Read Nguna Togoa Etafe North MATAIO 2 Bible Online

MATAIO 2 - Nguna Togoa Etafe North bible

MATAIO 2

¹Go ragi waina Yesu e pakilina Bethlehem ni Yudea naaleatia maga ki Herod nawota, kuga leo, makoi seara eu pae ist umai paki Yerusalem,

²eu naga, Tea waina e po pakilina Nawota ki naka ni Yudea wai? Nalakena au punusi m̃asoe kakana ist, go au po umai naga auga lotu ki nia.

³Go ragi waina Herod nawota e dogo tea wanogoe, e m̃anaunau asa, go Yerusalem mamau eu sikoti a asa.

⁴Go e saisai ki puti tea viri warua maga go tea midiri maga ni narei, po pusuusu paki da ki tokora waina Kristo ega vakilina asa.

⁵Go eu noa ki nia, eu naga, Bethlehem ni Yudea: nalakena e pei tea midiriana pae profeta dapala waia,

⁶Go nigo Bethlehem, navanua ki Yudah, Ku da pei tea kiki sa ni tea maraki maga ki Yudah mau: Nalakena tea maramara sikai ega wo m̃elu ako umai, Waina ega wo leo paratiki pakale narei aginau Israel.

⁷Ragi wanogoe Herod e soso panako makoi maga, po pusuusu ki parati ki nia paki da ki ragi ni m̃asoe waina e pakilina.

⁸Go e dip̃aki lua ra paki Bethlehem, po naga, Kuga vano po pusuusu ki parati ki nia nalo ni piakiki vusavusa wanogoe; go ragi waina kuga vap̃ai a, kuga moro umai po noakisai au asa, naga kinau ma aga valoti po lotu ki nia.

⁹Go nara, ragi waina eu dogo sua navasaana ki nawota, eu surata pano; go kuga leo, m̃asoe, waina eu punusi a ist, e pea ki da, pa pa e umai po lawodu elagi ni tokora waina piakiki vusavusa e doko asa.

¹⁰Go ragi waina eu punusi m̃asoe, eu laelaea ki nalaelaeaana warua liu.

¹¹Go eu rumai paki ekopu ni nasum̃a po punusi piakiki vusavusa go p̃ilana Maria; go eu dowo pakitano po lotu ki nia; go eu p̃olagati bokes adeada maga po dua e navituaana maga, kold go libano go murra.

¹²Go nalakena eu pei tea vasakorokoroana pae nap̃erea sikai naga euga ta liliu pa punusi Herod mau, eu pae napua p̃ota sikai po m̃elu paki navanua adeada pano.

¹³Go ragi waina nara eu m̃elu pano sua, kuga leo, agelo sikai ki Yehovah e pakilina ki Yosef nap̃erea sikai, po naga, P̃a tuleana po piragi lua piakiki vusavusa go p̃ilana, go p̃a sava paki Ityipt pano, go p̃a toko asa doko pa pa aga wo noa ki‐go: nalakena Herod ega wo laaga piakiki vusavusa naga ega mari punue a.

¹⁴Go e duleana po piragi lua piakiki vusavusa go p̃ilana p̃ogi, po m̃elu paki Ityipt pano; po doko asa doko pa pa Herod e mate:

¹⁵naga tea waina Yehovah e noa e pae profeta ega lolomana, e naga, A soso natugu e m̃elu dua ki Ityipt umai.

¹⁶Ragi wanogoe Herod, waina e punusi naga makoi maga eu midoakip̃aro ki nia, e maeto p̃arua, po dip̃aki lua, po mari punue puti piakiki naanoai maga waina eu doko Bethlehem, go waina eu doko nadigi kakana maga mamau puti, waina eu da liu natau dua mau, dapala ragi waina e pusuusu ki paratiki nia paki makoi maga.

¹⁷Ragi wanogoe tea waina e pei tea noaana pae profeta Yeremiah e lolomana, e naga,

¹⁸Nadaleo sikai e pei tea rogoana Ramah, Natagiana go nalalagaarovaana warua, Rahel e do dagisi natuna maga; Go e da masauna mau naga ega vei tea vasapakavakaleana, nalakena eu da doko mau.

¹⁹Ma ragi waina Herod e mate, kuga leo, agelo sikai ki Yehovah e pakilina ki Yosef nap̃erea sikai Ityipt,

²⁰e naga, P̃a tuleana po piragi lua piakiki vusavusa go p̃ilana, go p̃a vaki navanua ki Israel pano: nalakena tea maga waina eu laaga namauriana ki piakiki vusavusa eu mate.

²¹Go e duleana po piragi lua piakiki vusavusa go p̃ilana, po umai paki navanua ni Israel.

²²Ma ragi waina e dogo naga Arkelao e do maramara dap̃au Yudea po du oli tamana Herod, e mataku paki asa; go nalakena e pei tea vasakorokoroana pae nap̃erea sikai, e m̃elu paki tokora maga ni Calilea pano,

²³po umai doko natokoana sikai waina e pei tea sosoana ki Nasareth: naga tea waina e pei tea noaana pae profeta maga ega lolomana, naga ega vei tea sosoana ki naatam̃oli sikai ni Nasareth.