Read Nguna Togoa Etafe North MATAIO 24 Bible Online

MATAIO 24 - Nguna Togoa Etafe North bible

MATAIO 24

¹Go Yesu e dave m̃elu dua ki nasum̃a tapu, po surata pano; go tea vasapiseikiana aneana maga eu rumai punusi a naga euga visei ki nia natavagiana maga ni nasum̃a tapu.

²Ma e pasadara po noa ki da, e naga, Ku da punusi naleo maga mamau puti waia kite? Lomau a noa ki mu, naga Vatu sikai ega wo da pei tea toropusiana nea elagi ni vatu sikai mau, waina ega wo da pei tea rakaiana mau.

³Go ragi waina e do natano tava ni Oliva, tea vasapiseikiana maga eu rumai punusi a eu pei nara mau, eu naga, P̃a noa ki gami, tea maga wanogoe euga wo doko seve ragi? Go navaivaiana ni naumaiana anigo, go ni naaleatia edaku mau ni maramana ega wo pei nasava?

⁴Go Yesu e pasadara po noa ki da, e naga, Kuga vunusi naga te naata ega ta piragi sasap̃o ki mu mau.

⁵Nalakena tea laapa euga wo umai pae nagisagu, po naga, Kinau a pei Kristo; go euga wo piragi sasap̃o ki tea laapa.

⁶Go kuga wo dogo navakalo maga go narogorogoana maga ni navakalo maga: kuga vunusi naga kuga ta mataku mau: nalakena tea maga wanogoe e one ara one naga euga vakilina; ma namatap̃agona edaku e ko puoli.

⁷Nalakena nalauna ega wo duleana dip̃a nalauna, go namarakiana dip̃a namarakiana: go navitoloana maga go naruru maga euga wo doko tokora sikasikai.

⁸Ma tea maga mamau puti wanogoe eu pei naatulakeana ni narogokitesaana maga.

⁹Ragi wanogoe euga wo pitua ki mu paki nariesokiana, go euga wo mari punue mu: go kuga wo pei tea vilosiana pae nalauna maga mamau puti nalakena nagisagu.

¹⁰Ragi wanogoe tea laapa euga wo pei tea mariana euga tapilagona, go euga wo dum̃ada pitua ki da, po dum̃ada pilosi ra.

¹¹Go profeta sorosoro laapa euga wo pakilina, po piragi sasap̃o ki tea laapa.

¹²Go nalakena namarinaleotageleana ega wo p̃arua, nadodomiana ki tea laapa ega wo maladi.

¹³Ma tea waina e soki du pa pa paki namatap̃agona edaku, nae ega wo pei tea mautipauriana.

¹⁴Go narogorogoana wia waia ni namarakiana ega wo pei tea rogorogokiana maramana mamau, naga ega vei nanoasokisokiana sikai paki nalauna maga mamau puti; go ragi wanogoe namatap̃agona edaku ega wo umai.

¹⁵Nalakena tea wanogoe ragi waina kuga wo punusi tea mamaragokiana waina e mari e pei maso maladi, waina e pei tea noaana pae profeta Daniel, e lawodu tokora tapu (tea waina e peve ega midoaki atae),

¹⁶ragi wanogoe tea maga waina eu doko Yudea euga sava paki tava maga pano:

¹⁷tea waina e doko nam̃asua ni nasum̃a ega ta siwo mau naga ega tape lua naleo maga waina eu doko ekopu ni nasum̃a aneana:

¹⁸go tea waina e doko vanua ega ta liliu mau naga ega tape sugoro kovagoro aneana.

¹⁹Ma ai ki tea maga waina eu diena go ki tea maga waina eu pitua ki susu naaleatia maga wanogoe!

²⁰Go kuga tapasavasa naga ragi ni nasavaduakiana animu ega ta pei ragi ni namaladiana mau, go naga ega ta pei sabbath sikai mau:

²¹nalakena ragi wanogoe nariesokiana warua ega wo doko asa, dapala waina e da pakilina mau pae naatulakeana ni maramana pa pa paki ragi waia, go waina ega wo da moro pakilina mau.

²²Go naaleatia maga wanogoe eu pe ta pei tea sulakotoviana mau, te nap̃okasi sikai e pe ta pei tea mautipauriana mau: ma nalakena tea matadoaana maga naaleatia maga wanogoe euga wo pei tea sulakotkoviana.

²³Ragi wanogoe te naata e pe noa ki mu, e pe naga, Kuga leo, Kristo e doko nea, kite e doko nea; kuga ta saralomau asa mau.

²⁴Nalakena Kristo sorosoro maga, go profeta sorosoro maga euga wo pakilina, po pitua ki navaivaiana warua maga, go tea ni namagaana maga; dapala waina e pe vei tea mariataeana, eu pe viragi sasap̃o ki tea matadoaana maga.

²⁵Kuga leo, a po pea noa ki mu asa.

²⁶Nalakena tea wanogoe eu pe noa ki mu, eu pe naga, Kuga leo, e doko masop̃alo, kuga ta dave pano mau: Kuga leo, e doko em̃ago tukituki maga, kuga ta saralomau asa mau.

