Read Nguna Togoa Etafe North MATAIO 13 Bible Online

MATAIO 13 - Nguna Togoa Etafe North bible

MATAIO 13

¹Naaleatia wanogoe Yesu e dave m̃elu dua ki nasum̃a pano, po dasake pisari nadigi ni natasi.

²Go taua warua maga ni naatam̃oli eu saisai punusi a, dapala e pagi rarua sikai, po dasake; go taua mamau ni naatam̃oli eu lawodu elau garagara.

³Go e pasa ki da naleo laapa pae naluluakia maga, e naga, Kuga leo, tea sapuraki e dave pano naga ega sapuraki;

⁴go ragi waina e do sapuraki, te seara eu dowo pisari nadigi ni napua, go manu maga eu rumai po dadinomi ra:

⁵go tea p̃ota seara eu dowo paki malo ni vatu maga, waina natano e da p̃arua asa mau: go eu pisou m̃araverave, nalakena natano e da matolu mau:

⁶go ragi waina elo e sake eu pei tea tap̃arakiana; go nalakena eu dika nakoada eu kokolo.

⁷Go tea p̃ota seara eu dowo paki tea makalikali maga; go tea makalikali maga eu ulua sake po mari ra eu dodo:

⁸go tea p̃ota seara eu dowo paki natano wia, po pitua ki nawa, sikai e dau ki p̃onotia sikai, go sikai ki rualima latesa, go sikai ki rualima dolu.

⁹Tea waina e pilake nadaliga ega rogo.

¹⁰Go tea vasapiseikiana maga eu rumai, po noa ki nia, eu naga, Ekasana ku pasa ki da pae naluluakia maga?

¹¹Go e pasadara po noa ki da, e naga, E pei tea vituakiana paki mu naga kuga atae p̃aia maga ni namarakiana ni nakoroatelagi, ma e da pei tea vituakiana paki da mau.

¹²Nalakena naata waina e peani, ega wo pei tea vituakiana paki nia, go ega wo peani tea laapa: ma naata waina e da peani mau, tea waina e peani a ega wo pei tea tapeluaana kiana.

¹³Nalakena tea wanogoe a pasa ki da pae naluluakia maga; nalakena eu do punusi po da punusi mau, go eu do dogo po da dogo mau, go eu da midoakiatae mau.

¹⁴Go naveanoasaiana ki Isaiah e pei tea vakavuroana ara, waina e naga, Kuga wo dogo ki narogoana, go kuga wo da midoakiatae mau; Go kuga wo punusi po punusi, go kuga wo da leoatae mau:

¹⁵Nalakena nap̃op̃o ni narei waia e m̃anopunopu, Go eu dogo madagadaga ki nadaligada maga, Go eu puluti namatada maga; Naga euga ta punusi ki namatada maga mau, Po da dogo ki nadaligada maga mau, Po da midoakiatae ki nap̃op̃oda mau, Go naga euga ta liliu umai mau, Go naga aga ta maripauri ra mau.

¹⁶Ma namatamu eu maro pa, nalakena eu punusi; go nadaligamu eu maro pa, nalakena eu dogo.

¹⁷Nalakena lomau a noa ki mu, naga profeta laapa go naatam̃oli leana laapa eu masauna naga euga vunusi tea maga waina nimu ku punusi ra, go eu da punusi ra mau; go naga euga rogo tea maga waina nimu ku dogo ra, go eu da dogo ra mau.

¹⁸Nalakena tea wanogoe kuga rogo naluluakia ni tea sapuraki.

¹⁹Ragi waina te naata sikai e dogo navasaana ni namarakiana, po da midoakiatae a mau, tea sa e umai, po puti lua tea waina e pei tea sapurakiana nap̃op̃ona. Nae e pei tea waina e pei tea sapurakiana pisari nadigi ni napua.

²⁰Go tea waina e pei tea sapurakiana paki malo ni vatu maga, nae e pei tea waina e dogo navasaana, po dape a m̃araverave pilake nalaelaeaana;

²¹ma e dika nakoana nap̃alauna, ma e doko ragi kiki; go ragi waina nariesokiana kite nakopaleleana e pakilina nalakena navasaana, e dapilagona m̃araverave.

