Read Nguna Togoa Etafe North MATAIO 9 Bible Online

MATAIO 9 - Nguna Togoa Etafe North bible

MATAIO 9

¹Go e pagi boti sikai, po duagoto paki taleva kerua, po umai paki natokoana aneana.

²Go kuga leo, eu dape tea sarumate sikai umai punusi a, e one nawewele sikai one: go Yesu e punusi nasaralomauana adeada po noa ki tea sarumate, e naga, Koto, p̃a marasike; namarinaleosaana anigo maga eu pei tea midoakikorokoroana.

³Go kuga leo, tea midiri maga seara kakada eu noa nap̃alauda, eu naga, Naatam̃oli waia e pasasaki.

⁴Go Yesu waina e atae namidodoana adeada maga e naga, Ekasana ku midoa ki tea sa nap̃op̃omu?

⁵Nalakena seve tea e manainai p̃ia, naga aga noa, Namarinaleosaana anigo maga eu pei tea midoakikorokoroana; kite naga aga noa, P̃a tuleana po surata?

⁶Ma naga kuga atae naga naatam̃oli Natuna e peani naveinawotaana maramana naga ega midoakikorokoro namarinaleosaana maga, (ragi wanogoe e noa ki tea sarumate, e naga), P̃a tuleana, po dape dakati nawewele anigo, po paki nasum̃a anigo pano.

⁷Go e duleana, po paki nasum̃a aneana pano.

⁸Ma ragi waina taua maga ni naatam̃oli eu punusi a, eu mataku, po samasamani Sup̃e, waina e dua naatam̃oli naveinawotaana tapala nogoe.

⁹Go ragi waina Yesu e do liu m̃elu dua ki tokora wanogoe pano, e punusi naatam̃oli sikai, waina e pei tea sosoana ki Mataio, e do dasake tokora ni nasautoga: go e noa ki nia, e naga, P̃a rausi au: Go e duleana, po dausi a.

¹⁰Go e pakilina, ragi waina e kere one ganikani ekopu ni nasum̃a, kuga leo, tea tape nasautoga laapa go tea mari naleo sa laapa eu rumai po kere one ganikani sikoti Yesu go tea vasapiseikiana aneana maga.

¹¹Go ragi waina Farisi maga eu punusi a, eu noa ki tea vasapiseikiana aneana maga, eu naga, Ekasana Tea Vasapiseiki animu e ganikani sikoti tea tape nasautoga maga go tea mari naleo sa maga?

¹²Ma ragi waina e dogo e, e naga, Tea maga waina eu kasua eu da dapala waina e p̃ia naga euga masau naatam̃oli sikai ni medisina mau, ma tea maga waina eu sasana eu dapala nogoe.

¹³Ma kuga vano po ataedogo tea waia e pei nasava, A masau nadodomiana, a da masau naviriana mau: nalakena a da umai naga aga soso tea leana maga mau, ma a umai naga aga soso tea mari naleo sa maga.

¹⁴Ragi wanogoe tea vasapiseikiana maga ki Yoane eu rumai punusi a, eu naga, Ekasana kinami go Farisi maga au do paka laapa pali, ma tea vasapiseikiana anigo maga eu da pali mau?

¹⁵Go Yesu e noa ki da, e naga, Tea vitawiri tana ri maga eu mariatae susue ragi waina tea vitawiri e sikoti ra doko kite? Ma naaleatia maga euga wo umai waina tea vitawiri ega wo pei tea tapeluaana kiada, go euga wo pali ragi wanogoe.

¹⁶Go te naata sikai e da usuvaki sugoro tuai ki matele sikai ni nakulukulu waina e ko da pei tea marim̃atakiana mau; nalakena nausuvakiana e marip̃orae sugoro, go e moro mawora p̃arua.

¹⁷Go eu da daki waine vau paki noai ni nawili tuai mau: eu pe taki nia paki ara eu pe masai, go waine e pe toroa, go nawili maga eu pe sa: ma eu daki waine vau paki nawili vau, go ero dua p̃ia doko.

