⁴⁰nalakena dakiusi waina Yonah e one nap̃ele ni naika warua one naaleatia dolu go nap̃ogiana dolu, dapala nogoe naatam̃oli Natuna ega wo one nap̃alau ni natano one naaleatia dolu go nap̃ogiana dolu.

⁴¹Naatam̃oli maga ni Nineveh euga wo duleana navasap̃otaeana sikoti tagona waia, go nara euga wo dip̃akotovi tagona waia: nalakena eu midoakidoa ragi waina eu dogo narogorogoana ki Yonah; go kuga leo, tea waina e p̃arua liu Yonah e doko nea.

⁴²Nawota nagoroi ni sauth ega wo duleana navasap̃otaeana sikoti tagona waia, go nae ega wo dip̃akotovi tagona waia: nalakena e pae namatap̃ago ni maramana umai naga ega rogo namanumatuaana ki Solomon; go kuga leo, tea waina e p̃arua liu Solomon e doko nea.

⁴³Ma naatana loa, ragi waina e dave m̃elu dua ki naatam̃oli pano, e surata duaduru malo garagara maga, e do laaga namaromaroana, po da pap̃ai a mau.

⁴⁴Ragi wanogoe e naga, Aga wo liliu paki ekopu ni nasum̃a aginau waina a dave asa umai; go ragi waina e umai e punusi a e p̃alo, e pei tea sasaraana, go tea rekeikiana.

⁴⁵Ragi wanogoe e pano, po piragi lua naatana p̃ota larua eu sikoti a umai waina eu sa liu sa, go eu sili paki asa po doko asa doko: go tea edaku maga ki naatam̃oli wanogoe eu pei tea mariana eu sa liu tea vea aneana maga. Go ega wo dapala nogoe paki tagona sa waia.

⁴⁶Ragi waina nae e ko do pasa paki taua maga ni naatam̃oli, kuga leo, p̃ilana go taina maga eu lawodu katama, eu laaga naga euga vasa ki nia.

⁴⁷Go naata sikai e noa ki nia, e naga, P̃a leo, p̃ilam̃a go taim̃a maga eu lawodu katama, eu laaga naga euga vasa ki‐go.

⁴⁸Ma e pasadara po noa ki tea waina e noa ki nia asa, e naga, Sei e pei p̃ilagu? Go sei eu pei taigu maga?

⁴⁹Go e sai ki nam̃elearuna paki tea vasapiseikiana aneana maga, po naga, Kuga leo, p̃ilagu go taigu maga!

⁵⁰Nalakena naata waina e pe wo mari namasauana ki Tamagu waina e doko nakoroatelagi, nae e pei taigu, go goregu, go p̃ilagu.