Read Nguna Togoa Etafe North MATAIO 5 Bible Online

MATAIO 5 - Nguna Togoa Etafe North bible

MATAIO 5

¹Go e punusi taua maga ni naatam̃oli maga wanogoe, po sake paki tava sikai; go ragi waina e dasake sua, tea vasapiseikiana aneana maga eu rumai punusi a:

²go e p̃olagati nawokana po pasa pisei ki da, e naga.

³Tea maga waina eu pei tea tika nalo ni naatada eu maropa: nalakena namarakiana ni nakoroatelagi e pei tea adeada.

⁴Tea maga waina eu do susue eu maropa: nalakena nara euga wo pei tea vasapakavakaleana.

⁵Tea maga waina eu matemate eu maropa: nalakena nara euga wo peani navanua.

⁶Tea maga waina eu do pitolo po do madou raki namarinaleoleanaana eu maropa: nalakena nara euga wo puka.

⁷Tea maga waina eu do dodomi eu maropa: nalakena nara euga wo pei tea dodomiana.

⁸Tea maga waina eu dautau pae nap̃op̃oda eu maropa: nalakena nara euga wo punusi Sup̃e.

⁹Tea maga waina eu do atukorokoro eu maropa: nalakena nara euga wo pei tea sosoana ki Sup̃e natuna maga.

¹⁰Tea maga waina eu pei tea kopaleleana nalakena namarinaleoleanaana eu maropa: nalakena namarakiana ni nakoroatelagi e pei tea adeada.

¹¹Ku maropa ragi waina euga wo pasa pinoa ki mu, po kopalele mu, po noa sorosoro sara namarinaleosaana dip̃a mu, nalakena kinau.

¹²Kuga laelaea, po sokamidi: nalakena namoriana animu e p̃arua nakoroatelagi: nalakena eu kopalele profeta maga waina eu pea ki mu e dapala nogoe.

¹³Nimu ku pei natasimena ni natano: ma nagagadiana ni natasimena e pe m̃elu, eu pe wo mari a ega wo moro gagadi ega tapale sava? E da moro p̃ia ki te navatuna mau, ma naga ega vei tea sapurakiana paki katama go naga ega vei tea vasiana ki nam̃ele ni naatam̃oli.

¹⁴Nimu ku pei namarama ni maramana. Natokoana waina e doko tava e pe ta sili mau.

¹⁵Go eu da dokoni nasulu, po doropusi a nawoka ni lasa totowo waina e dap̃olo siwo doko mau; ma eu dokoni a po lawo ki nia naliana; go e do magi tea maga mamau puti waina eu doko ekopu ni nasum̃a maramalaga.

¹⁶Namarama animu ega to maramalaga narae ni naatam̃oli maga ega tapala nogoe, naga euga vunusi namariana wia animu maga, po samasamani Tamamu waina e doko nakoroatelagi doko.

¹⁷Kuga ta midoa ki nia mau naga a umai naga aga tapera ki nawotaeana kite profeta maga: a da umai naga aga tapera mau, ma a umai naga aga vakavuro.

¹⁸Nalakena lomau a noa ki mu, a naga, Pa pa nakoroatelagi go maramana eroga wo pano puoli, iota sikai kite namatap̃ago sikai ni letter sikai ega wo da pano puoli ki nawotaeana mau, pa pa naleo maga mamau puti euga wo pei tea mariana sua.

¹⁹Nalakena tea wanogoe naata waina ega wo peresi tea kiki sa sikai ni natip̃akiana kiki maga wanogoe, go waina ega wo pasa pisei ki naatam̃oli maga dapala nogoe, ega wo pei tea sosoana ki tea kiki sa namarakiana ni nakoroatelagi: ma naata waina ega wo mari ra po pasa piseiki ara, nae ega wo pei tea sosoana ki tea warua namarakiana ni nakoroateagi.

²⁰Nakalena a noa ki mu, naga namarinaleoleanaana animu e pe ta p̃arua liu namarinaleoleanaana ki tea midiri maga go Farisi maga mau, kuga wo da sili paki namarakiana ni nakoroatelagi mau.

²¹Ku dogo naga e pei tea noaana paki naatam̃oli maga ni tuai, P̃a ta mari punue mau; go naata waina e mari punue ega wo pei tea waina ega vei tea vasap̃otaeana:

²²ma kinau a noa ki mu, naga sara naata waina eu maeto ki taida nalakena e dika euga wo pei tea waina euga vei tea vasap̃otaeana; go naata waina e noa ki taina, Ku pei tea p̃alo, ega wo pei tea waina ega vei tea vasap̃otaeana nasaisaiana ki tea vusum̃aki maga; go naata waina e naga, Ku pei lala, ega wo pei tea waina ega vaki nap̃aloa ni nakapu.

²³Nalakena tea wanogoe ku pe tape navituaana anigo paki tagura ni naviriana, po midoa ki nia tokora wanogoe naga taim̃a e peani te navatuna dip̃a ko,

²⁴p̃a toropusi navituaana anigo tokora wanogoe narae ni tagura ni naviriana, go p̃a vano, p̃a vea pei p̃op̃o wia paki taim̃a, go ragi wanogoe p̃a umai po pitua ki navituaana anigo.