²²Go tea waina e pei tea sapurakiana m̃aleoputo ni tea makalikali maga, nae e pei tea waina e dogo navasaana, go namidoaki‐paratiki‐ana ni maramana, go nasurueana ni nasogolapaana, ero mari navasaana e dodo, go e pei tea mariana e da dau mau.

²³Go tea waina e pei tea sapurakiana paki natano wia, nae e pei tea waina e dogo navasaana, po midoakiatae a; waina e dau lomau ki nawana, sikai e dau ki p̃onotia sikai, go sikai ki rualima latesa, go sikai ki rualima dolu.

²⁴Naluluakia p̃ota sikai e pasa nadi ki nia paki da, e naga, Namarakiana ni nakoroatelagi e dakiusi naatam̃oli sikai waina e sapuraki napati wia vanua aneana:

²⁵ma ragi waina naatam̃oli maga eu maturu, tea kokona ki nia e umai po sapura ki whiit sa e sarisari whiit wia, po pano.

²⁶Ma ragi waina e pisou ki nauluna, po dau ki nawana, ragi wanogoe, whiit sa ma e p̃ora.

²⁷Go tea suasua maga ki talakea ni nasum̃a eu rumai po noa ki nia, eu naga, Nawota, ku da sapuraki napati wia vanua anigo kite? Go whiit sa waina e ulua asa e pae esava?

²⁸Go e noa ki da, e naga, Naatam̃oli kokona sikai e mari tea wanogoe. Go tea suasua maga eu noa ki nia, eu naga, Ku masauna naga kinami auga vano po pila daua ki da kite?

²⁹Ma nae e naga, Ee; ragi waina ku pe vila daua ki whiit sa maga, ku pe vaku lua whiit wia pilake tea sa maga.

³⁰Kuga toro ra eroga rua ulua pa pa paki nalolovaeana; go ragi ni nalolovaeana aga wo noa ki tea lolovae maga, Kuga vea piladaua ki whiit sa maga, po otisoki ra euga vei napu maga naga euga tap̃ara ki da: ma kuga tapedaua ki whiit wia ega vaki ekopu ni nasum̃a ni korn aginau.

³¹Naluluakia p̃ota sikai e pasa nadi ki nia paki da, e naga, Namarakiana ni nakoroatelagi e dakiusi napati ni sinapi sikai, waina naatam̃oli sikai e dape a, po lawo e vanua aneana:

³²waina e kiki sa lomau ni napati maga mamau puti ni nawa nakau maga; ma ragi waina e ulua sake, e p̃arua liu tea lawoana maga, po pei nakau sikai, dapala waina manu maga ni nakoroatelagi eu rumai po doko arana maga.

³³Naluluakia p̃ota sikai e pasa ki da asa; e naga, Namarakiana ni nakoroatelagi e dakiusi leven, waina nagoroi sikai e dape a, po suru ki nia totowo ni flaur dolu, pa pa tea mamau e pei tea levenakiana.

³⁴Tea maga mamau puti wanogoe Yesu e pasa ki taua maga ni naatam̃oli maga ara pae naluluakia maga; go e da pasa ki da te navatuna masale ki naluluakia sikai mau:

³⁵naga tea waina e pei tea noaana pae profeta ega lolomana, e naga, Aga wo p̃olagati nawokagu pae naluluakia maga; Aga wo lua ki naleo maga waina eu pei tea surukiana pae ragi ni nanadiki‐laketano‐ana ni maramana pa pa.

³⁶Ragi wanogoe e doropusi taua maga ni naatam̃oli po paki ekopu ni nasum̃a: go tea vasapiseikiana aneana maga eu rumai punusi a, po naga, P̃a noakip̃otae gami naluluakia ni whiit sa ni vanua.

³⁷Go e pasadara po naga, Tea waina e sapuraki napati wia e pei naatam̃oli Natuna; go vanua e pei maramana;

³⁸go napati wia nara eu pei namarakiana natuna maga; go whiit sa maga eu pei tea sigisigileo natuna maga;

³⁹go tea kokona waina e sapura ki da e pei diabolo: go nalolovaeana e pei naaleatia edaku mau ni maramana; go tea lolovae maga eu pei agelo maga.

