Read Nguna Togoa Etafe North MATAIO 25 Bible Online

MATAIO 25 - Nguna Togoa Etafe North bible

MATAIO 25

¹Ragi wanogoe namarakiana ni nakoroatelagi ega wo dakiusi nagoroi atara rualima sikai, waina eu puati nasulu adeada maga, po dave pano naga euga sua tea vitawiri.

²Go elima kakada eu manumatavusa, go elima eu manumatua.

³Nalakena tea manumatavusa maga, ragi waina eu puati nasulu adeada maga, eu da dape te naroro seara e pilake ra mau:

⁴ma tea manumatua maga eu dape naroro e doko lasa adeada maga pilake nasulu adeada maga.

⁵Go ragi waina tea vitawiri e mari daliali, eu mamau puti maturu leleo po maturu daratara.

⁶Ma p̃ogi matua naviosoana sikai e pakilina, e naga, Kuga leo, tea vitawiri! Kuga tave umai naga kuga sua e.

⁷Ragi wanogoe nagoroi atara maga wanogoe eu duleana puti, po marim̃ata ki nasulu adeada maga.

⁸Go tea manumatavusa maga eu noa ki tea manumatua maga, eu naga, Kuga tua gami naroro animu seara kakana; nalakena nasulu aginami maga teuga mate.

⁹Ma tea manumatua maga eu pasadara, eu naga, Ee; e pe wo da pataka puti gida mau: e p̃ia kuga va punusi tea maga waina eu sorisori, go kuga tum̃amu manimu pakotovi seara.

¹⁰Go ragi waina nara eu pano naga euga vakokoto, tea vitawiri e umai; go tea maga waina eu marim̃ata sua eu sikoti a paki ekopu paki nakaniana ni navitawiriana: go namata e pei tea kokoroana.

¹¹Go nagoroi atara p̃ota maga wanogoe ma eu edaku umai, po naga; Nawota, Nawota, p̃a maginami p̃olagati.

¹²Ma e pasadara po naga, Lomau a noa ki mu, naga A da atae mu mau.

¹³Nalakena tea wanogoe kuga to leleogoro, nalakena ku da atae naaleatia mau go ku da atae aura mau.

¹⁴Nalakena e dapala ragi waina naatam̃oli sikai e naga ega vaki navanua p̃ota sikai, po soso tea suasua aneana maga, po pitua ki naleo aneana maga paki da.

¹⁵Go e dua sikai talenta lima, go e dua sikai talenta dua, go e dua sikai talenta sikai; e dua ra sarasara puti ra tea waina e pataka ni namariataeana adeada; go e paki navanua p̃ota pano.

¹⁶Tea waina e dape talenta lima e pano m̃araverave po p̃osiwosi ara, po mari talenta lima p̃ota ara.

¹⁷Go dapala nogoe tea waina e dape dua nae ma e dalua tea rua p̃ota.

¹⁸Ma tea waina e dape sikai e pano po kili natano, po suru ki m̃ane ki nawota aneana.

¹⁹Go edaku ki ragi varau nawota ki tea suasua maga wanogoe e umai, po puausi namariana adeada maga.

²⁰Go tea waina e dape talenta lima e umai po dape talenta lima p̃ota umai, po naga, Nawota, ku pitua ki talenta lima paki nau: p̃a leo, a dalua talenta lima p̃ota.

²¹Nawota aneana e noa ki nia, e naga, E p̃ia, tea suasua wia go lomau: ku mari lomau ragi waina ku dap̃au naleo pisa maau, aga wo lawo ki‐go p̃a wo dap̃au naleo laapa: p̃a sili paki nalaelaeaana ki nawota anigo.

²²Go tea waina e dape talenta dua e umai, po naga. Nawota ku pitua ki talenta dua paki nau: p̃a leo, a dalua talenta dua p̃ota.

²³Nawota aneana e noa ki nia, e naga, E p̃ia, tea suasua wia go lomau; ku mari lomau ragi waina ku dap̃au naleo pisa maau, aga wo lawo ki‐go p̃a wo dap̃au naleo laapa: p̃a sili paki nalaelaeaana ki nawota anigo.

²⁴Go tea waina e dape talenta sikai e umai po naga, Nawota, a atae ko naga ku pei naatam̃oli kasua sikai, ku do dagaukotovi tokora waina ku da sapuraki asa mau, po do dauaki pae tokora waina ku da daperavera asa mau:

²⁵Go a mataku, po pano po suru ki talenta anigo natano: p̃a leo, ku peani tea anigo.

