Read Nguna Togoa Etafe North MATAIO 18 Bible Online

MATAIO 18 - Nguna Togoa Etafe North bible

MATAIO 18

¹Aura wanogoe tea vasapiseikiana maga eu rumai punusi Yesu, po naga, Sei e pei tea warua liu namarakiana ni nakoroatelagi?

²Go e soso piakiki kiki sikai e umai punusi a, go e lawo ki nia m̃aleoputo kakada,

³po naga, Lomau a noa ki mu, naga Ku pe ta maradoa mau, po da pei tea tapala piakiki kiki maga mau, ku pe ta sili paki namarakiana ni nakoroatelagi mau.

⁴Nalakena tea wanogoe naata waina ega wo dum̃ana doro e pakitano ega tapala piakiki kiki waia, nae e pei tea warua liu namarakiana ni nakoroatelagi.

⁵Go naata waina e pe wo piragi piakiki kiki sikai dapala waia pae nagisagu e pe viragi au:

⁶Ma naata waina e pe wo mari tea kirikiri maga wanogoe waina eu saralomau au sikai kakada e pe tapilagona, e pe wia ki nia naga vatumaa warua sikai ega vei tea sarakiana nanoana, go naga ega vei tea tiroakiana natasi pua.

⁷Ai ki maramana nalakena tea tapilagonaana maga! Nalakena e one asa one naga tea tapilagonaana maga euga umai; ma ai ki naatam̃oli waina tea tapilagonaana e pae asa umai!

⁸Go nam̃elearum̃a kite nam̃elem̃a e pe mari ko ku dapilagona, p̃a taekotovi a, po nadi ki nia ega m̃elu dua ki‐go pano: e p̃ia ki‐go naga p̃a vei gole kite pito po sili namauriana liu waina ku pe veani nam̃elearum̃a dua kite namelem̃a dua po pei tea nadikiana paki nakapu waina e du mau du.

⁹Go namatam̃a e pe mari ko ku dapilagona, p̃a vaku lua e, po nadi ki nia ega m̃elu dua ki‐go pano: e pe wia ki‐go naga p̃a sili namauriana po pei mata sikai liu waina ku pe veani namatam̃a dua po pei tea nadikiana paki Gehenna ni nakapu.

¹⁰Kuga vunusi naga kuga ta midoaki p̃alo ki tea kirikiri maga wanogoe sikai kakada mau; nalakena a noa ki mu, naga agelo adeada maga waina eu doko nakoroatelagi eu do leo punusi narae ni Tamagu waina e doko nakoroatelagi.

¹¹(Nalakena naatam̃oli Natuna e umai naga ega mautipauri tea waina e sasap̃o puoli.)

¹²Ku midoa ki nasava? Naatam̃oli sikai e pe veani shiip p̃onotia sikai, go sikai kakada e pe surata sasap̃o, e pe ta doropusi rualima loveti tamate loveti eu madoko tava, po pano laaga tea waina e surata sasap̃o kite?

¹³Go waina e pe vap̃ai a, lomau a noa ki mu naga e laelaea p̃arua nalo ni tea wanogoe liu waina e laelaea nalo ni tea rualima loveti tamate loveti waina eu da surata sasap̃o.

¹⁴Dapala nogoe e da pei tea masauana mau narae ni Tamamu waina e doko nakoroatelagi, naga tea kirikiri maga wanogoe sikai kakada ega mate puoli.

¹⁵Go taim̃a e pe mari naleo sa dip̃a ko, p̃a vano, p̃a vasa ki nia asa koroga rua mau: e pe rogo parati ki‐go, ku pe talua taim̃a.

¹⁶Ma e pe ta dogo parati ki‐go mau, p̃a va piragi tea p̃ota sikai kite ega rua kuga mamau pano, naga sara navasaana euga vei tea lawokiana pae nawoka ni tea noasokisoki dua kite dolu.

