Read Nguna Togoa Etafe North MATAIO 26 Bible Online

MATAIO 26 - Nguna Togoa Etafe North bible

MATAIO 26

¹Go e pakilina, ragi waina Yesu e mari sua navasaana maga mamau puti wanogoe, naga e noa ki tea vasapiseikiana aneana maga, e naga,

²Ku atae naga edaku ki naaleatia dua go ega wo pei nasaisaiana ni navakalauana, go naatam̃oli Natuna ega wo pei tea vituakiana naga ega vei tea turiana nakau valadagoto.

³Ragi wanogoe tea viri warua maga, go tea matua maga ni narei eu pei tea saisaikiana paki namasopa ni nasum̃a ki tea viri warua liu, waina e pei tea salagisaana ki Kaiafas;

⁴go eu pei taua seke naga euga vuasoki Yesu ki nasorosoroana, po mari punue a.

⁵Ma eu naga, Tuga ta mari a ragi ni nasaisaiana mau, naga navasap̃araiana ega ta pakilina m̃aleoputo ni narei mau.

⁶Go ragi waina Yesu e doko Bethania, ekopu ni nasum̃a ki Simon waina e pei lepero,

⁷nagoroi sikai e umai punusi a, waina e dape lasa ni naroro sikai ni naroro lolo ni naulu laapa, go e daki nia nap̃auna, ragi waina e kere one ganikani.

⁸Ma ragi waina tea vasapiseikiana maga eu punusi a, eu midoaki sa ki nia po naga, Ekasana namarisakiana waia?

⁹Nalakena naroro lolo waia e mari atae pei tea soriana raki tea warua, po pei tea vituakiana paki tea tika maga.

¹⁰Ma Yesu e atae a po noa ki da, e naga, Ekasana ku mari nagoroi waia e dogokitesa? Nalakena e po mari namariana wia sikai paki nau.

¹¹Nalakena ku peani tea tika maga eu sikoti mu doko sara ragi; ma ku da peani au sara ragi mau.

¹²Nalakena nae e daki naroro lolo waia nap̃atokogu, e mari a naga ega marim̃ata ki nau raki naovakiana.

¹³Lomau a noa ki mu, naga Tokora waina narogorogoana wia waia e pe wo pei tea rogorogokiana asa maramana mamau, tea waina nagoroi waia e po mari a tea wanogoe ma ega wo pei tea noaana naga nae ega vei tea midoakilagatiana asa.

¹⁴Ragi wanogoe tea sikai ni tea rualima sikai tamate dua, waina e pei tea salagisaana ki Yuda Iskariote, e pano punusi tea viri warua maga,

¹⁵po naga, Ku suasua naga kuga tua au nasava, go aga wo pitua ki nia paki mu? Go eu maneana dowogi matele ni silver rualima dolu.

¹⁶Go pae ragi wanogoe pa pa e laaga ragi wia naga ega vitua ki nia paki da.

¹⁷Go naaleatia vea ni bred waina leven e dika asa, tea vasapiseikiana maga eu rumai punusi Yesu, po naga, Seve tokora ku masauna naga auga manigo mari m̃ataki asa naga p̃a kani navakalauana asa.

¹⁸Go e naga, Kuga vaki natokoana pano punusi naatam̃oli sikai, go kuga noa ki nia, kuga naga, Tea Vasapiseiki e naga, Ragi aginau e pei m̃aladigi; aga mari navakalauana nasum̃a anigo, kinami ma tea vasapiseikiana aginau maga auga mamau.

¹⁹Go tea vasapiseikiana maga eu mari dapala waina Yesu e dip̃a ki da asa; go eu marim̃ata ki navakalauana.

²⁰Go ragi waina e maligo, e doko natano ganikani sikoti tea vasapiseikiana rualima sikai tamate dua;

²¹go ragi waina eu do ganikani, e naga, Lomau a noa ki mu, naga sikai kakamu ega wo pitua ki nau.

²²Go eu susue p̃arua, po pae asa noa ki nia sara naata sikasikai, eu naga, E pei kinau, Nawota, kite?

²³Go e pasadara po naga, Tea waina e doko nam̃elearuna lasa sikoti au, nae ega wo pitua ki nau.

²⁴Naatam̃oli Natuna e do pano lomau, dapala waina e pei tea midiriana nalo kakana: ma ai ki naatam̃oli waina naatam̃oli Natuna e pei tea vituakiana pae asa! Naatam̃oli wanogoe e pe ta pakilina mau e pe wia ki nia.

²⁵Go Yuda, waina e pitua ki nia, e pasadara po naga, E pei kinau, Rabbi, kite? E noa ki nia, e naga, Ku pasa gara.

²⁶Go ragi waina eu do ganikani, Yesu e dape bred, po pasam̃ataki, po p̃oraworae a; go e dua tea vasapiseikiana maga, po naga, Kuga tape, kuga kanikani; tea waia e pei nap̃atokogu.

