Read Nguna Togoa Etafe North MATAIO 3 Bible Online

MATAIO 3 - Nguna Togoa Etafe North bible

MATAIO 3

¹Go naaleatia maga wanogoe Yoane tea Bapetiso e umai, po do dogorogo masop̃alo ni Yudea,

²e naga, Kuga midoakidoa; nalakena namarakiana ni nakoroatelagi e pei m̃aladigi.

³Nalakena nae wanogoe e pei tea waina e pei tea noaana pae profeta Isaiah, e naga, Nadaleo ni tea waina e do pioso masop̃alo, Kuga marim̃ata ki napua ki Yehovah, Kuga mari napua doniana aneana maga euga leana.

⁴Go Yoane nae e suni sugoro aneana ni nam̃au ni kamel, go e dasoki namalona ki tasoki sikai ni nawili; go navinaga aneana e pei midiri maga go honi ni bii mila.

⁵Ragi wanogoe Yerusalem, go Yudea mamau, go navanua mamau waina e doko pisari Yordan eu dave pano punusi a;

⁶go e bapetiso ra noaisara Yordan, eu noa sai namarinaleosaana adeada maga.

⁷Ma ragi waina e punusi Farisi maga go Sadduki maga tea laapa kakada eu pa raki nabapetisoana aneana umai, e noa ki da, e naga, M̃aata sa natuda maga, sei e noakisai mu naga kuga sava dua ki namaetoana waina ega wo umai?

⁸Nalakena tea wanogoe kuga tau ki nawa waina e p̃ia ki namidoakidoaana:

⁹go kuga ta midoa ki nia noa nap̃alaumu, Abraham e pei tamagami: nalakena a noa ki mu, naga Sup̃e e mari atae magi Abraham mari natuna maga euga vakilina m̃elu vatu maga waia eu one.

¹⁰Go ragi waia tagoto e pei tea toropusiana e one pisari nalake ni nakau maga one: nalakena tea wanogoe sara nakau waina e da dau ki nawa wia mau e pei tea taeana e dowo, po pei tea nadikiana paki nakapu.

¹¹Kinau a bapetiso mu lomau ki noai paki namidoakidoaana: ma tea waina e edakugoro au umai e kasua liu au, a da p̃ia mau naga aga maneana dapetape nam̃elevasiana aneana maga: nae ega wo bapetiso mu ki Naatana Tapu go ki nakapu:

¹²tea silaki aneana e doko nam̃elearuna go ega wo mari malo wokalesue aneana ega tautau puti; go ega wo saisai ki whiit aneana paki ekopu ni nasum̃a ni whiit, ma ega wo dap̃ara ki nap̃olagana ki nakapu waina e pe ta pei tea punueana mau.

¹³Ragi wanogoe Yesu e pae Calilea umai paki Yordan punusi Yoane, naga Yoane ega bapetiso e.

¹⁴Ma Yoane e dip̃agoro e asa, po naga, Nigo, ku pe bapetiso au e pe wia, go nigo ku umai punusi au kite?

¹⁵Ma Yesu e pasadara po noa ki nia, e naga, P̃a suasua asa ragi waia: nalakena e p̃ia naga toroga mari sara namarinaleoleanaana ega tapala nogoe. Ragi wanogoe e suasua ki nia asa.

¹⁶Go Yesu, ragi waina e pei tea bapetisoana sua, e sake pae noai m̃araverave: go kuga leo, nakoroatelagi e maneana pamawota, go e punusi Naata ni Sup̃e e do siwo dakiusi tokopea sikai, po do umai lawo asa;

¹⁷go kuga leo, nadaleo sikai e dave nakoroatelagi umai, po naga, Tea waia e pei Natugu tea dodomiana aginau, waina a midoa ki m̃ata ki nia.