Read Nguna Togoa Etafe North MATAIO 7 Bible Online

MATAIO 7 - Nguna Togoa Etafe North bible

MATAIO 7

¹Kuga ta pasap̃otae mau, naga kuga ta pei tea vasap̃otaeana mau.

²Nalakena navasap̃otaeana waina ku do pasap̃otae asa, kuga wo pei tea vasap̃otaeana asa: go totowo waina ku do dowogi asa ega wo manimu pei tea rowogiana asa.

³Go ekasana ku punusi nam̃otam̃ota waina e doko namata ni taim̃a, ma ku da midoa ki natokai mau waina e doko namatam̃a doko?

⁴Kite p̃a wo noa ki taim̃a dapale sava, P̃a suasua naga aga tape lua nam̃otam̃ota waina e doko namatam̃a; go p̃a leo, natokai e doko namatam̃a doko?

⁵Nakalep̃o, p̃a vea dape lua natokai waina e doko namatam̃a; go ragi wanogoe p̃a wo leosai p̃ia naga p̃a tape lua nam̃otam̃ota waina e doko namata ni taim̃a doko.

⁶Kuga ta dua koria maga tea waina e dapu mau, go kuga ta nadi ki napati ni vilavila animu maga narae ni wago maga mau, mase eu pe vapuludoa ra ki nam̃eleda, po dum̃ada doa ra po kati p̃orae mu.

⁷Kuga tatago, go ega wo pei tea vituakiana paki mu; kuga laaga, go kuga wo pap̃ai; kuga p̃okawoka, go ega wo manimu pei tea wolagatiana:

⁸nalakena sara naata waina eu do datago eu dua ra eu dape; go tea waina e do laaga e pap̃ai; go tea waina e do p̃okawoka ega wo maneana pei tea wolagatiana.

⁹Kite naatam̃oli sei kakamu e doko, waina, natuna e pe tatagovi a ki bred sikai, e pe wo dua e vatu sikai;

¹⁰kite e pe tatago naika sikai, e pe wo dua e m̃aata sikai?

¹¹Go nimu, waina ku sa, ku pe atae naga kuga tua natumu maga navituaana wia maga, Tamamu waina e doko nakoroatelagi e pe wo pitua e pe warua liu sa pa ki tea wia maga paki tea maga waina eu datagovi a ara.

¹²Nalakena tea wanogoe naleo maga mamau puti waina ku pe masauna naga naatam̃oli maga euga manimu mari ra, nimu ma kuga madeada mari ega tapala nogoe: nalakena tea wanogoe e pei nawotaeana go profeta maga.

¹³Kuga sili pae namata‐pua kiki: nalakena namata‐pua e p̃arua, go napua e p̃elewelea, waina e piragi paki namatepuoliana, go tea maga waina eu do sili pae asa eu laapa.

¹⁴Nalakena namata‐pua e kiki, go napua e pei nap̃alaasa, waina e do piragi paki namauriana, go tea maga waina eu pap̃ai a eu pisa maau.

¹⁵Kuga matamatua ki profeta sorosoro maga, waina eu suni sugoro maga ni shiip po umai punusi mu, ma eu pei wulf tapepavakoto maga nap̃alauda.

¹⁶Kuga wo atae ra ki nawada maga. Naatam̃oli eu lei nawa ni vaine m̃elu namatagauta kite? Kite napuliva m̃elu tea vivitip̃a kite?

¹⁷Dapala nogoe sara nakau wia eu do dau ki nawa wia; ma nakau sa e do dau ki nawa sa.

¹⁸Nakau wia sikai e mari sa dau ki nawa sa, go nakau sa sikai e mari sa dau ki nawa wia.

¹⁹Sara nakau waina eu da dau ki nawa wia mau eu do pei tea taeana eu dowo, po pei tea nadikiana paki nakapu.

²⁰Nalakena tea wanogoe kuga wo atae ra ki nawada.

²¹Sara naata, waina eu do noa ki nau, Nawota, Nawota, euga wo da mamau puti sili paki namarakiana ni nakoroatelagi mau; ma tea waina e do mari namasauana ki Tamagu waina e doko nakoroatelagi doko ega wo sili paki asa.

²²Tea laapa euga wo noa ki nau naaleatia wanogoe, euga wo naga, Nawota, Nawota, au da dapavanau ki nagisam̃a, kite, go au da mari dimon maga eu m̃elu pano ki nagisam̃a, kite? Go au da mari nawosiana kasua laapa ki nagisam̃a, kite?

²³Go ragi wanogoe aga wo noakisai ra, naga, A da atae mu te ragi mau: kuga m̃elu dua ki nau pano, tea maga waina ku do mari namarinaleotageleana.

²⁴Nalakena tea wanogoe sara naata waina eu dogo navasaana aginau maga wanogoe, po do mari ra, euga wo pei tea noaana naga eu dakiusi naatam̃oli manumatua sikai, waina e davagi nasum̃a aneana vatu laketoko:

²⁵go usa e p̃owo, go noai sara maga eu rumai, go nalagi maga eu sau, po atugi nasum̃a wanogoe; go e da dowo mau: nalakena laketano kakana e doko vatu laketoko.

²⁶Go sara naata waina eu dogo navasaana aginau maga wanogoe, po da do mari ra mau, euga wo pei tea noaana naga eu dakiusi naatam̃oli manumatavusa sikai, waina e davagi nasum̃a aneana naworaone:

²⁷go usa e p̃owo, go noai sara maga eu rumai, go nalagi maga eu sau, po atugi nasum̃a wanogoe; go e dowo: go narowoana kakana e p̃arua.

²⁸Go e pakilina, ragi waina Yesu e noa sua navasaana maga wanogoe, naga taua maga ni naatam̃oli maga eu saram̃akoto navasapiseikiana aneana:

²⁹nalakena e do pasa pisei ki da dapala tea waina e peani naveinawotaana kakana, go e da dapala tea midiri adeada maga mau.