Read Nguna Togoa Etafe North MARKO 10 Bible Online

MARKO 10 - Nguna Togoa Etafe North bible

MARKO 10

¹Go e duleana m̃elu dua ki tokora wanogoe, po umai paki navanua ni Yudea go taleva kerua ni Yordan: go taua maga ni naatam̃oli eu moro saisai umai punusi a; go e moro pasapisei ki da, dakiusi waina e do mari a sala vea.

²Go Farisi seara eu rumai punusi a, po pusuusu paki nia, eu naga, E pae nawotaeana maga naatam̃oli sikai ega tip̃aki lua nagoroi aneana kite?

³Eu mari dogo e. Go e pasadara po noa ki da, e naga, Moses e dip̃aki mu nasava?

⁴Go eu naga, Moses e suasua naga auga midiri tusi ni natoropusiana sikai, po dip̃aki lua e.

⁵Ma Yesu e noa ki da, e naga, Nalakena nakasuana ni nap̃op̃omu e manimu midiri natip̃akiana wanogoe.

⁶Ma pae naatulakeana ni natawonakiana, E mari ra ero pei naanoai go nagoroi.

⁷Nalakena tea wanogoe naatam̃oli sikai ega toropusi tamana go p̃ilana eroga madoko, go ega vuluti anagoroi:

⁸go nara dua eroga wo pei nap̃okasi sikai maau: nalakena tea wanogoe ero da moro pei edua mau, ma ero pei nap̃okasi sikai maau.

⁹Nalakena tea wanogoe tea waina Sup̃e e pilasai ki nia, naatam̃oli ega ta mari a ega vamawota mau.

¹⁰Go ragi waina eu doko ekopu ni nasum̃a tea vasapiseikiana maga eu moro pusuusu paki nia ki tea wanogoe.

¹¹Go e noa ki da, e naga, Naata waina e dip̃aki lua nagoroi aneana, po dawiri tea p̃ota, e maripele dip̃a e:

¹²go nagoroi e pe tip̃aki lua naanoai aneana, po laki tea p̃ota, e maripele.

¹³Go eu piragi piakirikiri kiki maga umai punusi a naga ega kisidogo ra: go tea vasapiseikiana maga eu pasa kasua ki da.

¹⁴Ma ragi waina Yesu e punusi a, e maeto p̃arua, po noa ki da, e naga, Kuga suasua ki piakirikiri kiki maga naga euga umai punusi au; kuga ta dip̃agoro ra mau: nalakena namarakiana ki Sup̃e e pei tea ni tea tapalada maga.

¹⁵Lomau a noa ki mu, naga, Naata waina e da dape namarakiana ki Sup̃e dakiusi piakiki kiki mau, ega wo da sili paki asa mau.

¹⁶Go e dape ra eu doko naruna maga, po pasa p̃ia ki da, e pusake nam̃elearuna maga ara.

¹⁷Go ragi waina e do dave paki napua pano, naata sikai e sava umai punusi a, po ditip̃atua paki nia, po pusuusu paki nia, e naga, Tea Vasapiseiki Wia, aga mari nasava naga aga veani namauriana waina e du mau du?

¹⁸Go Yesu e noa ki nia, e naga, Ekasana ku soso au ki tea wia? Te naata e da p̃ia mau, ma sikai maau Sup̃e.

¹⁹Ku atae natip̃akiana maga, P̃a ta mari punue mau, P̃a ta maripele mau, P̃a ta panako mau, P̃a ta pasa sokisoki sorosoro mau, P̃a ta dape pavakoto mau, P̃a dodomadagani tamam̃a go p̃ilam̃a.

²⁰Go e noa ki nia, e naga, Tea Vasapiseiki, tea maga mamau puti wanogoe a do pavaigoro ra pae ragi ni naveipiakikiana aginau pa pa.

²¹Go Yesu e leo punusi a po dodomi a, go e noa ki nia, e naga, Tea sikai ku dika asa: p̃a vano, p̃a sori tea maga waina ku peani ra, po dua tea tika maga, go p̃a wo peani naloriki tauakiana nakoroatelagi: go p̃a umai, p̃a rausi au.

²²Ma e datanako nalakena navasaana wanogoe, go e susue pano: nalakena e pei tea sikai waina e peani tea veaniana warua maga.

²³Go Yesu e leo pilialia, po noa ki tea vasapiseikiana aneana maga, e naga, E kasua p̃arua ki tea maga waina eu peani nasogolapaana naga euga sili paki namarakiana ki Sup̃e!

²⁴Go tea vasapiseikiana maga eu maga p̃arua navasaana aneana. Ma Yesu e moro pasa dara, po noa ki da, e naga, Piakirikiri, e kasua p̃arua ki tea maga waina eu pavatu nasogolapaana naga euga sili paki namarakiana ki Sup̃e!

²⁵E kasua kiki ki kamel sikai naga ega sili darave malo masai ni tea tuturi, ma e kasua p̃arua ki naatam̃oli sogolapa naga ega sili paki namarakiana ki Sup̃e.

²⁶Go eu saram̃akoto p̃arua, po noa ki nia, eu naga, Go sei e mari atae pei tea mautipauriana?

²⁷Yesu e leo punusi ra po naga, Naatam̃oli maga eu mari sap̃ona, ma Sup̃e e mari atae a: nalakena Sup̃e e mari atae mari naleo maga mamau puti.

