Read Nguna Togoa Etafe North MARKO 14 Bible Online

MARKO 14 - Nguna Togoa Etafe North bible

MARKO 14

¹Go edaku ki naaleatia dua e pei nasaisaiana ni navakalauana go ni bred waina leven e dika asa: go tea viri warua maga go tea midiri maga eu laaga dapala waina euga vua soki a pae nasorosoroana, po mari punue a: nalakena eu naga,

²Tuga ta mari a ragi ni nasaisaiana mau, mase navasap̃araiana sikai ni narei e pe wo doko.

³Go ragi waina e doko Bethania nasum̃a ki Simon waina e pei lepero, ragi waina e kere one ganikani, nagoroi sikai e umai waina e dape lasa ni naroro sikai ni naroro lolo ni nardo lomau ni naulu laapa; go e mari p̃orae lasa wanogoe, po da ki nia nap̃auna.

⁴Ma te seara eu doko waina eu maeto po noa dum̃ada paki da, eu naga, Ekasana namaripuolikiana waia ni naroro lolo?

⁵Nalakena naroro lolo waia e mari atae pei tea soriana raki tea waina e p̃arua liu denario p̃onotia dolu, po pei tea vituakiana paki tea tika maga. Go eu dauruuru dip̃a e.

⁶Ma Yesu e naga, Kuga toropusi a ega toko; ekasana ku mari a e dogo kite sa? E po mari namariana wia sikai paki nau.

⁷Nalakena ku peani tea tika maga eu sikoti mu doko sara ragi, go ragi waina ku masauna ku mari atae mari m̃ata ki da: ma ku da peani au sara ragi mau.

⁸E po mari tea waina e mari atae mari a: e po pea puvurai ki nap̃atokogu raki naovakiana.

⁹Go lomau a noa ki mu, naga Tokora waina narogorogoana wia e pe wo pei tea rogorogokiana asa usuraki maramana mamau, tea waina nagoroi waia e po mari a tea wanogoe ma ega wo pei tea noaana asa naga nae ega vei tea midoakilagatiana asa.

¹⁰Go Yuda Iskariote, tea sikai ni tea rualima sikai tamate dua, e pano punusi tea viri warua maga naga ega vitua ki nia paki da.

¹¹Go nara, ragi waina eu dogo e, eu laelaea, po sai naga euga tua e m̃ane. Go e laaga ragi wia naga ega vitua ki nia paki da.

¹²Go naaleatia vea ni bred waina leven e dika asa, ragi waina eu mari punue navakalauana, tea vasapiseikiana aneana maga eu noa ki nia, eu naga, Seve tokoro ku masauna naga auga vaki asa po marim̃ataki naga p̃a kani navakalauana asa?

¹³Go e dip̃aki lua edua ni tea vasapiseikiana aneana maga, po noa ki da, e naga, Koroga vaki natokoana, go naatam̃oli sikai waina e dape noai ni naruku sikai ni noai ega wo sua mu: koroga rausi a;

¹⁴go tokora waina ega wo sili asa, koroga noa ki talakea ni nasum̃a, koroga naga, Tea Vasapiseiki e naga, Em̃ago ni nam̃enakiana aginau wai, waina aga kani navakalauana asa, sikoti tea vasapiseikiana aginau maga?

¹⁵Go ega wo pisei ki mu em̃ago warua ni elagi sikai, waina sara naleo eu doko asa, go waina e pei tea marim̃ataki‐sua‐ana: go tokora wanogoe koroga manigida mari m̃ataki asa.

¹⁶Go tea vasapiseikiana ero pano, po umai paki natokoana, po pap̃ai dapala waina e noa ki da asa: go ero mari m̃ata ki navakalauana.

¹⁷Go ragi waina e po pei ragi melu, e umai nara ma tea rualima sikai tamate dua eu mamau.

¹⁸Go ragi waina eu kere one po do ganikani, Yesu e naga, Lomau a noa ki mu, naga Nimu sikai ega wo pitua ki nau, nae waina e ganikani sikoti au.

¹⁹Eu pae asa susue, po noa ki nia sikai go sikai, eu naga, Kinau kite?

²⁰Go e noa ki da, e naga, E pei sikai ni tea rualima sikai tamate dua, nae waina e doko sikoti au lasa.

²¹Nalakena naatam̃oli Natuna e pano lomau dapala waina e pei tea midiriana asa: ma ai ki naatam̃oli waina naatam̃oli Natuna e pei tea vituakiana pae asa! Naatam̃oli wanogoe e pe ta pakilina mau e pe wia ki nia.

