Read Nguna Togoa Etafe North MATAIO 17 Bible Online

MATAIO 17 - Nguna Togoa Etafe North bible

MATAIO 17

¹Go edaku ki naaleatia latesa Yesu e piragi lua Petero, go Yakobo, go taina Yoane, po piragi ra sake pano paki tava varau pakilagi sikai eu pei nara mau:

²go e panop̃ota naraeda: go naraena e maramalaga dapala elo, go sugoro aneana maga eu dara dapala namarama.

³Go kuga leo, Moses go Eliyah ero pakilina ki da ero pasa ki nia, nara ma nae eu dum̃ada pasa paki da.

⁴Go Petero e pasadara, po noa ki Yesu, e naga, Nawota, e p̃ia naga tuga toko nea; ku pe masauna, a pe wo mari tap̃aup̃au dolu nea; anigo sikai go agi Moses sikai, go agi Eliyah sikai.

⁵Ragi waina e ko do pasa, kuga leo, napopouru marama sikai e melugoro ra: go, kuga leo, nadaleo sikai waina e dave napopouru wanogoe umai, e naga, Tea waia e pei Natugu tea dodomiana aginau, waina a midoa ki m̃ata ki nia; kuga to dogo e.

⁶Go ragi waina tea vasapiseikiana maga eu dogo e, eu dowo dap̃olosiwo, po mataku p̃arua.

⁷Go Yesu e umai po kisidogo ra, po naga, Kuga tuleana, go kuga ta mataku mau.

⁸Go ragi waina eu sike namatada eu da punusi te naata mau, ma Yesu e sikina.

⁹Go ragi waina eu do siwo pae tava umai, Yesu e pasa parati ki da, po naga, Kuga ta noa ki te naata navunusiana waina mau, pa pa naatam̃oli Natuna ega wo duleana m̃elu dua ki tea mate maga.

¹⁰Go tea vasapiseikiana maga eu pusuusu paki nia, eu naga, Go ekasana tea midiri maga eu noa naga e one Eliyah one naga ega vea umai?

¹¹Go e pasadara po naga, Eliyah ega wo umai lomau, go ega wo dape liliua ki naleo maga mamau puti:

¹²ma a noa ki mu, naga Eliyah e umai sua, go eu da atae m̃ata ki nia mau, ma eu mari paki nia tea maga waina eu masauna. Dapala nogoe naatam̃oli Natuna ma ega wo sua narogokitesaana pae ara.

¹³Ragi wanogoe tea vasapiseikiana maga eu midoaki atae naga e pasa ki da nalo ni Yoane Bapetiso.

¹⁴Go ragi waina eu rumai paki taua ni naatam̃oli, naatam̃oli sikai e umai punusi a, e ditip̃atua paki nia, po naga,

¹⁵Nawota, p̃a dodomi natugu naanoai: nalakena e doropa po sua narogokitesaana warua asa: nalakena e paka laapa dowo paki nakapu, go e paka laapa dowo paki noai.

¹⁶Go a piragi a umai punusi tea vasapiseikiana anigo maga, go eu mari sa mari pauri a.

¹⁷Go Yesu e pasadara po naga, Tagona O waina ku da saralomau mau go waina ku do mari lolo p̃ota, aga wo sikoti mu doko pa pa paki seve ragi? Aga wo soki mu pa pa paki seve ragi? Kuga viragi a umai paki nea punusi au.

¹⁸Go Yesu e pasa kasua ki nia; go dimon e dave m̃elu dua ki nia pano: go piakiki naanoai wanogoe e pei tea maripauriana pae aura wanogoe pa pa.

¹⁹Ragi wanogoe tea vasapiseikiana maga eu rumai punusi Yesu eu pei nara mau, po naga, Kinami au mari sa mari a e dave pano nalakena nasava?

²⁰Go e noa ki da, e naga, Nalakena nasaralomau‐kiki‐ana animu: nalakena lomau a noa ki mu, naga Ku pe veani nasaralomauana dapala napati ni sinapi sikai, ku pe noa ki tava waia, ku pe naga, P̃a m̃elu dua ki tokora waia paki tokora wanana pano; go e pe wo m̃elu pano; go ku pe wo da marisap̃o mari te navatuna mau.

²¹(Ma ku pe ta dapasavasa po da pali mau tea tapala waia eu pe ta dave pano mau.)

²²Go ragi waina eu doko Calilea doko, Yesu e noa ki da, e naga, Naatam̃oli Natuna ega wo pei tea vituakiana paki nam̃elearu ni naatam̃oli;

²³go euga wo maripunue a, go naaleatia ketolu ega wo pei tea sikeana ega tuleana. Go eu susue p̃arua.

²⁴Go ragi waina eu rumai paki Kapernaum, tea maga waina eu dape shekel magovai eu rumai punusi Petero, po naga, Tea vasapiseiki animu e pitua ki shekel magovai kite?

²⁵E naga, Ioro. Go ragi waina e umai paki ekopu ni nasum̃a, Yesu e sopua pasa ki nia, e naga, Ku midoa ki nasava, Simon? Nawota maga ni maramana eu dape nasautoga kite keneso ki sei maga? Ki natuda maga, kite ki tea p̃ota maga?

²⁶Go ragi waina e naga, Ki tea p̃ota maga, Yesu e noa ki nia, e naga, Nalakena tea wanogoe natuda maga eu doko.

²⁷Ma naga tuga ta mari ra euga tapilagona mau, p̃a vaki natasi, po nadi ki tagau sikai, po dape dakati naika waina ega wo pea sake; go ragi waina p̃a wolagati nawokana, p̃a wo pap̃ai shekel sikai asa: p̃a tape tea wanogoe, po maginau go manigo dua ra asa.