Read Nguna Togoa Etafe North MATAIO 28 Bible Online

MATAIO 28 - Nguna Togoa Etafe North bible

MATAIO 28

¹Go nap̃ogiana ni naaleatia ni sabbath, ragi waina e atulake naga ega vei ragi ni namakotokotoana paki naaleatia vea ni wiik, Maria ni Macdala e umai go Maria kerua naga eroga vunusi matigo.

²Go kuga leo, naruru warua sikai e pakilina; nalakena agelo sikai ki Yehovah e pae nakoroatelagi siwo, po umai po malulua ki lua vatu wanogoe, po dasake asa.

³Go navunusiana kakana e dapala navila, go sugoro aneana e dare dapala sno:

⁴go nalakena namatau‐ki‐nia‐ana tea vavaigoro maga eu dururu, po pei tea mariana eu dapala naatam̃oli mate maga.

⁵Go agelo e pasadara po noa ki nagoroi maga, e naga, Nimu koroga ta mataku mau: nalakena a atae naga koro laaga Yesu, waina e pei tea turiana nakau valadagoto.

⁶E da doko nea mau; nalakena e po duleana, dapala waina e noa e. Koroga umai, koroga vunusi tokora waina Nawota e one sua asa.

⁷Go koroga vano m̃araverave, po noa ki tea vasapiseikiana aneana maga, naga E po duleana m̃elu dua ki tea mate; go koroga leo, e pea ki mu paki Calilea pano; tokora wanogoe kuga wo punusi a asa: koroga leo, a po noa ki mu asa.

⁸Go ero m̃elu dua ki matigo pano m̃araverave pilake namatakuana go nalaelaeaana warua, po sava naga eroga rogorogo ki nia paki tea vasapiseikiana aneana maga.

⁹Go kuga leo, Yesu e sua ra, po naga, Koroga laelaea. Go ero umai po puati nam̃elena maga, po lotu ki nia.

¹⁰Ragi wanogoe Yesu e noa ki da, e naga, Koroga ta nataku mau: koroga vano po dogorogo paki taigu maga naga euga vaki Calilea pano, go euga wo punusi au tokora wanogoe.

¹¹Go ragi waina ero do pano, kuga leo, te seara ni tagona ni tea vavai goro maga eu rumai paki natokoana, po dogorogo paki tea viri warua maga ki naleo maga mamau puti waina eu po pakilina.

¹²Go ragi waina nara ma tea matua maga eu mamau saisai, po pusum̃aki sua, eu dua naatam̃oli ni navakalo maga m̃ane laapa,

¹³po naga, Kuga noa, naga Tea vasapiseikiana aneana maga eu rumai p̃ogi, po panako e pano ragi waina kinami au maturu.

¹⁴Go tea wanogoe e pe vei tea rogorogokiana nadaliga ni tea maramara, kinami auga wo pasa ki nia, go kuga wo da sua tea sa mau.

¹⁵Go eu dape m̃ane wanogoe, po mari dapala waina eu pei tea vasapiseikiana asa: go navasaana wanogoe e pei tea vasadaperaverakiana m̃aleoputo ni naka ni Yudea pa pa paki masoso waia.

¹⁶Ma tea vasapiseikiana rualima sikai tamate sikai eu paki Calilea pano, paki tava waina Yesu e pea madeada datuta ki nia.

¹⁷Go ragi waina eu punusi a, eu lotu ki nia: ma te seara eu midaokisara.

¹⁸Go Yesu e umai punusi ra, po pasa ki da, e naga, Sara naveinawotaana e pei tea vituakiana paki nau nakoroatelagi go maramana.

¹⁹Nalakena tea wanogoe kuga vano, po pasapisei ki nalauna maga mamau puti, po bapetiso ra paki nagisa ni Tamana go ni Natuna go ni Naatana Tapu:

²⁰po do pasapisei ki da naga euga rogo paratiki tea maga mamau puti waina a dip̃a ki mu ara: go kuga leo, kinau aga sikoti mu doko naaleatia maga mamau puti pa pa paki naaleatia edaku mau ni maramana.