Read Nguna Togoa Etafe North MARKO 1 Bible Online

MARKO 1 - Nguna Togoa Etafe North bible

MARKO 1

¹Naatulakeana ni narogorogoana wia ki Yesu Kristo, Sup̃e Natuna.

²Dakiusi waina e pei tea midiriana tusi ki profeta Isaiah, Kuga leo, kinau a dip̃aki lua tea tautauana aginau ega vea ki naraem̃a, Waina ega wo marim̃ata ki napua anigo;

³Nadaleo ni tea waina e do pioso masop̃alo, Kuga marim̃ata ki napua ki Yehovah, Kuga mari napua doniana aneana maga euga leana;

⁴Yoane e umai, waina e do bapetiso masop̃alo po do dogorogo ki nabapetisoana ni namidoakidoaana paki namidoakikorokoroana ni namarinaleosaana maga.

⁵Go navanua ni Yudea mamau, go tea maga mamau puti ni Yerusalem, eu pano punusi a; go e bapetiso ra noaisara Yordan, eu noasai namarinaleosaana adeada maga.

⁶Go Yoane e pei tea sugoroana ki nam̃au ni kamel, go tasoki sikai ni nawili e do namalona, go e do gani midiri maga go honi ni bii mila.

⁷Go e do dogorogo, po do naga, Tea sikai waina e kasua liu au, e edakugoro au umai, a da p̃ia mau naga aga kolo po peresi natali ni nam̃elevasiana aneana maga.

⁸Kinau a bapetiso mu ki noai; ma nae ega wo bapetiso mu ki Naatana Tapu.

⁹Go e pakilina naaleatia maga wanogoe, naga Yesu e pae Nasareth ni Calilea umai, po pei tea bapetisoana pae Yoane Yordan.

¹⁰Go m̃araverave ragi waina e do m̃elu dua ki noai sake umai, e punusi nakoroatelagi e mawora pamawota, go Naatana e do siwo dakiusi tokopea sikai po lawo asa:

¹¹go nadaleo sikai e dave nakoroatelagi umai, e naga, Nigo ku pei Natugu tea dodomiana aginau waina a midoa ki m̃ata ki‐go.

¹²Go m̃araverave Naatana e kopasi a paki masop̃alo pano.

¹³Go e doko masop̃alo doko naaleatia rualima pati, Satan e do maridogo e; go e sikoti nalo mila maga; go agelo maga eu maneana suasua ki navinaga.

¹⁴Go edaku ki Yoane e pei tea vituakiana, Yesu e umai paki Calilea, po do dogorogo ki narogorogoana wia ki Sup̃e.

¹⁵Po do noa, Ragi e pei tea vakavuroana, go namarakiana ki Sup̃e e pei m̃aladigi: kuga midoakidoa, po saralomau narogorogoana wia.

¹⁶Go e surata pae elau ni natasi ni Calilea pano, po punusi Simon go Anderea Simon taina ero siva ki kup̃ena sikai natasi: nalakena ero pei tea araika.

¹⁷Go Yesu e noa ki da, e naga, Koroga rausi au, go aga wo mari mu koroga wo pei tea vuagoro naatam̃oli.

¹⁸Go m̃araverave ero doropusi kup̃ena maga eu madoko, po dausi a.

¹⁹Go e moro surata pano malo kiki, po punusi Yakobo natu ni Sebedaio, go taina Yoane, go nara ma ero doko rarua ero do usuvaki kup̃ena maga.

²⁰Go m̃araverave e soso ra: go ero doropusi tamada Sebedaio e doko rarua sikoti tea suasua vasadapuiana maga, po dausi a pano.

²¹Go eu sili paki Kapernaum; go m̃araverave e paki ekopu ni nasum̃a ni nasaisaiana naaleatia ni sabbath po pasapisei ki.

²²Go eu saram̃akoto navasapiseikiana aneana: nalakena e pasapisei ki da dapala e peani naveinawotaana, go e da dapala tea midiri maga mau.