¹⁸Ragi waina e do pasa ki da tea maga wanogoe, kuga leo, tea maraki sikai e umai, po lotu ki nia, e naga, Natugu nagoroi e po mate ragi waia: ma p̃a umai po doropusi nam̃elearum̃a asa, go ega wo mauri.

¹⁹Go Yesu e duleana, po dausi a, go tea vasapiseikiana aneana maga eu mamau.

²⁰Go kuga leo, nagoroi sikai waina e dape nada varau natau rualima sikai tamate dua, e umai paki natakuna, po kisidogo narepu ni sugoro aneana:

²¹nalakena e noa nap̃alauna, e naga, A pe kisidogo sugoro aneana, a pe wo pei tea maripauriana.

²²Ma Yesu e dum̃ana doa e po punusi a po naga, Lei, p̃a marasike; nasaralomauana anigo e po mari pauri ko. Go nagoroi wanogoe e pei tea maripauriana pae aura wanogoe pa pa.

²³Go ragi waina Yesu e umai paki ekopu ni nasum̃a ki tea maraki wanogoe, po punusi tea sui lokore maga, go taua ni naatam̃oli eu do lalagaarova, e naga, Kuga melu:

²⁴nalakena koroi kiki e da mate mau, ma e maturu.

²⁵Go eu muru ki nia. Ma ragi waina taua ni naatam̃oli maga eu pei tea mariana eu paki katama, e paki ekopu, po puati nam̃elearuna; go koroi kiki e duleana.

²⁶Go narogorogoana wanogoe e sokapule paki navanua wanogoe mamau.

²⁷Go ragi waina Yesu e do liu pae tokora wanogoe pano, naatam̃oli kesa dua ero dausi a, ero do pioso, po do naga, P̃a dodomi gami, natu ni David.

²⁸Go ragi waina e umai paki ekopu ni nasum̃a, tea kesa dua wanogoe ero umai punusi a: go Yesu e noa ki da, e naga, Koro saralomau naga a mari atae mari tea wanogoe kite? Ero noa ki nia, ero naga, Ioro, Nawota.

²⁹Ragi wanogoe e kisidogo namatada, po naga, Ega manimu pei tea mariana ega vataka nasaralomauana animu.

³⁰Go namatada eu leosai. Go Yesu e pasasoki kasua ki da, e naga, Koroga vunusi naga te naata ega ta atae a mau.

³¹Ma ero dave pano po pasa peravera ki narogorogoana kakana navanua wanogoe mamau.

³²Go ragi waina nara ero do dave pano, kuga leo, eu piragi umai punusi a naatam̃oli pusa sikai waina e pei dimon.

³³Go ragi waina dimon e pei tea mariana e dave pano, pusa e pasa: go taua ni naatam̃oli eu maga, po naga, Sala vea e da pei tea vunusiana dapalana Israel mau.

³⁴Ma Farisi maga eu naga, E mari dimon maga eu dave pano pae nawota ki dimon maga.

³⁵Go Yesu e surata papule puti natokoana warua maga go natokoana kiki maga, e do pasapiseiki ekopu ni nasum̃a ni nasaisaiana adeada maga, po do dogorogo ki narogorogoana wia ni namarakiana, po do mari lua sara nasasanaana go sara namanainaiana.

³⁶Ma ragi waina e punusi taua ni naatam̃oli, e maritadodomi ra, nalakena eu dogokitesa po pei daperavera, dakiusi shiip waina tea leo parati ki da e dika.

³⁷Ragi wanogoe e noa ki tea vasapiseikiana aneana maga, e naga, Nalolovaeana e p̃arua lomau, ma tea wosiwosi maga eu pisa maau.

³⁸Nalakena tea wanogoe kuga vavarani Nawota ni nalolovaeana naga ega tip̃aki lua tea wosiwosi maga paki nalolovaeana aneana.