²⁵Nap̃op̃om̃a ega wia paki tea vasadip̃a ko ega m̃araverave, ragi waina ku sikoti a doko napua; mase tea vasadip̃a e pe vitua ki‐go paki tea vasap̃otae, go tea vasap̃otae e pe vitua ki‐go paki tasiga, go ku pe vei tea nadikiana paki ekopu ni nasum̃a ni navavaiana.

²⁶Lomau a noa ki‐go, P̃a wo da dave tokora wanogoe umai mau pa pa p̃a wo lagati pitua ki farthig edaku.

²⁷Ku dogo naga e pei tea noaana,

²⁸P̃a ta maripele mau: ma kinau a noa ki mu, naga sara naata waina e leopunusi nagoroi sikai naga ega masausau paki nia e po maripele sua asa nap̃op̃ona.

²⁹Go namatam̃a ni matua e pe mari ko ku pe tapilagona, p̃a vaku lua e, po nadi ki nia ega m̃elu dua ki‐go pano: nalakena e p̃ia ki‐go naga naleo kakam̃a sikai ega vuoli, go naga nap̃atokom̃a mamau ega ta pei tea nadikiana paki p̃okasi mau.

³⁰Go nam̃elearum̃a ni matua e pe mari ko ku pe tapilagona, p̃a taekotovi a, po nadi ki nia ega m̃elu dua ki‐go p̃ano: nalakena e p̃ia ki‐go naga naleo kakam̃a sikai ega vuoli, go naga nap̃atokom̃a mamau ega ta paki p̃okasi pano mau.

³¹Go e pei tea noaana, naga Naata waina e pe wo dip̃aki lua anagoroi ega tua e namidiriana sikai ni natoropusiana:

³²ma kinau a noa ki mu, naga sara naata waina e dip̃aki lua nagoroi aneana, namaripeleana e pe ta pei nalakena mau, e mari a e pei tea maripele: go naata waina e dawiri tea waina e pei tea tip̃akiluaana e maripele.

³³Ku moro dogo naga e pei tea noaana paki naatam̃oli maga ni tuai, P̃a ta pivisa sorosoro mau, ma p̃a lagati dua Yehovah navivisaana anigo maga:

³⁴ma kinau a noa ki mu, P̃a ta pivisa dogo mau; p̃a ta pivisa pae nakoroatelagi mau, nalakena e pei malo tasake ki Sup̃e;

³⁵kite pae maramana, nalakena e pei malo vasiana ni nam̃elena; kite pae Yerusalem, nalakena e pei natokoana ki Nawota warua.

³⁶Go p̃a ta pivisa pae nap̃aum̃a mau, nalakena ku da mariatae mari napati nalolum̃a sikai e dare kite e loa mau.

³⁷Ma navasaana animu ega vei, Io, io; Ee, ee: go tea waina e p̃arua liu tea wanogoe e pei tea ni tea sa.

³⁸Ku dogo naga e pei tea noaana, Namata sikai ega tip̃a namata sikai, go napati sikai ega tip̃a napati sikai:

³⁹ma kinau a noa ki mu, Kuga ta lawodugoro tea waina e sa mau: ma naata waina e dapagi ko nap̃orom̃a ni matua, p̃a moro doa paki nia nap̃orom̃a ni mawiri.

⁴⁰Go tea waina e masauna naga ega viragi ko pano punusi tea vasap̃otae, go naga ega tape lua sugoro anigo, p̃a maneana moro doropusi sugoro kovagoro anigo.

⁴¹Go naata waina ega wo maridie ko naga p̃a sikoti a pano maile sikai, p̃a sikoti a pano maile ega rua.

⁴²P̃a tua tea waina e datagovi ko, go tea waina e masauna naga ega sea paki‐go p̃a ta atutaku ki nia mau.

⁴³Ku dogo naga e pei tea noaana, P̃a dodomi tea ni m̃aladigi ki‐go, go p̃a vilosi tea kokona ki‐go: ma kinau a noa ki mu,

⁴⁴Kuga dodomi tea maga waina eu kokona ki mu, go kuga magi tea maga waina eu do kopalele mu dapasavasa;

⁴⁵naga kuga vei natu ni Tamamu waina e doko nakoroatelagi doko: nalakena e mari elo aneana e sake paki tea sa maga go tea wia maga, go e mari usa e p̃owo paki tea leana maga go tea tagele maga.

⁴⁶Ku pe dodomi tea maga waina eu do dodomi mu, ku pe veani namoriana nasava? Tea tape nasautoga maga eu da mari tea wanogoe, kite?

⁴⁷Go ku pe vasadodomi taimu maga sikida, ku pe mari tea warua liu sei maga? Tea maga ni nalauna p̃ota maga eu da mari tea wanogoe, kite?

⁴⁸Nalakena tea wanogoe nimu kuga wialua, ega tapala waina Tamamu ni nakoroatelagi e p̃ialua.