²³Go m̃araverave naatam̃oli sikai e doko nasum̃a ni nasaisaiana adeada waina e peani naatana loa sikai; go e pioso, po naga,

²⁴Kinami auga kasa ki‐go, Yesu ni Nasareth? Ku umai naga p̃a mari punue gami kite? A atae ko, ku pei Tea Tapu ki Sup̃e.

²⁵Go Yesu e pasa kasua ki nia, po naga, P̃a vunuta, go p̃a tave umai m̃elu dua ki nia pano

²⁶Go naatana loa e pua p̃orae a po pioso ki nadaleo kasua, po dave umai m̃elu dua ki nia pano.

²⁷Go eu mamau puti maga p̃arua, dapala waina eu dum̃ada pusuusu paki da, po naga, Tea waia e pei nasava? Navasapiseikiana vau! E dip̃aki naatana loa maga ki naveinawotaana, go eu dogo parati ki nia.

²⁸Go narogorogoana kakana e sokapule m̃araverave sara tokora paki navanua mamau ni Calilea daliviri.

²⁹Go m̃araverave, ragi waina eu dave m̃elu dua ki nasum̃a ni nasaisaiana, eu rumai paki ekopu ni nasum̃a ki Simon go Anderea, nara ma Yakobo go Yoane eu mamau.

³⁰Go Simon anagoroi p̃ilana e one e masaki; go m̃araverave eu noa ki nia asa:

³¹go e umai po puati nam̃elearuna, po sike a; go namasakiana e marua ki nia, go e madeada suasua ki navinaga.

³²Go ragi melu, ragi waina elo e musu, eu piragi tea maga mamau puti waina eu sasana, go tea maga waina eu pei dimon umai punusi a.

³³Go natokoana mamau eu saisai paki namata.

³⁴Go e maripauri tea laapa waina eu sasana nasasanaana visarasara, po mari dimon laapa eu dave pano; go e da suasua ki dimon maga naga euga vasa mau, nalakena eu atae a.

³⁵Go malip̃ogi ni p̃ogi matua, e duleana po paki katama, po paki maso maladi sikai pano, po dapasavasa tokora wanogoe.

³⁶Go Simon go tea maga waina eu sikoti a doko eu dausi a pano;

³⁷go eu pap̃ai a, po noa ki nia, eu naga, Tea maga mamau puti eu laaga ako.

³⁸Go e noa ki da, e naga, Tuga vaki tokora p̃ota seara paki natokoana maga ni m̃aladigi, naga aga moro dogorogo tokora maga wanogoe; nalakena a m̃elu umai nalakena tea wanogoe.

³⁹Go e paki ekopu ni nasum̃a ni nasaisaiana adeada maga usuraki Calilea mamau, e do dogorogo po do mari dimon maga eu dave pano.

⁴⁰Go lepero sikai e umai punusi a, e pavarani a, po ditip̃atua ki nia, po noa ki nia, e naga, ku pe suasua, ku pe mariatae mari au aga tautau.

⁴¹Go e maritadodomi a, po sai ki nam̃elearuna, po kisidogo e, po noa ki nia, e naga, A suasua; p̃a vei tea mariana p̃a tautau.

⁴²Go m̃araverave naveileperoana e marua ki nia, go e pei tea mariana e dautau.

⁴³Go e pasa soki kasua ki nia,

⁴⁴po m̃araverave dip̃aki lua e, po noa ki nia, e naga, P̃a vunusi naga p̃a ta noa ki te naata te navatuna mau: ma p̃a vano, p̃a tum̃am̃a pisei ki tea viri ako, po pitua nalakena ku pei tea mariana ku dautau ki tea maga waina Moses e pitip̃aki ara, naga ega vei nanoasokisokiana sikai paki da.

⁴⁵Ma e dave pano, po pae asa dogorogo ki p̃arua ki nia, po pasa peravera ki naleo wanogoe, dapala waina Yesu e mari sa moro pae lina sili paki te natokoana, ma e doko etaku doko maso maladi maga: go eu pae sara tokora umai punusi a.