Read Nguna Togoa Etafe North MARKO 15 Bible Online

MARKO 15 - Nguna Togoa Etafe North bible

MARKO 15

¹Go tea viri warua maga nara ma tea matua maga go tea midiri maga, go nasaisaiana mamau, eu mari navusum̃akiana sikai m̃araverave malip̃ogi, po soli Yesu, po piragi lua e, po pitua ki nia paki Pilato.

²Go Pilato e pusuusu paki nia, e naga, Nigo ku pei Nawota ki naka ni Yudea kite? Go e pasa dara po noa ki nia, e naga, Nigo ku noa.

³Go tea viri warua maga eu pasadip̃a e naleo laapa.

⁴Go Pilato e moro pusuusu paki nia, e naga, Ku da pasa dara te navatuna kite? P̃a leo, eu pasa dip̃a ko naleo laapa dapale.

⁵Ma Yesu e da moro pasa dara te navatuna mau; dapala waina Pilato e maga.

⁶Go sara nasaisaiana e do madeada peresi tea soliana sikai waina eu datagovi a asa.

⁷Go sikai e doko nagisana Barabba, e pei tea soliana sikoti tea maga waina eu duleana, waina eu mari namaripunueana natuleanaana wanogoe.

⁸Go taua ni naatam̃oli maga eu sake pano po pae asa pavarani a naga ega mari ega tapala waina e do madeada mari a.

⁹Go Pilato e pasa dara ra, po naga, Ku masauna naga aga manimu peresi Nawota ki naka ni Yudea kite?

¹⁰Nalakena e atae naga tea viri warua maga eu pitua ki nia nalakena eu doitoi a.

¹¹Ma tea viri warua maga eu pasa paria ki taua ni naatam̃oli maga, naga ega madeada peresi Barabba po da peresi Yesu mau.

¹²Go Pilato e moro pasa dara po noa ki da, e naga, Nalakena tea wanogoe aga mari nasava paki tea waina ku soso e ki Nawota ki naka ni Yudea?

¹³Go eu moro pioso, eu naga, P̃a turi a nakau valadagoto.

¹⁴Go Pilato e noa ki da, e naga, Ekasava, e mari tea sa nasava? Ma eu pioso p̃arua liu, eu naga, P̃a turi a nakau valadagoto.

¹⁵Go Pilato, waina e masauna naga ega mari nap̃op̃o ni taua ni naatam̃oli maga ega wia, e madeada peresi Barabba, po pitua ki Yesu, ragi waina e parati sua e, naga ega vei tea turiana nakau valadagoto.

¹⁶Go naatam̃oli ni navakalo maga eu piragi lua e sili paki namasopa ni nasum̃a, waina e pei Peretorio; go eu soso saisai ki taua mamau.

¹⁷Go eu sugoro e ki sugoro kovagoro miala kesakesa sikai, go eu piri vauvau ni tea makalikali sikai, po sawa ki nia asa;

¹⁸go eu pae asa pasa dodomi a, eu naga, P̃a laelaea, Nawota ki naka ni Yudea!

¹⁹Go eu p̃oka nap̃auna ki napati nau sikai, po daniu sa, go eu ditip̃atua po lotu ki nia.

²⁰Go ragi waina eu mari saudoa ki sua e, eu sawo lua sugoro miala kesakesa kiana, po sugoro e ki sugoro aneana maga. Go eu piragi a paki etaku naga euga turi a nakau valadagoto.

²¹Go eu mari tea sikai waina e surata liu ra, Simon ni Kurene, waina e pae navanua umai, Alexander go Rufo tamada, eu mari a e sikoti ra pano, naga ega tapetape nakau valadagoto aneana.

²²Go eu piragi a paki tokora Colcotha, waina e pei tea vasadoaana e pei, Tokora ni nagarai.

²³Go eu dua e waine waina eu lip̃aki sari murra asa: ma e da dape a mau.

²⁴Go eu duri a nakau valadagoto, po p̃otae sugoro aneana maga sarasara ra, po nadi ki gole ara, naga euga atae tea waina euga sikasikai dape a.

