Read Nguna Togoa Etafe North MATAIO 6 Bible Online

MATAIO 6 - Nguna Togoa Etafe North bible

MATAIO 6

¹Kuga vunusi naga kuga ta mari namarinaleoleanaana animu narae ni naatam̃oli maga mau, naga euga vunusi mu: ku pe mari dapala nogoe ku pe ta peani te namoriana mau sikoti Tamamu waina e doko nakoroatelagi doko.

²Nalakena tea wanogoe ragi waina ku pe mari navituam̃olikiana, p̃a ta sui paiga sikai naraem̃a mau, dakiusi waina nakalep̃o maga eu mari a ekopu ni nasum̃a ni nasaisaiana maga go napua maga ni natokoana, naga euga vei tea samasamaniana pae naatam̃oli maga. Lomau a noa ki mu, Eu dape sua namoriana adeada.

³Ma ragi waina nigo ku mari navituam̃olikiana, nam̃elearum̃a ni mawiri ega ta atae tea waina nam̃elearum̃a ni matua e mari a mau:

⁴naga navituam̃olikiana anigo ega vei tea sili: go Tamamu waina e sili po do punusi ega wo lagati dua ko.

⁵Go ragi waina kuga tapasavasa, kuga ta dapala nakalep̃o maga mau: nalakena eu masauna naga euga lawodu po dapasavasa ekopu ni nasum̃a ni nasaisaiana maga go naweluki maga ni napua welewelea maga ni natokoana, naga euga toko lina ki naatam̃oli maga. Lomau a noa ki mu, Eu dape sua namoriana adeada.

⁶Ma nigo, ragi waina p̃a tapasavasa, p̃a vaki ekopu ni em̃ago tukituki anigo, go ragi waina ku kokoro sua namata anigo, p̃a tapasavasa paki Tamam̃a waina e sili, go Tamam̃a waina e sili po do punusi ega wo lagati dua ko.

⁷Go ragi waina ku do dapasavasa kuga ta pasapala mau p̃alo mau, dakiusi waina tea ni nalauna p̃ota maga eu mari a: nalakena eu midoa ki nia naga euga wo pei tea rogoana nalakena navasaparauana adeada.

⁸Nalakena tea wanogoe kuga ta dakiusi ra mau: nalakena Tamamu e atae naleo maga waina eu p̃ia ki mu ragi waina ku ko da datagovi a ara mau.

⁹Nalakena tea wanogoe kuga tapasavasa ega tapala waia: Mama aginami waina ku doko nakoroatelagi doko, Nagisam̃a ega tapu.

¹⁰Namarakiana anigo ega umai. Namasauana anigo ega vei tea mariana maramana, ega tapala waina e do pei tea mariana nakoroatelagi.

¹¹P̃a tua gami masoso te navinaga waina e p̃ia ki gami.

¹²Go p̃a maginami midoakikorokoro naleo maga waina eu one gami one, ega tapala waina kinami ma au po magi tea maga waina naleo aginami maga eu one ara one au madeada midoakikorokoro e.

¹³Go p̃a ta piragi gami paki namaridogoana mau, ma p̃a vualua gami m̃elu dua ki tea sa.

¹⁴Nalakena ku pe magi naatam̃oli maga midoakikorokoro natapiriana adeada maga, Tamamu ni nakoroatelagi ma ega wo manimu midoakikorokoro.

¹⁵Ma ku pe ta magi naatam̃oli maga midoakikorokoro natapiriana adeada maga mau, Tamamu ma ega wo da midoakikorokoro natapiriana animu maga mau.

¹⁶Go ragi waina kuga vali, kuga ta pei tea mata susue mau, dapala nakalep̃o maga: nalakena eu mari naraeda eu sa naga euga toko lina ki naatam̃oli maga naga eu pali. Lomau a noa ki mu, Eu dape sua namoriana adeada.