²²Go ragi waina eu do ganikani, e dape bred, go ragi waina e pasa m̃ata ki sua, e dovap̃orae a, po dua ra, po naga, Kuga tape: tea waia e pei nap̃atokogu.

²³Go e dape lasa munu sikai, go ragi waina e pasadodom̃ata ki sua, e dua ra: go eu mamau puti munu seara kakana.

²⁴Go e noa ki da, e naga, Tea waia e pei nadagu ni navasasokiana, waina e magi tea laapa pei tea takiana.

²⁵Lomau a noa ki mu, naga Aga wo da moro munu nawa ni vaine seara mau, pa pa paki naaleatia waina aga wo munugi a tea vau namarakiana ki Sup̃e.

²⁶Go ragi waina eu lega sua nalegaana sikai eu dave paki tava ni Oliva pano.

²⁷Go Yesu e noa ki da, e naga, Kuga wo mamau puti pei tea mariana kuga tapilagona: nalakena e pei tea midiriana, Aga wo atugi tea leo paratiki shiip, go shiip euga wo pei tea taperaverakiana.

²⁸Ma edaku ki aga vei tea sikeana duleana, aga wo pea ki mu paki Calilea pano.

²⁹Ma Petero e noa ki nia, e naga, Tea maga mamau puti eu pe vei tea mariana euga tapilagona, ma kinau a pe ta dapilagona mau.

³⁰Go Yesu e noa ki nia, e naga, Lomau a noa ki‐go, naga nigo masoso, p̃ogi waia, ragi waina toa ega ko da paka rua dare mau, p̃a wo paka tolu pasa goro au.

³¹Ma e pasa kasua p̃arua, e naga, E pe one au one naga aga mate sikoti ko, a pe wo da pasa goro ko mau. Go eu mamau puti noa dapala nogoe.

³²Go eu rumai paki tokora sikai nagisana Cethsemane: go e noa ki tea vasapiseikiana aneana maga, e naga, Kuga to natano tokora waia, ragi waina aga tapasavasa.

³³Go e piragi lua Petero go Yakobo go Yoane eu sikoti a pano, go e pae asa maga p̃arua, po dogo kite sa p̃arua.

³⁴Go e noa ki da, e naga, Naatagu e susue p̃arua pa pa paki namateana: kuga toko nea, po do leleo goro.

³⁵Go e pa dua ki da malo kiki, po dowo paki natano, po dapasavasa naga aura wanogoe, e pe va dua ki atae, ega va dua ki nia pano.

³⁶Go e naga, Abba, Mama, nigo ku mari atae mari sara naleo; p̃a tape lua lasa munu waia kiagu: ma ega ta pei tea waina kinau a masauna mau, ma ega vei tea waina nigo ku masauna.

³⁷Go e umai po pap̃ai ra eu maturu, go e noa ki Petero, e naga, Simon, ku maturu? Ku mari sa leleo goro aura sikai maau?

³⁸Kuga leleo goro po dapasavasa, naga kuga ta paki namaridogoana mau: naatamu e suasua lomau, ma nap̃okasimu e manainai.

³⁹Go e moro pano, po dapasavasa, po noa navasaana maga wanogoe sikai maau.

⁴⁰Go e moro umai po pap̃ai ra eu maturu, nalakena namatada eu madaga p̃arua; go eu da atae tea waina euga vasa dara e asa mau.

⁴¹Go e umai sala ketolu po noa ki da, e naga, Kuga to maturu ragi waia, po maromaro: e pei tea lapa; aura e po umai; kuga leo, naatam̃oli Natuna e pei tea vituakiana paki nam̃elearu ni tea mari naleo sa maga.

⁴²Kuga tuleana, tuga vano: kuga leo, tea waina e pitua ki nau e pei m̃aladigi.

⁴³Go m̃araverave, ragi waina e ko do pasa, Yuda, sikai ni tea rualima sikai tamate dua, e umai, nara ma taua sikai ni naatam̃oli maga eu mamau, eu puati lova go naap̃e, eu m̃elu tea viri warua maga go tea midiri maga go tea matua maga umai.

⁴⁴Go tea waina e pitua ki nia e dua sua ra navaivaiana sikai, e naga, Tea waina aga wo dum̃ili a e pei nae; kuga vua soki a, po piragi lua kasua ki nia.

⁴⁵Go ragi waina e umai, e umai punusi a m̃araverave, po naga, Rabbi; go e dum̃idum̃ili a.

⁴⁶Go eu nadi ki nam̃elearuda asa, po pua soki a.

⁴⁷Ma tea sikai ni tea maga waina eu lawodu pisari a e sai lua lova aneana, po atugi tea suasua ki tea viri warua liu, po dae lua nadaligana.

