Read Nguna Togoa Etafe North MATAIO 20 Bible Online

MATAIO 20 - Nguna Togoa Etafe North bible

MATAIO 20

¹Nalakena namarakiana ni nakoroatelagi e dakiusi naatam̃oli sikai waina e pei talakea ni nasum̃a, waina e dave pano ragi ni namakotokotoana, naga ega vasadapui tea wosiwosi maga paki roara ni vaine aneana.

²Go ragi waina nae go tea wosiwosi maga eu mamau noa naga namoriana adeada ega vei denario sikai naaleatia sikai, e dip̃aki lua ra paki roara ni vaine aneana.

³Go e dave pano e pisari aura ketolu, po punusi tea p̃ota seara eu lawodu m̃oli du malo ni navakokotoana; go e noa ki da,

⁴e naga, Nimu ma kuga vaki roara ni vaine pano, go tea waina e pe leana a pe wo dua mu asa.

⁵Go eu pano. E moro dave pano e pisari aura kelatesa go aura keloveti, go e mari dapala nogoe.

⁶Go e dave pano e pisari aura kerualima sikai tamate sikai, go e pap̃ai tea p̃ota seara eu lawodu; go e noa ki da, e naga, Ekasana ku lawodu m̃oli du tokora waia naaleatia mamau?

⁷Eu noa ki nia, eu naga, Nalakena te naata sikai e da pasadapui gami mau. E noa ki da, e naga, Nimu ma kuga vaki roara ni vaine pano.

⁸Go ragi waina e po maligo, talakea ni roara ni vaine e noa ki tasiga aneana, e naga, P̃a soso tea wosiwosi maga, go p̃a tua ra namoriana adeada, p̃a atulake pae tea edaku maga pa pa paki tea vea maga.

⁹Go ragi waina tea ni aura kerualima sikai tamate sikai eu rumai, eu dape denario sikasikai sarasara ra.

¹⁰Go ragi waina tea vea maga eu rumai, eu midoa ki nia naga euga tape ega warua rua; go nara ma eu dape denario sikasikai sarasara ra.

¹¹Go ragi waina eu dape a eu dauruuru dip̃a talakea ni nasum̃a,

¹²eu naga, Tea edaku maga waia eu p̃osiwosi aura sikai maau, go ku mari ra eu pataka gami, waina au p̃osiwosi naaleatia mamau go elo e dara gami.

¹³Ma e pasadara po noa ki sikai kakada, e naga, Tagu, a da mari dagelegele paki‐go mau: toro da noa naga namoriana ega vei denario sikai kite?

¹⁴P̃a tape dakati tea anigo; go p̃a vano; a masauna naga aga tua tea edaku waia, ega tapala waina a dua ko asa.

¹⁵E da pae nawotaeana naga aga mari tea waina a masauna ki tea aginau kite? Namatam̃a e sa, nalakena kinau a p̃ia kite?

¹⁶Dapala nogoe tea edaku maga euga wo pea go tea vea maga euga wo edaku.

¹⁷Go ragi waina Yesu e do sake paki Yerusalem pano, e piragi lua tea vasapiseikiana maga eu pei nara mau, go ragi waina eu do pae napua e noa ki da,

¹⁸e naga, Kuga leo, tu do sake paki Yerusalem pano; go naatam̃oli Natuna ega wo pei tea vituakiana paki tea viri warua maga go tea midiri maga;

¹⁹go euga wo dip̃akotovi a naga ega mate, go euga wo pitua ki nia paki tea ni nalauna p̃ota maga naga euga marisaudoa ki nia, go naga euga varati a, go naga euga turi a nakau valadagoto: go naaleatia ketolu ega wo pei tea sikeana ega wo duleana.

²⁰Ragi wanogoe Sebedaio natuna maga p̃ilada e umai punusi a, nara ma natuna maga eu mamau umai, e lotu ki nia, po datagovi a ki te navatuna sikai.

²¹Go e noa ki nia, e naga, Ku masau nasava? E noa ki nia, e naga, P̃a vitip̃aki naga natugu dua waia, sikai ega tasake pisari nam̃elearum̃a ni matua, go sikai ega tasake pisari nam̃elearum̃a ni mawiri, namarakiana anigo.

²²Ma Yesu e pasadara po naga, Koro da atae tea waina koro datago asa mau. Koro mari atae munu lasa munu waina kinau aga wo munugi a kite? Ero noa ki nia, ero naga.

²³Aro mari atae. E noa ki da, e naga, Lasa munu aginau koroga wo munugi a lomau: ma naga koroga tasake pisari nam̃elearugu ni matua, go pisari nam̃elearugu ni mawiri, e da pei aginau naga aga vitua ki nia mau, ma e pei agi tea maga waina e madeada pei tea tawonakiana pae Tamagu.

²⁴Go ragi waina tea rualima sikai eu dogo e, eu maeto p̃arua nalo ni taida dua wanogoe.

²⁵Ma Yesu e soso ra umai punusi a, po naga, Ku atae naga tea maraki maga ni nalauna p̃ota maga eu maraki kasua ki da, go tea warua maga eu mari naveinawotaana dap̃au ra.

²⁶Ega wo da dapala nogoe m̃aleoputo kakamu mau: ma naata waina e pe masauna naga ega vei tea warua ni m̃aleoputo kakamu e pe wo pei tea suasua animu;

²⁷go naata waina e pe masauna naga ega vei tea vea ni m̃aleoputo kakamu ega vei naviti animu:

²⁸ega tapala waina naatam̃oli Natuna e da umai naga euga maneana suasua mau, ma e umai naga ega madeada suasua, go naga ega vitua ki namauriana aneana ega vei naulu ni natauluaana oli tea laapa.

²⁹Go ragi waina eu surata m̃elu dua ki Yeriko pano, taua warua sikai ni naatam̃oli eu dausi a.

³⁰Go kuga leo, naatam̃oli kesa dua waina ero do natano pisari nadigi ni napua, ragi waina ero dogo naga Yesu e do liu ra pano, ero pioso, po naga, Nawota, p̃a dodomi gami, nigo natu ni David.

³¹Go taua ni naatam̃oli maga eu pasa kasua ki da, naga eroga vunuta: ma ero moro pioso p̃arua liu po naga, Nawota, p̃a dodomi gami, nigo natu ni David.

³²Go Yesu e du dorogo, po soso ra, po naga, Koro masauna naga aga manimu mari nasava?

³³Ero noa ki nia, ero naga, Nawota, naga namatagami euga vei tea wolagatiana.

³⁴Go Yesu e maritadodomi ra, po kisidogo namatada: go ero moro leosai m̃araverave, po dausi a pano.