Read Nguna Togoa Etafe North MATAIO 22 Bible Online

MATAIO 22 - Nguna Togoa Etafe North bible

MATAIO 22

¹Go Yesu e pasadara po moro pasa ki da pae naluluakia maga, e naga,

²Namarakiana ni nakoroatelagi e pei tea mariana e dakiusi nawota sikai, waina e magi natuna naanoai mari nakaniana ni navitawiriana sikai,

³po dip̃aki lua tea suasua aneana maga naga euga soso tea maga waina eu pei tea vitautauana paki nakaniana ni navitawiriana: go eu karai umai.

⁴E moro dip̃aki lua tea suasua p̃ota seara, po naga, Kuga noa ki tea maga waina eu pei tea vitautauana, kuga naga, Kuga leo, a po mari m̃ata ki nakaniana aginau: oks aginau maga go tea vaganiana m̃anopunopu aginau maga eu pei tea maripunueana, go sara naleo eu p̃ia: kuga umai paki nakaniana ni navitawiriana.

⁵Ma eu sara tea p̃alo asa, po pano, sikai e paki vanua aneana, go sikai e paki navakokotoana aneana:

⁶go tea p̃ota maga eu pua soki tea suasua aneana maga, po mari sa ki da, po mari punue ra.

⁷Ma nawota e maeto; go e dip̃aki lua taua maga ni naatam̃oli navakalo aneana maga, po mari punuvunue tea mari punue maga wanogoe, po dokoni natokoana adeada.

⁸Ragi wanogoe e noa ki tea suasua aneana maga, e naga, Navitawiriana e pei tea marim̃atakiana lomau, ma tea maga waina eu pei tea vitautauana eu da p̃ia ki nia mau.

⁹Nalakena tea wanogoe kuga vaki malo rana maga ni napua maga, go tea maga waina kuga wo pap̃ai ra, kuga vitautau ara paki nakaniana ni navitawiriana.

¹⁰Go tea suasua maga wanogoe eu dave pano paki napua maga, po piragi saisai ki tea maga mamau puti waina eu pap̃ai ra, tea sa maga go tea wia maga: go navitawiriana e pura ki tea maga waina eu kere one ganikani.

¹¹Ma ragi waina nawota e umai paki ekopu naga ega leo punusi tea maga waina eu kere one ganikani, e punusi naatam̃oli sikai asa waina e da suni sugoro ni navitawiriana mau:

¹²go e noa ki nia, e naga, Tagu, ku umai paki ekopu nea ragi waina ku dika sugoro ni navitawiriana dapale sava?

¹³Go e punuta. Ragi wanogoe nawota e noa ki tea suasua warua maga, e naga, Kuga soli natuana go naruna, po nadi ki nia paki namaligo ni etaku ni uvea; tokora wanogoe natagiana go nakati‐paki‐ana eroga wo doko asa.

¹⁴Nalakena tea laapa eu pei tea vitautauana, ma tea visa maau eu pei tea matadoaana.

¹⁵Ragi wanogoe Farisi maga eu pano, po seke dapala waina euga soli a ki navasaana aneana.

¹⁶Go eu dip̃aki lua tea vasapiseikiana adeada maga, sikoti naatam̃oli maga ki Herod, eu pano punusi a, eu naga, Tea vasapiseiki, au atae naga ku pei lomau, go naga ku do pasakiseiki napua ki Sup̃e pae nalomauana, po da midoaki paratiki te naata sikai mau: nalakena ku da leo punusi narae ni naatam̃oli maga mau.

¹⁷Nalakena tea wanogoe p̃a noa ki gami, Ku midoa ki nasava? E pae nawotaeana naga tuga tua Kaisar nasautoga, kite ega tika?

¹⁸Ma Yesu e atae nasigisigileoana adeada, po naga, Ekasana ku maridogo au, nakalep̃o maga?

¹⁹Kuga visei ki nau m̃ane ni nasautoga.

²⁰Go eu maneana dape denario sikai umai. Go e noa ki da, e naga, Nunu ni sei waia go namidirana?