²⁷Go e dape lasa munu sikai, po pasadodom̃ataki, po dua ra, po naga, Kuga mamau puti munugi a;

²⁸nalakena tea waia e pei nadagu ni navasasokiana vau, waina e magi tea laapa pei tea takiana paki namidoakikorokoroana ni namarinaleosaana maga.

²⁹Ma a noa ki mu, naga Aga wo da munu seara ni nawa waia ni vaine mau, pae ragi waia pa pa paki naaleatia waina aga wo munugi a sikoti mu tea vau namarakiana ki Tamagu.

³⁰Go ragi waina eu lega sua nalegaana sikai, eu dave paki tava ni Oliva pano.

³¹Ragi wanogoe Yesu e noa ki da, e naga, Nimu kuga wo mamau puti pei tea mariana kuga tapilagona nalo kakagu p̃ogi waia: nalakena e pei tea midiriana, e naga, Aga wo atugi tea leo paratiki shiip, go shiip ni navata euga wo pei tea taperaverakiana.

³²Ma edaku ki aga wo pei tea sikeana duleana, aga wo pea ki mu paki Calilea pano.

³³Ma Petero e pasa dara po noa ki nia, e naga, Tea maga mamau puti eu pe tapilagona nalo kakam̃a, ma kinau aga wo da dapilagona te nap̃ogi mau.

³⁴Yesu e noa ki nia, e naga, Lomau a noa ki‐go, naga p̃ogi waia, ragi waina toa ega ko da dare mau, p̃a wo paka tolu pasa goro au.

³⁵Petero e noa ki nia, e naga, E pe vei naga aga mate sikoti ko, a pe wo da pasagoro ko mau. Go tea vasapiseikiana maga mamau puti eu noa dapala nogoe.

³⁶Ragi wanogoe Yesu ma nara eu mamau umai paki tokora sikai waina nagisana e pei Cethsemane, go e noa ki tea vasapiseikiana aneana maga, e naga, Kuga to natano tokora waia, ma kinau aga ko paki tokora wanana po dapasavasa.

³⁷Go e piragi lua Petero go Sebedaio natuna dua eu sikoti a pano, go e atulake susue po dogokitesa p̃arua.

³⁸Ragi wanogoe e noa ki da, e naga, Naatagu e susue p̃arua, pa pa taga mate: kuga toko nea, po do leleogoro sikoti au.

³⁹Go e paki uvea kiki, po dowo dap̃olosiwo, po dapasavasa, po naga, Mama O, lasa munu waia e pe va dua ki atae, ega va dua ki nau pano: ma ega ta dapala waina kinau a masauna mau, ma ega tapala waina nigo ku masauna.

⁴⁰Go e umai punusi tea vasapiseikiana maga, po pap̃ai ra eu maturu, go e noa ki Petero, e naga, Nasava, ku dika nakasuaana naga kuga leleogoro sikoti au aura sikai kite?

⁴¹Kuga leleogoro po dapasavasa, naga kuga ta dowo paki namaridogoana mau: naatamu e suasua lomau, ma nap̃okasimu e manainai.

⁴²E moro pano sala kerua, po dapasavasa, po naga, Mama aginau O, tea waia e pe mari sa liu au pano, ma naga aga munugi a, namasauana anigo ega vei tea mariana.

⁴³Go e moro umai po pap̃ai ra eu maturu, nalakena namatada eu madaga.

⁴⁴Go e moro doropusi ra eu doko, po pano, po dapasavasa sala ketolu, po moro noa navasaana sikai maau wanogoe.

⁴⁵Ragi wanogoe e umai punusi tea vasapiseikiana maga, po noa ki da, e naga, Kuga to maturu ragi waia, po maromaro: kuga leo, aura e pei m̃aladigi, go naatam̃oli Natuna e pei tea vituakiana paki nam̃elearu ni tea marinaleosa maga.

⁴⁶Kuga tuleana, tuga vano: kuga leo, tea waina e pitua ki nau e doko m̃aladigi.

⁴⁷Go ragi waina e ko do pasa, kuga leo, Yuda, tea sikai ni tea rualima sikai tamate dua, e umai, go taua warua ni naatam̃oli eu sikoti a umai, eu puati lova go naap̃e, eu m̃elu tea viri warua maga go tea matua maga ni narei.

⁴⁸Go tea waina e pitua ki nia e dua ra navaivaiana sikai, e naga, Tea waina aga wo dum̃ili a, e pei nae: kuga vua soki a.

⁴⁹Go e m̃araverave umai punusi Yesu, po naga, P̃a laelaea, Rabbi; go e dum̃idum̃ili a.

⁵⁰Go Yesu e noa ki nia, e naga, Tagu, nalo ni waina ku umai. Ragi wanogoe eu rumai po doropusi nam̃elearuda Yesu, po puasoki a.

⁵¹Go kuga leo, sikai ni tea maga waina eu sikoti Yesu e sai ki nam̃elearuna, po sailua lova aneana, po dae tea suasua ki tea viri warua liu, po dae lua nadaligana.