⁴⁰Go dakiusi waina whiit sa maga eu pei tea viladauakiana po pei tea tap̃arakiana ki nakapu; ega wo dapala nogoe naaleatia edaku mau ni maramana;

⁴¹Naatam̃oli Natuna ega wo dip̃aki lua agelo aneana maga, go euga wo piladaua ki m̃elu dua ki namarakiana aneana naleo tapilagonaana maga mamau puti, go tea maga waina eu mari namarinaleotageleana,

⁴²go euga wo nadi ki da paki upu ni nakapu: tokora wanogoe natagiana go nakati‐patiana eroga wo doko asa.

⁴³Ragi wanogoe tea leana maga euga wo maramalaga dapala elo namarakiana ki Tamada. Tea waina e pilake nadaliga ega rogo.

⁴⁴Namarakiana ni nakoroatelagi e dakiusi naloriki tauakiana sikai waina e pei tea surukiana vanua; waina naatam̃oli sikai e pap̃ai a, po dasuru ki nia; go nalakena e laelaea asa e pano po sori puti sara naleo waina e peani ra, po pakotovi vanua wanogoe.

⁴⁵Namarakiana ni nakoroatelagi e moro dakiusi naatam̃oli sorisori sikai waina e do laaga napati ni vilavila wia maga:

⁴⁶go ragi waina e pap̃ai napati ni vilavila sikai ni naulu warua, e pano po sori puti sara naleo waina e peani ra, po pakotovi a.

⁴⁷Namarakiana ni nakoroatelagi e moro dakiusi kup̃ena rosagiana sikai, waina e pei tea sivakiana paki natasi, go waina e puagoro naika visarasara maga seara kakada:

⁴⁸waina, ragi waina e pura, eu dosagi a paki euta; go eu do natano, po piladaua ki tea wia maga paki lasa maga, ma tea sa maga eu naki ki da pano.

⁴⁹Ega wo dapala nogoe naaleatia edaku mau ni maramana: agelo maga euga wo dave umai, po mari masale ki tea sigisigileo maga m̃elu dua ki tea leana maga, go euga wo nadi ki da paki upu ni nakapu:

⁵⁰tokora wanogoe natagiana go nakati‐pati‐ana eroga wo doko asa.

⁵¹Ku midoakiatae tea maga mamau puti wanogoe kite? Eu noa ki nia, eu naga, Ioro.

⁵²Go e noa ki da, e naga, Nalakena tea wanogoe sara tea midiri waina eu pei tea vasapiseikiana namarakiana ni nakoroatelagi eu dakiusi naatam̃oli sikai waina e pei talakea ni nasum̃a, waina e do dape lua pae store aneana naleo vau maga go naleo tuai maga.

⁵³Go e pakilina, ragi waina Yesu e pasa sua naluluakia maga wanogoe, naga e m̃elu dua ki tokora wanogoe pano.

⁵⁴Go e umai paki navanua aneana po pasapisei ki da ekopu ni nasum̃a ni nasaisaiana adeada, dapala waina eu saram̃akoto asa, po naga, Naatam̃oli waia e peani namanumatuaana waia, go nawosiana kasua maga waia eu pae esava?

⁵⁵Tea waia e da pei mataisau natuna kite? P̃ilana e da pei tea sosoana ki Maria kite? Go taina maga, Yakob, go Yosef, go Simon, go Yuda kite?

⁵⁶Go gorena maga, eu da mamau puti sikoti gida doko kite? Go naatam̃oli waia e peani tea maga waia eu pae esava?

⁵⁷Go eu dapilagona nalo kakana. Ma Yesu e noa ki da, e naga, Profeta sikai e da dika nadodomadaganiana mau, ma e dika asa navanua aneana, go nasum̃a aneana sikida.

⁵⁸Go e da mari nawosiana kasua laapa tokora wanogoe mau nalakena eu da saralomau mau.