⁴⁸Go Yesu e pasa dara po noa ki da, e naga, Ku po dave umai, dapala a pei tea tape pavakoto sikai, ku pua lova go naap̃e naga kuga vua soki au kite?

⁴⁹Sara naaleatia a sikoti mu roara ni nasum̃a tapu a do pasa piseiki, go ku da pua soki au mau: ma tea waia e pei tea mariana naga navasaana midiriana maga euga lolomana.

⁵⁰Go eu mamau puti doropusi a e doko, po sava pano.

⁵¹Go natureai sikai eu mamau dausi a pano, waina e m̃alam̃ala pei tea kulugoroana ki nakulukulu ni linen sikai:

⁵²go eu pua soki a; ma e doropusi nakulukulu ni linen e doko, po m̃alam̃ala sava pano.

⁵³Go eu piragi lua Yesu pano punusi tea viri warua liu: go nae go tea viri warua maga mamau puti go tea matua maga go tea midiri maga eu mamau saisai.

⁵⁴Go Petero e dausi a uvea, pa pa e sili paki namasopa ni nasum̃a ki tea viri warua liu; go e do natano sikoti tasiga maga, po datalai namarama ni nakapu.

⁵⁵Go tea viri warua maga go nasaisaiana mamau eu laaga nanoasokisokiana dip̃a Yesu naga euga mari punue a; go eu da pap̃ai a mau.

⁵⁶Nalakena tea laapa eu noasokisoki sorosoro dip̃a e, go nanoasokisokiana adeada maga eu da pataka sikai mau.

⁵⁷Go te seara eu duleana, po noasokisoki sorosoro dip̃a e,

⁵⁸po naga, Kinami au dogoe e naga, Kinau aga wo dakai nasum̃a tapu waia waina e pei tea mariana ki nam̃elearu maga, go ragi ni naaleatia dolu aga wo davagi tea p̃ota sikai asa waina ega ta pei tea mariana ki nam̃elearu maga mau.

⁵⁹Go nanoasokisokiana adeada e dapala nogoe ma e da pataka sikai mau.

⁶⁰Go tea viri warua liu e duleana m̃aleoputo, po pusuusu paki Yesu, e naga, Ku da pasa dara te navatuna kite? Tea maga waia eu noasokisoki dip̃a ko nasava?

⁶¹Ma e punuta, po da pasa dara te navatuna mau. Tea viri warua liu e moro pusuusu paki nia, po noa ki nia, e naga, Nigo ku pei Kristo, Tea Vasap̃iakiana Natuna kite?

⁶²Go Yesu e naga, Kinau a pei nae: go kuga wo punusi naatam̃oli Natuna ega wo doko pisari nam̃elearu ni matua ni nakasuaana, po do umai pilake napopouru maga ni nakoroatelagi.

⁶³Go tea viri warua liu e puap̃orae sugoro aneana maga, po naga, Tuga moro kasa ki tea noasokisoki maga?

⁶⁴Ku po dogo navasasakiana: nimu ku midoa ki nasava? Go eu mamau puti dip̃akotovi a naga e pei tea waina ega mate.

⁶⁵Go te seara eu pae asa daniu sa, po p̃augoro namatana, po dip̃a e, po noa ki nia, eu naga, P̃a vasa pua: go tasiga maga eu piragi a ki natapagiana maga.

⁶⁶Go ragi waina Petero e doko etano namasopa ni nasum̃a, nagoroi atara maga ki tea viri warua liu sikai kakada e umai;

⁶⁷go ragi waina e punusi Petero e datalai, e leo punusi a, po naga, Nigo ma ku sikoti tea ni Nasareth, Yesu.

⁶⁸Ma e pasagoro, po naga, A da atae a mau, go a da midoaki atae tea waina ku noa e mau: go e dave paki nawosaia pano; go toa e dare.

⁶⁹Go nagoroi atara e punusi a, po moro pae asa noa ki tea maga waina eu lawodu pisari a, e naga, Tea waia e pei sikai kakada.

⁷⁰Ma e moro pasa goro e. Go edaku ki ragi kiki tea maga waina eu lawodu pisari a eu moro noa ki Petero, eu naga, Lomau ku pei sikai kakada; nalakena ku pei tea ni Calilea sikai.

⁷¹Ma e pae asa pasa sa ki, po pivisa, e naga, A da atae naatam̃oli wanogoe waina ku noa e mau.

⁷²Go m̃araverave toa e dare sala kerua. Go Petero e midoaki navasaana waina Yesu e noa ki nia asa, e naga, Ragi waina toa ega ko da paka rua dare mau, p̃a wo paka tolu pasa goro au. Go e midoaki paratiki nia, po do dagi.