²⁷Nalakena dapala waina navila e dave pae ist umai, po pei tea vunusiana pa pa paki west; naumaiana ki naatam̃oli Natuna ega wo dapala nogoe.

²⁸Tokora waina nap̃atoko ni tea mate e one asa, tokora wanogoe ikila maga euga wo saisai paki asa.

²⁹Ma m̃araverave, edaku ki nariesokiana ni naaleatia maga wanogoe, elo ega wo maligo, go atelagi ega wo da pitua ki namarama kakana mau, go m̃asoe maga euga wo dowo pae nakoroatelagi, go tea kasua maga ni nakoroatelagi euga wo pei tea varivariakiana:

³⁰Go ragi wanogoe navaivaiana ni naatam̃oli Natuna ega wo pakilina nakoroatelagi: go ragi wanogoe naworawora maga mamau puti ni maramana euga wo lalagaarova, go euga wo punusi naatam̃oli Natuna ega wo doko napopouru maga ni nakoroatelagi do umai pilake nakasuana go nasamasamaana warua.

³¹Go ega wo dip̃aki lua agelo aneana maga pilake nadaleo kasua ni paiga sikai, go euga wo piragi saisai ki tea matadoaana aneana maga, m̃elu dua ki nalagi pati, pae namatap̃ago sikai ni nakoroatelagi pa pa paki namatap̃ago kerua kakana.

³²Ma kuga atae ki napuliva naluluakia kakana: ragi waina arana e po melumelu, go nauluna maga eu pakilina, ku atae naga ragi ni navivitinuana e pei m̃aladigi;

³³dapala nogoe nimu ma, ragi waina kuga wo punusi naleo maga mamau puti wanogoe, kuga atae naga e pei m̃aladigi, naga e doko pisari namata ni nasum̃a maga.

³⁴Lomau a noa ki mu, naga Tagona waia ega wo da pano puoli mau, pa pa tea maga mamau puti wanogoe euga wo pakilina.

³⁵Nakoroatelagi go maramana eroga wo pano puoli, ma navasaana aginau maga euga wo da pano puoli mau.

³⁶Ma nalo ni naaleatia go ni aura wanogoe te naata e da atae a mau, go agelo maga ni nakoroatelagi eu da atae a mau, go Natuna mau, ma Tamagu e sikina atae a.

³⁷Go dakiusi waina e doko naaleatia maga ki Noah, naumaiana ki naatam̃oli Natuna ega wo dapala nogoe.

³⁸Nalakena dakiusi waina e doko naaleatia maga wanogoe waina eu pea ki natave, eu do ganikani po do munu, eu do dawiri po do pitua eu laki, pa pa paki naaleatia waina Noah e paki ekopu ni areka,

³⁹go eu da atae mau pa pa natave e umai po dape lua puti ra; naumaiana ki naatam̃oli Natuna ega wo dapala nogoe.

⁴⁰Ragi wanogoe naatam̃oli dua eroga wo doko vanua; sikai e pei tea viragiluaana, go sikai e pei tea toropusiana e doko:

⁴¹nagoroi dua eroga wo mani vatumaa; sikai e pei tea viragiluaana go sikai e pei tea toropusiana e doko.

⁴²Nalakena tea wanogoe kuga to leleogoro: nalakena ku da atae seve naaleatia Nawota animu ega wo umai.

⁴³Ma kuga atae tea waia, naga talakea ni nasum̃a e pe atae seve navavaigoroana waina tea vanako ega umai asa, e pe leleogoro, go e pe ta suasua ki nasum̃a aneana naga ega vei tea kilidaraveana mau.

⁴⁴Nalakena tea wanogoe nimu ma kuga vei tea marim̃ata sua: nalakena aura waina ku da midoaki nia mau naatam̃oli Natuna ega wo umai asa.

⁴⁵Go sei e pei tea suasua lomau go manumatua, waina nawota aneana e lawo ki nia e dap̃au tea maga ni nasum̃a aneana, naga ega tua ra navinaga ragi kakana?

⁴⁶Tea suasua wanogoe waina nawota aneana, ragi waina ega wo umai, po pap̃ai a e do mari dapala nogoe, e maropa.

⁴⁷Lomau a noa ki mu, naga ega wo lawo ki nia ega tap̃au naleo maga mamau puti waina e peani ra.

⁴⁸Ma tea suasua sa wanogoe e pe noa nap̃op̃ona, e pe naga, Nawota aginau e mari daliali;

⁴⁹go e pe atulake naga ega p̃okati tea maga waina eu mamau pei tea suasua, go e pe ganikani po munu sikoti tea matamaloku maga;

⁵⁰nawota ki tea suasua wanogoe e pe wo umai naaleatia sikai waina e da leogoro asa mau, go aura sikai waina e da atae a mau,

⁵¹go e pe wo parati p̃arua ki nia, po pasadawona ki matele veaniana aneana ega sikoti nakalep̃o maga: tokora wanogoe natagiana go nakati‐pati‐ana eroga wo doko asa.