Read Nguna Togoa Etafe North MATAIO 14 Bible Online

MATAIO 14 - Nguna Togoa Etafe North bible

MATAIO 14

¹Ragi wanogoe Herod tetrarke e dogo narogorogoana nalo ni Yesu,

²go e noa ki tea suasua aneana maga, e naga, Tea wanogoe e pei Yoane Bapetiso; nae e po duleana m̃elu dua ki tea mate maga; go nalakena tea wanogoe tea kasua maga wanogoe eu do p̃osiwosi asa.

³Nalakena Herod e puati Yoane, po soli a, po doropusi a e doko ekopu ni nasum̃a ni navavaigoroana nalakena Herodia, nagoroi ki taina Filipo.

⁴Nalakena Yoane e do noa ki nia, e naga, E da pae nawotaeana mau naga p̃a veani a.

⁵Go ragi waina e masauna naga ega mari punue a, e matau ki taua ni naatam̃oli maga, nalakena eu midoa ki nia naga nae e pei profeta sikai.

⁶Ma ragi waina naaleatia ni navakilinaana ki Herod e umai, Herodia natuna nagoroi e sale m̃aleoputo kakada, go Herod e midoa ki m̃ata ki nia.

⁷Nalakena tea wanogoe e sai paki nia pilake navivisaana sikai naga ega tua e tea waina e pe wo datago asa.

⁸Go nae, waina e pei tea digotigoana pae p̃ilana, e naga, P̃a tua au nea ega toko siloa warua sikai nap̃au ni Yoane Bapetiso.

⁹Go nawota e susue asa; ma nalakena navivisaana aneana maga, go tea maga waina eu kere one ganikani sikoti a, e pitip̃aki naga ega vei tea vituakiana;

¹⁰go e dip̃aki lua, po daekotovi nap̃au ni Yoane ekopu ni nasum̃a ni navavaigoroana.

¹¹Go nap̃auna e pei tea tapeana umai e doko siloa warua sikai, po pei tea vituakiana paki koroi kiki wanogoe: go e dape a pano dua p̃ilana asa.

¹²Go tea vasapiseikiana aneana maga eu rumai po dape‐dakati‐lua nap̃atokona, po ova ki nia; go eu pano po dogorogo ki nia paki Yesu.

¹³Go ragi waina Yesu e dogo e, e m̃elu dua ki tokora wanogoe pano pae boti sikai, po masikina paki masop̃alo sikai: go ragi waina taua maga ni naatam̃oli eu dogo e, eu dausi a eu surata pae natokoana maga.

¹⁴Go e duasai pakilina, po punusi taua warua sikai ni naatam̃oli maga, go e maritadodomi ra, go e maripauri tea sasana adeada maga.

¹⁵Go ragi waina e po pei ragi melu, tea vasapiseikiana maga eu rumai punusi a, eu naga, Tokora waia e pei masop̃alo, go naaleatia e po pano sua; p̃a tip̃aki lua taua maga ni naatam̃oli, naga euga vaki natokoana kiki maga, po dum̃ada madeada pakotovi navinaga.

¹⁶Ma Yesu e noa ki da, e naga, Nalakena naga euga vano e dika; nimu kuga tua ra euga kanikani.

¹⁷Go eu noa ki nia, eu naga, Au dika navinaga tokora waia, bred e lima mau go naika e dua mau eu doko.

¹⁸Go e naga, Kuga tape ra umai dua au ara.

¹⁹Go e dip̃a ki taua maga ni naatam̃oli naga euga toko natano nam̃enau; go e dape bred lima go naika dua wanogoe, po leo sake paki nakoroatelagi, po pasam̃ataki, po dovap̃orae po dua tea vasapiseikiana maga bred wanogoe, go tea vasapiseikiana maga eu dua taua maga ni naatam̃oli ara.

²⁰Go eu mamau puti ganikani, po dawosa: go eu pilae tea waina e dupele ni matele maga, po pai a e pei nala rualima sikai tamate dua eu pura puti.

²¹Go tea maga waina eu ganikani eu pei naanoai eu alagoro pei manu lima, masale ki nagoroi maga go piakirikiri maga.

²²Go e m̃araverave pasadie tea vasapiseikiana maga naga euga vagi boti, go naga euga vea ki nia pano paki taleva kerua, pa pa ega tip̃aki lua taua maga ni naatam̃oli.

²³Go ragi waina e dip̃aki lua sua taua maga ni naatam̃oli, e sake paki tava e sikina naga ega tapasavasa: go ragi waina e maligo, e sikina doko tokora wanogoe.

²⁴Ma boti e doko sua m̃aleoputo ni natasi, go napeao maga eu mari a e datasoki po pakavakae; nalakena nalagi e sau pae kivea.

²⁵Go navavaigoroana kevati ni p̃ogi e pano punusi ra asa, e surata natasi.

²⁶Go ragi waina tea vasapiseikiana maga eu punusi a e surata natasi, eu m̃anaunau, po naga, E pei naatana sikai; go eu pioso ki namatakuana.

²⁷Ma Yesu e pasa ki da m̃araverave, e naga, Kuga marasike; e pei kinau; kuga ta mataku mau.

²⁸Go Petero e pasadara po naga, Nawota, e pe vei nigo, pa dip̃aki nau naga aga valoti punusi ko noai maga.

²⁹Go e naga, P̃a umai, Go Petero e siwo m̃elu dua ki boti, po surata noai maga naga ega umai punusi Yesu.

³⁰Ma ragi waina e punusi nalagi, e mataku; go e pae asa diro, po pioso, po naga, Nawota, p̃a mauti au.

³¹Go Yesu e sai ki nam̃elearuna m̃araverave, po puati a, po noa ki nia, e naga, Tea saralomau kiki, ekasana ku midoakisara?

³²Go ragi waina nara ero pagi sua boti, nalagi e maro.

³³Go tea maga waina eu doko boti eu lotu ki nia, eu naga, Lomau ku pei Sup̃e Natuna.

³⁴Go ragi waina eu duagoto sua, eu rumai paki navanua, paki Cennesaret.

³⁵Go ragi waina naatam̃oli ni tokora wanogoe eu leo atae a, eu dip̃aki lua paki navanua wanogoe mamau daliviri, po piragi puti tea sasana maga eu rumai punusi a;

³⁶go eu pavarani a naga euga kisidogo narepu ni sugoro aneana: go tea maga waina eu kisidogo eu pei tea mariana eu p̃ia lua.