Read Nguna Togoa Etafe North MATAIO 19 Bible Online

MATAIO 19 - Nguna Togoa Etafe North bible

MATAIO 19

¹Go e pakilina ragi waina Yesu e pasa sua navasaana maga wanogoe, naga e m̃elu dua ki Calilea pano, po umai paki kokoi maga ni Yudea taleva kerua ni Yordan;

²go taua warua maga ni naatam̃oli eu dausi a: go e mari pauri ra tokora wanogoe.

³Go Farisi seara eu rumai punusi a, eu maridogo e, po naga, E pae nawotaeana naga naatam̃oli sikai ega tip̃aki lua anagoroi nalakena sara nalakena kite?

⁴Go e pasadara po naga, Ku da peve mau, naga tea waina e mari ra pae naatulakeana pa pa e mari ra ero pei naanoai go nagoroi,

⁵po naga, Nalakena tea wanogoe naatam̃oli sikai ega toropusi tamana go p̃ilana eroga madoko, go ega vuluti anagoroi; go nara dua eroga wo pei nap̃okasi sikai maau?

⁶Nalakena tea wanogoe ero da moro pei edua mau, ma ero pei nap̃okasi sikai maau. Nalakena tea wanogoe tea waina Sup̃e e pilasai ki nia, naatam̃oli ega ta mari a ega vamawota mau.

⁷Eu noa ki nia, eu naga, Go ekasana Moses e pitip̃aki naga euga vitua ki tusi sikai ni natoropusiana, po dip̃aki lua e.

⁸E noa ki da, e naga, Moses nalakena nakasuaana ni nap̃op̃omu e suasua ki mu naga kuga tip̃aki lua amugoroi maga: ma e da dapala nogoe pae naatulakeana mau.

⁹Go a noa ki mu, naga Naata waina e pe tip̃aki lua anagoroi, namaripeleana e pe ta pei nalakena mau, go waina e pe tawiri tea p̃ota sikai, e maripele: go tea waina e dawiri tea waina e pei tea tip̃akiluaana e maripele.

¹⁰Tea vasapiseikiana maga eu noa ki nia, eu naga, Naleo ni naanoai sikoti anagoroi e pe tapala nogoe, e pe ta p̃ia mau naga ega vitawiri.

¹¹Ma e noa ki da, e naga, Tea maga mamau puti eu da dape atae navasaana wanogoe mau, ma tea maga waina e pei tea vituakiana paki da eu sikida dape atae a.

¹²Nalakena atavau seara eu doko, waina eu pakilina dapala nogoe pae nap̃ele ni p̃ilada: go atavau seara eu doko, waina naatam̃oli maga eu mari ra eu pei atavau: go atavau seara eu doko, waina eu dum̃ada mari ra eu pei atavau nalakena namarakiana ni nakoroatelagi. Naata waina e mari atae dape a ega tape a.

¹³Ragi wanogoe piakirikiri kiki maga eu pei tea viragiana umai punusi a, naga ega toropusi nam̃elearuna ara, po dapasavasa: go tea vasapiseikiana maga eu pasa kasua ki da asa.

¹⁴Ma Yesu e naga, Kuga suasua ki piakirikiri kiki maga naga euga umai punusi au, go kuga ta dip̃agoro ra mau: nalakena namarakiana ni nakoroatelagi e pei tea ni tea tapalada maga.

¹⁵Go e doropusi nam̃elearuna ara, po m̃elu dua ki tokora wanogoe pano.

¹⁶Go kuga leo, sikai e umai punusi a po naga, Tea vasapiseiki, aga mari seve naleo wia, naga aga veani namauriana waina ega tu mau du?

¹⁷Go e noa ki nia, e naga, Ekasana ku pusuusu paki nau nalo ni tea waina e p̃ia? Sikai e doko waina e p̃ia: ma ku pe masauna naga p̃a sili paki namauriana, p̃a rogo paratiki natip̃akiana maga.

¹⁸E noa ki nia, e naga, Seve tea maga? Go Yesu e naga, P̃a ta maripunue mau, P̃a ta maripele mau, P̃a ta panako mau, P̃a ta noasokisoki sorosoro mau,

¹⁹P̃a dodomadagani tamam̃a go p̃ilam̃a: go, P̃a dodomi tea ni m̃aladigi ki‐go ega tapala waina ku dum̃am̃a dodomi ko.

²⁰Natureai wanogoe e noa ki nia, e naga, A pavaigoro tea maga mamau puti wanogoe; a ko dika nasava?

²¹Yesu e noa ki nia e naga, Ku pe masauna naga p̃a wia lua, p̃a vano, p̃a sori naleo maga waina ku peani ra, go p̃a tua tea tika maga asa, go p̃a wo peani naleo tauakiana nakoroatelagi: go p̃a umai, p̃a rausi au.

²²Ma ragi waina natureai wanogoe e dogo navasaana wanogoe, e susue pano: nalakena e pei tea sikai waina e peani tea veaniana warua maga.

²³Go Yesu e noa ki tea vasapiseikiana aneana maga, e naga, Lomau a noa ki mu, naga E kasua ki naatam̃oli sogolapa sikai naga ega sili paki namarakiana ni nakoroatelagi.

²⁴Go a moro noa ki mu, naga E manainai ki kamel sikai naga ega sili darave malo masai ni tea tuturi sikai, ma e kasua ki naatam̃oli sogolapa sikai naga ega sili paki namarakiana ki Sup̃e.

²⁵Go ragi waina tea vasapiseikiana maga eu dogo e, eu saram̃akoto p̃arua, po naga, Go sei e mari atae pei tea mautipauriana?

²⁶Go Yesu e leo punusi ra po noa ki da, e naga, Pae naatam̃oli maga tea wanogoe e da pei tea mariataeana mau; ma pae Sup̃e naleo maga mamau puti eu pei tea mariataeana.

²⁷Ragi wanogoe Petero e pasadara po noa ki nia, e naga, P̃a leo, kinami au doropusi naleo maga mamau puti eu madoko, go au dausi ko; auga wo peani nasava asa?

²⁸Go Yesu e noa ki da, e naga, Lomau a noa ki mu, naga nimu waina ku dausi au, ragi ni namoropakilinaana ragi waina naatam̃oli Natuna ega wo dasake malo tasake ni nasamasamaana aneana, nimu ma kuga wo dasake malo tasake rualima sikai tamate dua, doko do pasap̃otae naworawora ni Israel rualima sikai tamate dua.

²⁹Go sara naata waina eu doropusi nasum̃a maga, kite taida maga, kite goreda maga, kite tamada, kite p̃ilada, kite natuda maga, kite vanua maga, nalakena nagisagu, euga wo dape paka p̃onotia sikai, go euga wo peani namauriana waina ega wo du mau du.

³⁰Ma tea vea laapa euga wo edaku; go tea edaku laapa euga wo pea.