Read Nguna Togoa Etafe North MATAIO 16 Bible Online

MATAIO 16 - Nguna Togoa Etafe North bible

MATAIO 16

¹Go Farisi maga go Sadduki maga eu rumai po maridogo e, po datagovi a naga ega visei ki da navaivaiana sikai ega vae nakoroatelagi umai.

²Ma e pasadara po noa ki da, e naga, Ragi waina e po pei ragi melu ku naga, Elo ega wo dara: nalakena nakoroatelagi e miala.

³Go malip̃ogi, ku naga, Usa ega wo p̃owo masoso: nalakena nakoroatelagi e miala loa. Ku leop̃otae atae narae ni nakoroatelagi; ma ku da leop̃otae atae navaivaiana maga ni ragi maga mau.

⁴Tagona sa go maripele eu datago navaivaiana sikai; go te navaivaiana sikai ega wo da pei tea vituakiana paki da mau, ma navaivaiana ni Yonah ega sikina. Go e doropusi ra eu doko, po pano.

⁵Go tea vasapiseikiana maga eu rumai paki taleva kerua ni elau, go eu malio ki bred.

⁶Go Yesu e noa ki da, e naga, Kuga vunusi po matamatua ki leven ki Farisi maga go ki Sadduki maga.

⁷Go eu dum̃ada pusum̃aki paki da, po naga, Nalakena tu da dape te bred seara mau.

⁸Go Yesu e atae a po naga, Tea saralomau kiki maga, ekasana ku dum̃amu pusum̃aki paki mu nalakena ku da peani te bred seara mau?

⁹Ku ko da midoaki atae mau, po da midoaki bred lima ni manu lima, go nala pisa waina ku dape dakati ra?

¹⁰Go bred larua ni manu pati, go nalasai pisa waina ku dape dakati ra?

¹¹Ekasana ku da midoaki atae mau naga a da pasa ki mu nalo ni bred mau? Ma kuga matamatua ki leven ki Farisi maga go ki Sadduki maga.

¹²Ragi wanogoe eu midoakiatae naga e da noa naga euga matamatua ki leven ni bred mau, ma naga euga matamatua ki navasapiseikiana ki Farisi maga go ki Sadduki maga.

¹³Go ragi waina Yesu e umai paki tokora maga ni Kaisarea Filippi, e pusuusu paki tea vasapiseikiana aneana maga, po naga, Naatam̃oli maga eu noa naga naatam̃oli Natuna e pei sei?

¹⁴Go eu naga, Te seara eu naga, Yoane Bapetiso; te seara, Eliyah: go tea p̃ota seara, Yeremiah, kite profeta maga sikai kakada.

¹⁵E noa ki da, e naga, Ma nimu ku noa naga kinau a pei sei?

¹⁶Go Simon Petero e pasadara po naga, Nigo ku pei Kristo, Natu ni Sup̃e mauri.

¹⁷Go Yesu e pasadara po noa ki nia, e naga, Ku maro pa Simon Bar‐Yonah: nalakena nap̃okasi go nada ero da maripakasa ki nia paki‐go mau, ma Tamagu waina e doko nakoroatelagi e mari a.

¹⁸Go kinau ma a noa ki‐go, naga nigo ku pei Petero, go vatu laketoko wanogoe aga wo davagi ekalesia aginau asa; go namatapua maga ni Hades euga wo da marimatua ki nia mau.

¹⁹Aga wo dua ko tea viloki maga ni namarakiana ni nakoroatelagi: go tea waina p̃a wo solisoki a maramana ega wo pei tea solisokiana nakoroatelagi: go tea waina p̃a wo peresi a maramana ega wo pei tea veresiana nakoroatelagi.

²⁰Ragi wanogoe e pasa parati ki tea vasapiseikiana maga naga euga ta noa ki te naata mau naga nae e pei Kristo.

²¹Pae ragi wanogoe Yesu e atulake naga ega visei ki tea vasapiseikiana aneana maga, naga e one asa one naga ega vaki Yerusalem pano, go naga ega sua narogokitesaana laapa pae tea matua maga go tea viri warua maga go tea midiri maga, go naga ega vei tea maripunueana, go naga ega vei tea sikeana ega tuleana naaleatia ketolu.

²²Go Petero e puati a, po atulake naga ega vasakasua ki nia, po naga, Sup̃e ega dodomi ko, Nawota: tea wanogoe ega wo da pakilina ki‐go mau.

²³Ma e dum̃ana doa e, po noa ki Petero, e naga, P̃a vaki natakugu pano, Satan, ku pei tea tapilagonaana aginau: nalakena ku da midoa ki m̃ata ki naleo maga ki Sup̃e mau, ma ku midoa ki m̃ata ki naleo maga ki naatam̃oli.

²⁴Ragi wanogoe Yesu e noa ki tea vasapiseikiana aneana maga, e naga, Te naata e pe masauna naga ega edakugoro au umai, ega tum̃ana pasagoro e, go ega tape dakati tea valadagoto aneana, go ega rausi au.

²⁵Nalakena naata waina e pe masauna naga ega mauti pauri namauriana aneana ega wo dape puoli ki nia: go naata waina e pe wo dape puoli ki namauriana aneana nalakena kinau ega wo pap̃ai a.

²⁶Nalakena naatam̃oli sikai ega wo p̃ia asa nasava waina e pe talua maramana mamau po dape puoli ki naatana? Kite naatam̃oli sikai ega wo pitua ki nasava naga ega taulua naatana asa.

²⁷Nalakena naatam̃oli Natuna ega wo umai pilake nasamasamaana ki Tamana nara ma agelo aneana maga euga wo mamau umai; go ragi wanogoe ega wo lagati dua sara naatam̃oli euga sikasikai ega vae namariana adeada.

²⁸Lomau a noa ki mu, naga Tea maga waina eu lawodu nea te seara kakada eu doko, waina euga wo da katidogo namateana mau, pa pa euga wo punusi naatam̃oli Natuna ega to umai namarakiana aneana.