¹⁷Go e pe karai naga ega rogo parati ki da, p̃a noa ki ekalesia asa: go e pe moro karai naga ega rogo parati ki ekalesia, ega vei tea tapala tea ni nalauna p̃ota go tea tape nasautoga paki‐go.

¹⁸Lomau a noa ki mu, naga Naleo maga waina kuga wo solisoki ra maramana euga wo pei tea solisokiana nakoroatelagi: go naleo maga waina kuga wo peresi ra maramana euga wo pei tea veresiana nakoroatelagi;

¹⁹A moro noa ki mu, naga nimu tea rua kakamu ero pe saisai ki nap̃op̃oda nalo ni te navatuna waina eroga wo datago asa, e pe wo madeada pei tea mariana pae Tamagu waina e doko nakoroatelagi;

²⁰Nalakena tokora waina edua kite edolu eu saisai asa doko nagisagu, a doko tokora wanogoe m̃aleoputo kakada.

²¹Ragi wanogoe Petero e umai, po noa ki nia, e naga, Nawota, taigu ega mari naleo sa dip̃a au paka visa, go aga maneana midoakikorokoro e?

²²Pa pa paka larua kite? Yesu e noa ki nia, e naga, A da noa ki‐go, Pa pa paka larua; ma, Pa pa paka rualima larua paka larua.

²³Nalakena tea wanogoe namarakiana ni nakoroatelagi e dakiusi naatam̃oli sikai waina e pei nawota, go waina e masauna naga ega vuausi namariana ki tea suasua aneana maga.

²⁴Go ragi waina e atulake naga ega vuausi, sikai e pei tea viragiana umai punusi a, waina talenta tivilia sikai eu one asa one.

²⁵Ma nalakena e dika tea waina ega lagati dua e asa, nawota aneana e pitip̃aki naga ega vei tea soriana, nae ma anagoroi, go natuna maga, go naleo maga mamau puti waina e peani ra, go naga tea waina e one asa one ega vei tea lagatipituakiana.

²⁶Nalakena tea wanogoe tea suasua wanogoe e dowo pakitano po lotu ki nia, po naga, Nawota, p̃a vei maritasoki paki nau, go aga wo lagati dua ko.

²⁷Go nawota ki tea suasua wanogoe e maritadodomi a, po peresi lua e, po maneana midoakikorokoro tea waina e one asa one.

²⁸Ma tea suasua wanogoe e dave pano, po sua tea sikai ni tea maga waina eu mamau pei tea suasua, waina denario aneana p̃onotia sikai eu one asa one; go e puati, po liko namanuna, po naga, P̃a lagatipitua ki tea waina e one ako one.

²⁹Go tea suasua kerua wanogoe e dowo pakitano po pavarani a, po naga, P̃a vei maritasoki paki nau, go aga wo lagati dua ko.

³⁰Go e karai: ma e pano po nadi ki nia paki ekopu ni nasum̃a ni navavaigoroana, pa pa ega lagatipitua ki tea waina e ona asa one.

³¹Ma ragi waina tea maga waina eu mamau pei tea suasua eu punusi tea maga waina eu pei tea mariana, eu susue p̃arua, go eu rumai po noakisai nawota adeada tea maga mamau puti waina eu pei tea mariana.

³²Ragi wanogoe nawota aneana e soso e umai punusi a, po noa ki nia, e naga, Tea suasua sigisigileo, a manigo midoakikorokoro puti tea maga waina eu one ako one, nalakena ku pavarani au asa:

³³e da one ako one naga p̃a dodomi tea waina koro dua pei tea suasua, ega tapala waina kinau a dodomi ko kite?

³⁴Go nawota aneana e maeto, po pitua ki nia paki tea varati maga, pa pa ega lagati pitua ki tea mamau waina e one asa one.

³⁵Dapala nogoe ma Tamagu ni nakoroatelagi ega wo mari a paki mu, sara naata kakamu waina e pe ta pae nap̃op̃ona magi taina midoakikorokoro.