²⁵Go e pei aura ketolu, go eu duri a nakau valadagoto.

²⁶Go namidiriana ni navasadip̃aana kakana e pei tea midiriana elagi, e pei, NAWOTA KI NAKA NI YUDEA.

²⁷Go eu duri tea tapepavakoto dua ero sikoti a; sikai e du taleva ni matua, go sikai e du taleva ni mawiri.

²⁸Go tea maga waina eu surata liu sa eu pasa sa ki nia,

²⁹eu ligiligi p̃au, po naga, Ei! Nigo waina ku dakai nasum̃a tapu, po davagi a naaleatia dolu, p̃a tum̃am̃a mauti pauri ko, po m̃elu dua ki nakau valadagoto siwo umai.

³⁰Go dapala nogoe tea viri warua maga ma eu mari saudoa ki nia dum̃ada paki da, nara ma tea midiri maga eu mamau, po naga, E mauti pauri tea p̃ota maga; e mari sa dum̃anu mauti pauri a.

³¹Kristo, Nawota ki Israel, ega m̃elu dua ki nakau valadagoto siwo umai ragi waia, naga tuga vunusi po saralomau.

³²Go tea waina ero pei tea turiana sikoti a nakau valadagoto ero pasa sa ki nia.

³³Go ragi waina e pei aura kelatesa, namaligo e doko usuraki maramana mamau pa pa paki aura keloveti.

³⁴Go aura keloveti Yesu e pioso ki nadaleo kasua sikai, e naga, Eloi, Eloi, lama sabakthani? Waina e pei tea vasadoaana e pei, Sup̃e aginau, Sup̃e aginau, ekasana ku doropusi au?

³⁵Go te seara ni tea maga waina eu lawodu pisari a, ragi waina eu dogo e, eu naga, Kuga leo, e soso Eliyah.

³⁶Go sikai e sava, po pakavuro nalumulumu sikai ki waine kokona, po dakani a ki napati nau sikai, po dua e naga ega munugi a, po naga, Kuga toro e; tuga vunusi, Eliyah ega wo umai naga ega tape a siwo kite?

³⁷Go Yesu e pitua ki nadaleo kasua sikai, po marodua ki namerona.

³⁸Go nakulukulu liko goro p̃otae ni nasum̃a tapu e mawora pae elagi pa pa paki etano po edua asa.

³⁹Go ragi waina senturio, waina e lawodu pisari a kivea ki nia, e punusi naga e marodua ki namerona dapala nogoe, e naga, Lomau naatam̃oli waia e pei Sup̃e Natuna.

⁴⁰Go nagoroi maga ma eu doko eu do leo punusi pae uvea: nara seara kakada eu pei Maria ni Macdala, go Maria Yakobo kiki go Yose p̃ilada, go Salome; waina,

⁴¹ragi waina e doko Calilea, eu dausi a po maneana suasua; go nagoroi p̃ota laapa waina eu sikoti a sake umai paki Yerusalem.

⁴²Go ragi waina e po pei ragi melu, nalakena e pei ragi ni Namarim̃atakiana, waina e pei naaleatia waina e pea goro sabbath,

⁴³Yosef ni Arimathea e umai, tea vusum̃aki dodomadaganiana sikai, waina nae ma e leogoro namarakiana ki Sup̃e, go e piviari paki ekopu punusi Pilato, po datago nap̃atoko ni Yesu.

⁴⁴Go Pilato e maga e pe mate sua: go e soso senturio umai punusi a, po pusuusu paki nia, E mate sua pae tuai kite?

⁴⁵Go ragi waina e atae a ki senturio, e dua Yosef nap̃atokona.

⁴⁶Go e pakotovi nakulukulu ni linen sikai, go e dape a siwo, po lulugoro e ki nakulukulu ni linen wanogoe, po doropusi a matigo sikai waina e pei tea taeana sua vatu laketoko; go e malulua ki vatu sikai paki namata ni matigo.

⁴⁷Go Maria ni Macdala go Maria Yose p̃ilana ero leo punusi tokora waina e pei tea toropusiana asa.