²⁸Petero e pae asa noa ki nia, e naga, P̃a leo kinami au doropusi naleo maga mamau puti eu madoko, po dausi ko.

²⁹Yesu e naga, Lomau a noa ki mu, naga Te naata e da doko mau waina e doropusi nasum̃a, kite taina maga, kite gorena maga, kite p̃ilana, kite tamana, kite natuna maga, kite vanua maga, nalakena kinau, go nalakena narogorogoana wia,

³⁰waina ega wo da dape paka p̃onotia sikai ragi waia, nasum̃a maga, go taina maga, go gorena maga, go p̃ilana maga, go natuna maga, go vanua maga, pilake nakopaleleana maga; go maramana waina ega wo umai namauriana waina e du mau du.

³¹Ma tea laapa waina eu pea euga wo edaku; go tea edaku euga wo pea.

³²Go eu pae napua, do sake paki Yerusalem pano; go Yesu e do pea ki da pano: go eu maga p̃arua; go tea maga waina eu dausi eu mataku. Go e moro piragi lua tea rualima sikai tamate dua, po pae asa noa ki da tea maga waina euga wo pakilina ki nia,

³³e naga, Kuga leo, tu sake paki Yerusalem pano; go naatam̃oli Natuna ega wo pei tea vituakiana paki tea viri warua maga go tea midiri maga; go euga wo dip̃akotovi a naga ega mate, po pitua ki nia paki tea ni nalauna p̃ota maga:

³⁴go euga wo mari saudoa ki nia, po daniu sa, po parati a, po mari punue a; go edaku ki naaleatia dolu ega wo moro duleana.

³⁵Go Yakobo go Yoane, Sebedaio natuna maga, ero umai paki m̃aladigi ki nia, po noa ki nia, ero naga, Tea Vasapiseiki, aro masauna naga p̃a maginami mari tea waina aroga wo datagovi ko asa.

³⁶Go e noa ki da, e naga, Koro masauna naga aga manimu mari nasava?

³⁷Go ero noa ki nia, ero naga, P̃a tua gami naga aroga tasake, sikai ega visari nam̃elearum̃a ni matua, go sikai ega visari nam̃elearum̃a ni mawiri, nasamasamaana anigo.

³⁸Ma Yesu e noa ki da, e naga, Koro da atae tea waina koro datago asa mau. Koro mari atae munu lasa munu waina kinau a munugi a? Kite koro mari atae pei tea bapetisoana ki nabapetisoana waina kinau a pei tea bapetisoana asa kite?

³⁹Go ero noa ki nia, ero naga, Aro mari atae. Go Yesu e noa ki da, e naga, Lasa munu waina kinau a munugi a koroga wo munugi a; go nabapetisoana waina kinau a pei tea bapetisoana asa koroga wo pei tea bapetisoana asa:

⁴⁰ma naga koroga tasake pisari nam̃elearugu ni matua kite pisari nam̃elearugu ni mawiri e da pei tea aginau naga aga vitua ki nia mau: ma e pei agi tea maga waina e madeada pei tea tawonakiana.

⁴¹Go ragi waina tea rualima sikai eu dogo e, eu pae asa maeto p̃arua nalo ni Yakobo go Yoane.

⁴²Go Yesu e soso ra umai punusi a, po noa ki da, e naga, Ku atae naga tea maga waina eu pei tea midoakiana naga eu maraki nalauna p̃ota maga eu maraki kasua ki da; go tea warua adeada maga eu mari naveinawotaana dap̃au ra.

⁴³Ma e da dapala nogoe m̃aleoputo kakamu mau: ma naata waina e pe masauna naga ega vei tea warua ni m̃aleoputo kakamu, e pe wo pei tea suasua animu:

⁴⁴go naata waina e pe masauna naga ega vei tea vea ni m̃aleoputo kakamu, e pe wo pei naviti ki tea maga mamau puti.

⁴⁵Nalakena naatam̃oli Natuna e da umai naga euga maneana suasua mau, ma e umai naga ega madeada suasua, go naga ega vitua ki namauriana aneana ega vei naulu ni natauluaana oli tea laapa.

⁴⁶Go eu rumai paki Yeriko: go ragi waina e surata m̃elu dua ki Yeriko pano, nara ma tea vasapiseikiana aneana maga go taua warua sikai ni naatam̃oli maga eu mamau, natu ni Timaio, Bartimaio, tea tatago kesa sikai, e do natano pisari nadigi ni napua.

⁴⁷Go ragi waina e dogo naga e pei Yesu ni Nasareth, e pae asa pioso, po naga, Yesu, natu ni David, p̃a dodomi au.

⁴⁸Go tea laapa eu pasa kasua ki nia, naga ega vunuta: ma e moro pioso p̃arua liu, e naga, Natu ni David, p̃a dodomi au.

⁴⁹Go Yesu e du dorogo, po naga, Kuga soso e. Go eu soso tea kesa wanogoe, po noa ki nia, eu naga, P̃a marasike: p̃a tuleana, e soso ko.

⁵⁰Go e nadi ki sugoro kovagoro aneana pano, po dara duleana, po umai punusi Yesu.

⁵¹Go Yesu e pasa dara e, po naga, Ku masauna naga aga manigo mari nasava? Go tea kesa wanogoe e noa ki nia, e naga, Rabboni, naga aga moro leo sai.

⁵²Go Yesu e noa ki nia, e naga, P̃a vano; nasaralomauana anigo e po mari pauri ko. Go e moro leo sai m̃araverave, po dausi a napua.