¹⁷Ma nigo, ragi waina ku do pali, p̃a vuvurai ki nap̃aum̃a, po sarue naraem̃a; naga p̃a ta dokolina ki naatam̃oli maga mau naga ku do pali,

¹⁸ma p̃a wo dokolina ki Tamam̃a waina e sili: go Tamam̃a waina e sili po do punusi, ega wo lagati dua ko.

¹⁹Kuga ta manimu daua ki naloriki maga maramana mau, tokora waina tuluki go namadaniana ero do mari sa ki asa, go waina tea vanako maga eu kili darave po panako asa:

²⁰ma kuga to manimu daua ki naloriki maga nakoroatelagi, tokora waina tuluki e da do mari sa ki asa mau go waina namadaniana e da do mari sa ki asa mau, go tokora waina tea vanako maga eu da do kili darave asa mau, go waina eu da panako asa mau:

²¹nalakena tokora waina naloriki tauakiana anigo e doko asa, tokora wanogoe nap̃op̃om̃a ma ega wo doko asa.

²²Namatam̃a e pei nasulu ni nap̃atokom̃a: nalakena tea wanogoe namatam̃a e pe wia, nap̃atokom̃a mamau e pe wo marama.

²³Ma namatam̃a e pe sa, nap̃atokom̃a mamau e pe wo maligo. Nalakena tea wanogoe namarama waina e doko ako e pe vei namaligo, namaligo wanogoe e pe warua pa!

²⁴Te naata sikai e da mariatae magi nawota dua suasua mau: nalakena ega wo pilosi sikai po dodomi kerua; kite ega wo liko sikai po midoaki p̃alo ki kerua. Ku mari sa magi Sup̃e go mammon suasua.

²⁵Nalakena tea wanogoe, a noa ki mu, Kuga ta magi namauriana animu midoaki paratiki mau, tea waina kuga wo gani a, kite tea waina kuga wo munugi a; go magi nap̃atokomu mau, tea waina kuga wo suni a. Namauriana e da p̃arua liu navinaga, kite? Go nap̃atokomu e da p̃arua liu sugoro maga, kite?

²⁶Kuga leopunusi manu maga ni nakoroatelagi, naga eu da sapuraki mau, go eu da dagaukotovi mau, go eu da dauaki paki ekopu ni nasum̃a ni korn maga mau; go Tamamu ni nakoroatelagi e do pagani ra. Nimu ku da p̃ia liu p̃arua ki da, kite?

²⁷Go nimu sei kakamu e pe midoa ki paratiki e pe mariatae sokari navarauana aneana kubit sikai?

²⁸Go ekasana ku midoa ki parati ki nalo ni sugoro maga? Kuga leousiusi lili maga ni vanua, dapala waina eu do ulua; eu da p̃osiwosi mau, go eu da loasi mau:

²⁹ma a noa ki mu, naga Solomon doko nasamasamaana aneana mamau e da susu dapala nara sikai kakada mau.

³⁰Ma Sup̃e e pe sugoro nam̃enau ni vanua e pe tapala nogoe, waina e doko masoso, go matamai e pei tea nadikiana paki upu, ega wo da sugoro mu ega liu p̃arua ki nia, kite, tea saralomau kiki maga?

³¹Nalakena tea wanogoe kuga ta midoa ki parati ki mau, po naga, Tuga wo gani nasava? Kite, Tuga wo munu nasava? Kite, Tuga wo pei tea sugoroana ki nasava?

³²Nalakena nalauna p̃ota maga eu do laaga naleo maga mamau puti wanogoe; nalakena Tamamu ni nakoroatelagi e atae naga tea maga mamau puti wanogoe eu p̃ia ki mu.

³³Ma kuga vea laaga namarakiana aneana, go namarinaleoleanaana aneana; go tea maga mamau puti wanogoe euga wo pei tea vituakiana paki mu sokari tea vea.

³⁴Nalakena tea wanogoe kuga ta midoa ki parati ki nalo ni matamai mau: nalakena matamai ega wo dum̃ana midoa ki parati ki nia. Tea sa ni naaleatia sikai e patakana.