²¹Eu noa ki nia, eu naga, Tea ni Kaisar. Ragi wanogoe e noa ki da, e naga, Nalakena tea wanogoe kuga tua Kaisar naleo maga ki Kaisar; go kuga tua Sup̃e naleo maga ki Sup̃e.

²²Go ragi waina eu dogo e, eu maga, po doropusi a e madoko, po pano.

²³Naaleatia wanogoe Sadduki seara eu rumai punusi a, waina eu noa naga namoroduleanaana e dika: go eu pusuusu paki nia, po naga,

²⁴Tea vasapiseiki, Moses e naga, Te naata e pe mate ragi waina e da peani te natuna seara mau, taina ega viragi anagoroi, po magi taina mari naworana euga vakilina.

²⁵Go tamataida larua eu sikoti gami doko: go takalapa e pitawiri po mate, go e dika naworana po magi taina doropusi anagoroi;

²⁶dapala nogoe kerua ma, go ketolu, pa pa paki kelarua.

²⁷Go edaku ki puti ra nagoroi wanogoe e mate.

²⁸Nalakena tea wanogoe ragi ni namoroduleanaana ega wo pei nagoroi ki sei ni tea larua wanogoe? Nalakena eu mamau puti peani a.

²⁹Ma Yesu e pasa dara po noa ki da, e naga, Ku midoaki pele, nalakena ku da atae navasaana midiriana maga mau, go nakasuaana ki Sup̃e mau.

³⁰Nalakena ragi ni namoroduleanaana eu da pitawiri mau, go eu da pei tea vituakiana eu laki mau, ma eu dapala agelo maga waina eu doko nakoroatelagi.

³¹Ma nalo ni namoroduleanaana ni tea mate maga, ku da peve tea waina e pei tea noaana paki mu pae Sup̃e kite?

³²E naga, Kinau a pei Sup̃e ki Abraham, go Sup̃e ki Isaak, go Sup̃e ki Yakob. Sup̃e e da pei Sup̃e ki tea mate maga mau, ma e pei Sup̃e ki tea mauri maga.

³³Go ragi waina taua maga ni naatam̃oli eu dogo e, eu saram̃akoto navasapiseikiana aneana.

³⁴Ma Farisi maga, ragi waina eu dogo naga e mari Sadduki maga eu punuta, eu dum̃ada saisai ki da.

³⁵Go sikai kakada, tea ni nawotaeana sikai, e pusuusu paki nia, e maridogo e,

³⁶e naga, Tea vasapiseiki, seve natip̃akiana ni nawotaeana e pei tea warua?

³⁷Go e noa ki nia, e naga, P̃a dodomi Yehovah Sup̃e anigo ki nap̃op̃om̃a mamau, go ki naatam̃a mamau, go ki namidodoana anigo mamau.

³⁸Tea wanogoe e pei natip̃akiana warua go e pea.

³⁹Go kerua sikai waina e dakiusi a e pei tea waia, P̃a dodomi tea ni m̃aladigi ki‐go ega tapala waina ku dum̃am̃a dodomi ko.

⁴⁰Natip̃akiana dua wanogoe nawotaeana mamau e dau ara dau, go profeta maga.

⁴¹Go ragi waina Farisi maga eu saisai one, Yesu e pusuusu paki da, e naga,

⁴²Nimu ku midoa ki nasava nalo ni Kristo? E pei natu ni sei? Eu noa ki nia, eu naga, Natu ni David.

⁴³E noa ki da, e naga, Ma ekasana David e soso e pae Naatana ki Nawota, e naga,

⁴⁴Yehovah e noa ki Nawota aginau, e naga, P̃a toko pisari nam̃elearugu ni matua, Pa pa aga mari tea kokona ki‐go maga euga toko etano ki nam̃elem̃a maga?

⁴⁵Go David e pe soso e ki Nawota, e pei natuna dapale sava?

⁴⁶Go te naata sikai e da mari atae pasadara e te navasaana sikai mau, go te naata sikai e da moro piviari pusuusu ki te navatuna paki nia mau pae naaleatia wanogoe pa pa.