²⁶Ma nawota aneana e pasadara po noa ki nia, e naga, Tea suasua sigisigileo go mamale, ku atae naga a do dagaukotovi tokora waina a da sapuraki asa mau, po do dauaki pae tokora waina a da daperavera asa mau;

²⁷nalakena tea wanogoe e one ako one naga p̃a vitua ki m̃ane aginau dua tea ni bank asa, go ragi waina a umai a pe moro dape tea aginau pilake narogoviana kakana.

²⁸Nalakena tea wanogoe kuga tape lua talenta kiana, po pitua ki nia paki tea waina e peani talenta rualima sikai.

²⁹Nalakena sara naata waina eu peani, ega wo pei tea vituakiana paki da, go euga wo peani tea laapa: ma tea waina e da peani mau, tea waina e peani a ega wo pei tea tapeluaana kiana.

³⁰Go kuga nadi ki tea suasua p̃alo wanae paki namaligo ni etaku ni uvea: tokora wanogoe natagiana go nakati‐pati‐ana eroga wo doko asa.

³¹Ma ragi waina naatam̃oli Natuna ega wo umai nasamasamaana aneana, go agelo maga mamau puti euga wo sikoti a umai, ragi wanogoe ega wo dasake malo tasake ni nasamasamaana aneana:

³²go nalauna maga mamau puti euga wo pei tea saisaikiana paki naraena: go ega wo mari p̃otae ra dum̃ada m̃elu dua ki da pano, ega tapala waina tea leo paratiki shiip e do mari p̃otae ki shiip eu m̃elu dua ki naninani maga pano:

³³go ega wo lawo ki shiip euga wo doko pisari nam̃elearuna ni matua, ma naninani maga pisari nam̃elearuna ni mawiri.

³⁴Ragi wanogoe Nawota ega wo noa ki tea maga waina eu doko pisari nam̃elearuna ni matua, ega wo naga, Kuga umai, tea vasam̃atakiana maga ki Tamagu, kuga veani namarakiana waina e manimu pei tea tawonakiana pae ragi ni nanadi‐ki‐laketano‐ana ni maramana:

³⁵nalakena a pitolo, go ku dua au a ganikani: a madou, go ku dua au a munu: a pei nam̃enaki, go ku piragi au paki ekopu;

³⁶a dika ki sugoro, go ku sugoro au: a sasana, go ku umai leo paratiki nau: a doko ekopu ni nasum̃a ni navavaigoroana, go ku umai punusi au.

³⁷Ragi wanogoe tea leana maga euga wo pasadara e, po naga, Nawota, seve ragi au punusi ko ku pitolo, go au dua ko ku ganikani?

³⁸Kite ku madou, go au dua ko ku munu? Go seve ragi au punusi ko ku pei nam̃enaki, go au piragi ko paki ekopu? Kite ku dika ki sugoro, go au sugoro ko?

³⁹Go seve ragi au punusi ko ku sasana, kite ku doko ekopu ni nasum̃a ni navavaigoroana, go au paloti punusi ko?

⁴⁰Go Nawota ega wo pasadara po noa ki da, ega wo naga, Lomau a noa ki mu, naga Nalo ni waina ku mari a paki taigu maga waia, tea kiki sa maga sikai kakada, ku mari a paki nau.

⁴¹Ragi wanogoe ega wo noa ki tea maga waina eu doko pisari nam̃elearuna ni mawiri, ega wo naga, Kuga m̃elu dua ki nau pano, tea vasasakiana maga, paki nakapu waina e du mau du, waina e magi diabolo go agelo aneana maga pei tea tawonakiana:

⁴²nalakena a pitolo, go ku da dua au a ganikani mau: a madou, go ku da dua au a munu mau: a pei nam̃enaki,

⁴³go ku da piragi au paki ekopu mau; a dika ki sugoro, go ku da sugoro au mau; a sasana, go a doko ekopu ni nasum̃a ni navavaigoroana, go ku da umai leo paratiki nau mau.

⁴⁴Ragi wanogoe nara ma euga wo pasadara, po naga, Nawota, seve ragi au punusi ko ku pitolo, kite ku madou, kite ku pei nam̃enaki, kite ku dika ki sugoro, kite ku sasana, kite ku doko ekopu ni nasum̃a ni navavaigoroana, go au da manigo suasua mau?

⁴⁵Ragi wanogoe ega wo pasadara ra, po naga, Lomau a noa ki mu, naga Nalo ni waina ku da mari a paki tea maga waia tea kiki sa maga sikai kakada mau, ku da mari a paki nau mau.

⁴⁶Go nara euga wo paki navaratiana waina e du mau du: ma tea leana maga euga wo paki namauriana waina e du mau du.