⁵²Ragi wanogoe Yesu e noa ki nia, e naga, P̃a sai ki lova anigo liliu paki naliana: nalakena tea maga waina eu puati lova euga wo mate ki lova.

⁵³Ku midoa ki nia naga a mari sa pavarani Tamagu ragi waia, go nae e pe wo maginau dip̃akilua umai agelo maga tea laapa liu lecione rualima sikai tamate dua kite?

⁵⁴Ma waina e pe tapala nogoe navasaana midiriana maga eu pe lolomana dapale sava, waina eu noa naga e one asa one naga ega tapala waia?

⁵⁵Aura wanogoe Yesu e noa ki taua maga ni naatam̃oli, e naga, Nimu ku pua lova go naap̃e naga kuga vua soki au dapala waina ku pe umai dip̃a tea tape pavakoto sikai? Sara naaleatia a dasake ekopu ni nasum̃a tapu po do pasapiseiki, go ku da puasoki au mau.

⁵⁶Ma tea mamau waia e po pakilina, naga navasaana midiriana maga ki profeta maga euga lolomana. Ragi wanogoe tea vasapiseikiana maga mamau puti eu doropusi a e doko, po sava pano.

⁵⁷Go tea maga waina eu pua soki Yesu eu piragi lua e paki nasum̃a ki Kaiafas tea viri warua liu, tokora waina tea midiri maga go tea matua maga eu pei tea saisaikiana asa.

⁵⁸Ma Petero e dausi a uvea, pa pa paki namasopa ni nasum̃a ki tea viri warua liu, po sili paki asa, po do natano sikoti tasiga maga, naga ega vunusi namatap̃agona edaku.

⁵⁹Go tea viri warua maga go nasaisaiana mamau eu laaga nanoasokisokiana sorosoro dip̃a Yesu, naga euga maripunue a;

⁶⁰go eu da pap̃ai a mau, go tea noasokisoki sorosoro laapa eu rumai.

⁶¹Ma edua ero edaku umai, po naga, Naatam̃oli waia e naga, A mari atae dakai nasum̃a tapu ki Sup̃e, po davagi a naaleatia dolu.

⁶²Go tea viri warua liu e duleana, po noa ki nia, e naga, Ku da pasadara te navatuna mau kite? Nara ero noasokisoki dip̃a ko nasava?

⁶³Ma Yesu e punuta doko. Go tea viri warua liu e noa ki nia, e naga, A mari ko p̃a vivisa pae Sup̃e mauri, naga p̃a noa ki gami asa, nigo ku pei Kristo, Natu ni Sup̃e kite?

⁶⁴Yesu e noa ki nia, e naga, Nigo ku po noa e: ma a noa ki mu, naga Pae ragi waia pa pa kuga wo punusi naatam̃oli Natuna ega wo doko pisari nam̃elearu ni matua ni nakasuana, po do umai doko napopouru maga ni nakoroatelagi.

⁶⁵Ragi wanogoe tea viri warua liu e pua p̃orae sugoro aneana maga, po naga, E po pasasaki: tuga moro kasa ki tea noa sokisoki maga? Kuga leo, ku po dogo navasasakiana ragi waia: nimu ku midoa ki nasava?

⁶⁶Eu pasa dara po naga, E pei tea waina ega mate.

⁶⁷Ragi wanogoe eu daniu naraena po dip̃a e: go seara eu dapagi a,

⁶⁸po naga, P̃a vasapua paki gami, Kristo, tea waina e p̃okati ko e pei sei?

⁶⁹Ma Petero e doko katama namasopa ni nasum̃a: go nagoroi atara sikai e umai punusi a, po naga, Nigo ma ku sikoti Yesu tea ni Calilea.

⁷⁰Ma e pasagoro e narae ni tea mamau puti, po naga, A da atae tea waina ku noa e mau.

⁷¹Go ragi waina e dave paki nawosaia pano, nagoroi atara p̃ota sikai e punusi a, po noa ki tea maga waina eu du tokora wanogoe, e naga, Naatam̃oli waia ma e sikoti Yesu ni Nasareth.

⁷²Go e moro pasagoro e pilake navivisaana sikai, po naga, A da atae naatam̃oli wanogoe mau.

⁷³Go edaku ki ragi kiki tea maga waina eu lawodu eu rumai po noa ki Petero, eu naga, Lomau nigo ma ku pei sikai kakada; nalakena navasaana anigo ma e mari ko ku doko lina.

⁷⁴Ragi wanogoe e atulake naga ega vasasaki po pivisa, po naga, A da atae naatam̃oli wanogoe mau.

⁷⁵Go m̃araverave toa e dare. Go Petero e midoaki navasaana waina Yesu e noa e, e naga, Ragi waina toa ega ko da dare mau, p̃a wo paka tolu pasagoro au. Go e paki katama po dagi p̃arua.